បណ្ឌិត អាំង ជូលាន៖ បើចង់ដឹងរឿងអរិយធម៌ ត្រូវបំបាត់ឱ្យអស់នូវរឿងចចាមអារ៉ាម

បណ្ឌិត អាំង ជូលាន ជានរវិទូ និងសាស្រ្តាចារ្យនៃសកលវិទ្យាល័យភូមិន្ទ វិចិត្រសិល្បៈ មានប្រសាសន៍ថា សូមយកអ្វីបានពីការរៀនសូត្រ ការស្រាវជ្រាវ ធ្វើជាធំ បើចង់ដឹងរឿងអរិយធម៌ ត្រូវបំបាត់ឱ្យអស់នូវរឿងចចាមអារ៉ាម ដែលលឺគេតំណាលនិយាយតៗគ្នា ដោយគួរយកតាមអ្វីដែលអ្នកជំនាញឯកទេសបានស្រាវជ្រាវ។

ការលើកឡើងបែបនេះ ស្របពេល មកដល់បច្ចុប្បន្ននៅតែមាន និស្សិតមួយចំនួនចែកមិនដាច់ ឬយល់ច្រឡំ រវាងព្រឹត្តិការណ៍ប្រវត្តិសាស្ត្រ រឿងរ៉ាវពិត និងរឿងនិទានប្រឌិត ទាក់ទងនឹងរឿងព្រេងក្នុងសង្គមខ្មែរតាំងពីបុរាណកាល។

បណ្ឌិត អាំង ជូលាន បញ្ជាក់បន្ថែមថា៖ “ជួនកាលរឿងហ្នឹងអត់មានទេ ប៉ុន្តែមានព្រឹត្តិការណ៍ប្រវត្តិសាស្ត្រកើតឡើង ហើយយូរៗទៅបានក្លាយជារឿងនិទាន។ ដូចជា បន្ទាយលង្វែក ជារឿងប្រវត្តិសាស្ត្រដែលសៀមវាយបាក់បែក ដែលកាលនោះគេដឹងថា សៀមចូលតាមច្រកនេះ ច្រកនោះ ធ្វើនេះ ធ្វើនោះ ហើយយូរៗទៅ មានបន្ថែម ព្រឹត្តិការណ៍ ព្រះគោព្រះកែវ តទៀត។ ហើយយូរៗទៅ ព្រឹត្តិការណ៍ប្រវត្តិសាស្ត្រពិតប្រាកដ មានជាប់នឹងរឿង ព្រះគោព្រះកែវ តទៅទៀត”។

គួរបញ្ជាក់ថា បណ្ឌិត អាំង ជូលាន ជានរវិទូខ្មែរ ដែលបានបញ្ចប់ការសិក្សាថ្នាក់បណ្ឌិតនរវិទ្យា ពីប្រទេសបារាំងនៅ ឆ្នាំ​១៩៨២។ លោកសាស្ត្រាចារ្យ មានស្រុកកំណើត នៅឃុំកំពង់ឃ្លាំង ស្រុកសូទ្រនិគម ខេត្តសៀបរាប។ លោក ជាអតីតប្រធាននាយកដ្ឋានវប្បធម៌ នៃ អាជ្ញាធរជាតិអប្សរា៕

អត្ថបទ៖ ច័ន្ទ វីរៈ