របាំក្បាច់បុរាណខ្មែរមាន៤៥០០ក្បាច់ មិនមែន១០៨ក្បាច់នោះទេ

បន្ទាប់ពីមានការលើកឡើងពីសំណាក់អ្នកលក់អនឡាញ ដែលតាំងខ្លួនជាអ្នកស្នងរូបព្រះនាងឥន្ទ្រទេវីពាក់ព័ន្ធ​របាំក្បាច់បុរាណខ្មែរថា មានត្រឹម១០៨ក្បាច់នោះ ទីបំផុតនៅលើផេកផ្លូវការឈ្មោះថា “វប្បធម៌ខ្មែរ” បានចេញមកបញ្ជាក់ច្បាស់ៗថា របាំក្បាច់បុរាណខ្មែរមានរហូតដល់៤៥០០ក្បាច់ មិនមែន១០៨ក្បាច់ ដូចអ្នកបារមីលើកឡើងទេ។

ចំពោះការចេញមកបញ្ជាក់នេះ ដើម្បីកុំឲ្យមានការយល់ច្រឡំដល់មហាជនខ្មែរ ខណ:ផេក”វប្បធម៌ខ្មែរ”បានលើកឡើង​តាមរយ:ខ្លឹមសារថា «គោរពជូនមហាជនខ្មែរទាំងអស់គ្នាថា«ក្បាច់បាតមូលដ្ឋានគ្រឹះនៃរបាំព្រះរាជទ្រព្យ​(របាំក្បាច់​បូរាណខ្មែរ)​មានរហូតទៅដល់៤៥ ០០ក្បាច់» មិនមែន១០៨ក្បាច់ ដូចអ្នកបារមីជជុះបានលើកឡើងឡើយ។ ក្បាច់បាតមូលដ្ឋានគ្រឹះនៃរបាំព្រះ រាជទ្រព្យ ឬ យើងតែងតែហៅថា ក្បាច់បាតឆា-បញ្ចុះ ក្បាច់បាតមូលដ្ឋាន​គ្រឹះនេះមានវែង និងមានខ្លី បើគេហាត់ឆាបញ្ជុះវែងអាចដល់៤០នាទីបើខ្លីអាច៨នាទីឬ ១០នាទី ។

ប្រភពបានបន្តពន្យល់ថា ក្បាច់បាតមូលដ្ឋានគ្រឹះ(ឆា- បញ្ចុះ)គឺប្រៀបបានដូចជាការបង្រៀនក្មេងឱ្យចេះអក្សរ ក ខ ដូច្នេះដែរ! នាដកាគ្រប់រូបដែលអាចចេញសម្ដែងបានលុះត្រាតែបានឆ្លងកាត់ ក្នុងការហាត់ពត់លត់​ដំតាំងពីកុមារ​នូវក្បាច់បាតឆា-បញ្ចុះនេះឱ្យស្ទាត់ជាមុនសិនទើបអាចហាត់ របាំតូចៗជាមុន​និងរបាំធំៗ​ឬរឿងនិងចាប់យក​ឫកជាក្រោយ»។

ភ្លេងឆាគឺសំដៅទៅលើភ្លេងយឺត និងភ្លេងបញ្ជុះគឺសំ ដៅទៅលើភ្លេងលឿន ភ្លេងនិងក្បាច់ទាំងអស់ក្នុងក្បាច់បាត មានលាតសន្ធឹងក្នុងរបាំតូចធំនិងរឿងទាំងអស់ ក្នុងទម្រង់សិល្បៈល្ខោនព្រះរាជទ្រព្យ។ ដូច្នេះហើយនាដកាទាំងផ្នែកនាង នាយរោង យក្ស ស្វា ត្រូវតែចេះក្បាច់បាតនេះជាកំហិត។

នៅលើផេក”វប្បធម៌ខ្មែរ”ដដែលក៏បានបន្ថែមថា ក្បាច់បាតមូលដ្ឋានគ្រឹះមានរហូតដល់៤៥០០ក្បាច់ មិនមែនមានត្រឹម១០៨ក្បាច់តាមការប្រមើស្រមៃដូចបារមីបានលើកឡើងឡើយ៕

អត្ថបទ៖ ចាន់រ៉ា