មជ្ឈមណ្ឌលវប្បធម៌ព្រះពុទ្ធសាសនាកម្ពុជា ជានិមិត្តរូបនៃសុខដុមរមនាខាងសាសនា

មជ្ឈមណ្ឌលវប្បធម៌ព្រះពុទ្ធសាសនាកម្ពុជា ជានិមិត្តរូបនៃសន្តិភាព ឯកភាព និងសុខដុមរមនាខាងសាសនានៅក្នុងពិភពលោក ខណៈដែលមជ្ឈមណ្ឌលវប្បធម៌នេះ ក៏មានតួនាទីក្នុងការលើកកម្ពស់ការយល់ដឹង និងការយោគយល់គ្នាទៅវិញទៅមកសម្រាប់គ្រប់ជំនឿសាសនា។ នេះជាការថ្លែងឡើងរបស់ សម្តេចធិបតី ហ៊ុន ម៉ាណែត ដែលបានអញ្ជើញជាធិបតី ពិធីសម្ពោធឆ្លងព្រះធម្មចេតិយទី១ តម្កល់ព្រះត្រៃបិដកចម្លាក់ពីថ្មម៉ាប ១ ១៧០ ផ្ទាំង និងសមិទ្ធផលនានាក្នុងមជ្ឈមណ្ឌលវប្បធម៌ព្រះពុទ្ធសាសនាកម្ពុជា នៅខេត្តកំពង់ស្ពឺ នាថ្ងៃទី ៣០ ខែឧសភា ឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាឱកាសនេះ សម្តេចធិបតី បានបង្ហាញសុទិដ្ឋិនិយមថា ក្រោយការកសាងមជ្ឈមណ្ឌលវប្បធម៌ព្រះពុទ្ធសាសកម្ពុជារួចរាល់ជាស្ថាពរ នឹងក្លាយទៅជាភោជនីយដ្ឋានព្រះពុទ្ធសាសនាទេសចរណ៍ជាតិធម្មជាតិដែលគួរទាក់ទាញមួយសម្រាប់ភ្ញៀវទេសចរជាតិ និងអន្តរជាតិយ៉ាងច្រើនកុះករ និងបម្រើដល់វិស័យព្រះពុទ្ធសាសនានៅកម្ពុជា ព្រមទាំងរួមចំណែកដល់ចក្ខុវិស័យទេសចរណ៍កម្ពុជា។ ការរីកចម្រើនទាំងផ្នែកអាណាចក្រ និងពុទ្ធចក្រនៅទីនេះគឺមានរយៈសំខាន់នៅលើទឹកដីកម្ពុជាដែលកកើតនៅក្នុងប្រទេសរាប់ពាន់ឆ្នាំមកហើយ។

សម្តេចធិបតី ថ្លែងថា ដោយសារសន្តិភាពទើបអាចមានលទ្ធភាពធ្វើបុណ្យបាន បើគ្មានសន្តិភាព និងគ្មានការផ្តល់សិទ្ធិសេរីភាព នោះការប្រារព្វពិធីធ្វើបុណ្យ ក៏អាចមានការលំបាក ប៉ុន្តែដោយសារសន្តិភាពទើបសាសនារីកចម្រើន និងអាចមានសេរីភាពក្នុងការកសាងសមិទ្ធផលនានា។ សម្តេចធិបតី គូសរំលេចថា៖«ការធ្វើបុណ្យ ការប្រតិបត្តិសាសនានេះ មិនត្រឹមតែនាំមកនូវសន្តិភាពទេ ប៉ុន្តែក៏ជា​គោលដៅក្នុងការថែរក្សាសន្តិភាព។ សង្គមមួយគ្មានបុណ្យ គ្មានការយោគយល់គ្នាមិនថាសាសនាព្រះពុទ្ធ សាសនា​គ្រិស្ត សាសនាឥស្លាមទេ យើងនឹងគ្មានសន្តិភាព បើមនុស្សនៅតែរើសអើង»។

បើតាមនាយករដ្ឋមន្រ្តីកម្ពុជា ៖«នៅប្រទេសខ្លះ មានសាសនាច្រើន ប៉ុន្តែអត់ត្រូវគ្នាទេ ឃើញតែប្រជាជន​សាសនានេះ​ទៅដាក់គ្រាប់បែកនៅសាសនានោះ។ តែនៅកម្ពុជា យើងមិនមានជម្លោះសាសនា នេះហើយគឺ​ការយោគយល់ ការធ្វើបុណ្យឆ្លងសាសនារបស់ប្រជាជនយើង ហើយមិនឱ្យមានជម្លោះសាសនា​ នេះគឺជាការ​សំខាន់ណាស់»។

សម្តេចធិបតី ធ្វើការកត់សម្គាល់ថា៖«គ្រប់សាសនាទាំងអស់ពិតណាស់មានព្រះរៀងៗខ្លួន មានគម្ពីរៀងៗខ្លួន ប៉ុន្តែខ្ញុំវិភាគមើលទៅ គ្មានអីក្រៅពីផ្តល់ដំបូលន្មានសម្រាប់ឱ្យរៀនរស់នៅជាមួយគ្នា រៀងកសាងជាមួយគ្នាឱ្យបានល្អ ចេះសាមគ្គីគ្នា​ និងចែករំលែកជាមួយគ្នា»៕