របាំគោះអង្រែ និងរបាំក្បាច់បាតយក្ស នឹងយកទៅសម្តែងនៅផ្លូវថ្មើរជើង (Walk Street)  ក្នុងសប្តាហ៍នេះ

មន្ទីរវប្បធម៌ និងវិចិត្រសិល្បៈរាជធានីភ្នំពេញ បានបង្ហោះលើបណ្តាញសង្គមនៅរសៀលថ្ងៃទី៦ ខែមិថុនា ឆ្នាំ២០២៥ថា សប្តាហ៍នេះ គឺល្ងាចថ្អៃទី៧ និងទី៨ ខែមិថុនា ទស្សនីភាពសិល្បៈខ្មែរចំនួន២ នឹងយកទៅសម្តែងលើផ្លូវថ្មើរជើង (Walk Street) ដើម្បីឱ្យភ្ញៀវទេសចរជាតិ និងអន្តរជាតិបានទស្សនា នោះគឺ របាំប្រពៃណី គោះអង្រែ និងរបាំក្បាច់បុរាណ ក្បាច់បាតយក្ស។

ក្នុងការជូនដំណឹងនោះ មន្ទីរវប្បធម៌ បានសរសេរថា៖ “នាសប្ដាហ៍នេះ មន្ទីរវប្បធម៌ និងវិចិត្រសិល្បៈរាជធានីភ្នំពេញ និងលើកយកនូវផ្ទាំងសិល្បៈទស្សនីយភាពចំនួន០២ ដើម្បីសម្ដែងជូនភ្ញៀវជាតិ អន្តរជាតិ និងពុក ម៉ែ បងប្អូន ទាំងអស់គ្នាបានទស្សនា នាផ្លូវថ្មើរជើង ( Walk Street )។ ១/ ទស្សនីយភាពសិល្បៈ របាំប្រពៃណី ( គោះអង្រែ)។ ២/ ទស្សនីយភាពសិល្បៈ របាំក្បាច់បុរាណ ( ក្បាច់បាតយក្ស )”។ បន្ថែមពីនេះ ប្រភពដដែល ក៏បានសំណូមពរដល់ពលរដ្ឋ និងភ្ញៀវទេសចរចូលរួមទស្សនាឱ្យបានច្រើនកុះករផងដែរ។

គួររម្លឹកថា ផ្លូវថ្មើរជើង (Walk Street) ត្រូវបានរដ្ឋបាលរាជធានីភ្នំពេញដាក់ដំណើរការសាកល្បងកាលពីថ្ងៃទី០១ ខែកុម្ភៈ ឆ្នាំ២០២៥ ចាប់ពីម៉ោង៦ល្ងាច ដល់ម៉ោង១១យប់ នៅតាមបណ្តោយតីរវិថីព្រះស៊ីសុវត្ថិ ចាប់ពីវិថីបក្សីចាំក្រុង (ផ្លូវលេខ៩៤) រហូតដល់មុខព្រះបរមរាជវាំង ស្ថិតនៅ ក្នុងខណ្ឌដូនពេញ រាជធានីភ្នំពេញ។ បន្ទាប់ពីដំណើរការសាកល្បងបានជាង ៤ខែកន្លងមក ឃើញថាមានការគាំទ្រខ្លាំងពីប្រជាពលរដ្ឋ រួមទាំងភ្ញៀវបរទេសផង។ តាមរយៈភាពជោគជ័យមួយនេះ ផ្លូវថ្មើរជើង (Walk Street) គ្រោងនឹងបើកសម្ពោធជាផ្លូវការ នាថ្ងៃទី២១ ខែមិថុនា ឆ្នាំ២០២៥ ខាងមុខ ក្រោមអធិបតីភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា៕