ដើមឆ្នាំ២០២៣ មនុស្សឆ្នាំ “ឆ្លូវ” កំពូលសំណាងជាងគេ

យោងតាមឆ្នាំចន្ទគតិ រាប់តាមឆ្នាំចិន មនុស្សដែលមានកំណើតក្នុងឆ្នាំ​ “ឆ្លូវ” ជាមនុស្សមានលាភសំណាងខ្លាំងបំផុត ក្នុងអំឡុងត្រីមាសទី១ ដើមឆ្នាំ២០២៣។

អ្នកឆ្នាំ “ឆ្លូវ” នឹងមានតែ​មនុស្សចោមរោមស្រឡាញ់ ព្រមទាំងជួយទុក្ខធុរៈ។​ គ្រប់​ការងារ មានមនុស្សចាំគាំទ្រ និងសាទរជានិច្ច។ ​រាសីឡើងខ្ពស់ត្រដែត ក្នុងរវាង៣ខែ ដើមឆ្នាំ២០២៣ ព្រោះអ្នកមានទេវតា​ប្រទាន​សម្បត្តិ​ មាន​លុយ​ចូលហូរហែ។ ចំណែកការ​រកស៊ី​ មានភ្ញៀវចេញចូលឥតដាច់ លក់ដូរ​​មានតែផលចំណេញ។ បើ​​បើក​របរ​ថ្មី នឹងកាក់កបណាស់។

ចំពោះអ្នកកំពុងធ្វើការ ស៊ីប្រាក់ខែ នឹងបានឡើងប្រាក់ខែក្នុងដើមឆ្នាំនេះឯង។ ត្បិតតែឆ្នាំ “ឆ្លូវ” មិនសូវជោគជ័យកិច្ចការធំៗ តែក្នុងបណ្ដាញការងារមិនថាធំតូច នឹងដំណើរការរលូនល្អ។

ដើម​ឆ្នាំនេះ ជាវេលាល្អ សម្រាប់អាជីពនានា ធ្វើអ្វីក៏ចម្រើន ជាពិសេសហិរញ្ញវត្ថុ មានលុយចាយហូរហៀរ​។ គូស្នេហ៍វិញ មានការយល់ចិត្តថ្លើម ស្អិតរមួត បើស្វាមីភរិយា មិនទាន់មានបុត្រ យកបុត្រពេលនេះ​ពិតជាល្អបំផុត។ យ៉ាងណាមិញ ចំពោះអ្នកនៅលីវ  ពេលនេះ​ជាពេលនៅម្នាក់ឯងសិន ឯអ្នកទើបតែខូចចិត្តរួចក្ដៅៗ កុំទាន់ចាប់ផ្ដើមថ្មី។

ទោះយ៉ាងណា សូមប្រយ័ត្នចំពោះបញ្ហាផ្លូវដង្ហើម អាឡ័កស៊ី និងភាពមិនប្រក្រតីនៃអរម៉ូន។ គួរចៀសវាងការផឹកស្រា និងជក់បារីឱ្យបាន។

ថ្វីត្បិតអ្នកអាចនឹងជួបបញ្ហាសុខភាព ប៉ុន្តែប្រសិនបើបានប្រគេន​ទេយ្យទាន​ដល់​ព្រះសង្ឃ​ បុណ្យកុសលអាចជួយពង្រឹងសុខភាព និងកម្លាំងរបស់អ្នកឱ្យរឹងមាំឡើង៕

អត្ថបទ៖ សន្យា

ចុចអាន៖ រាសីឆ្នាំ “ជូត” ចុះខ្សោយ នៅដើមឆ្នាំ២០២៣នេះ