វៀតណាមអាចនាំចេញទុរេនទៅចិន​ជាឡើងវិញ ក្រោយជាប់គាំងដោយសារបញ្ហាត្រួតពិនិត្យថ្នាំគីមី

ការនាំចេញផ្លែទុរេនរបស់វៀតណាមទៅកាន់ប្រទេសចិន បាន​បើកដំណើរការទៅរកប្រក្រតីភាពវិញ ដោយ​មាន​រថយន្តដឹកទំនិញប្រមាណ ៤០០ គ្រឿងឆ្លងកាត់ច្រកព្រំដែនជារៀងរាល់ថ្ងៃ ក្រោយ​មានការរំខាន​នៅខែមុន​ដោយសារបញ្ហាបច្ចេក​ទេស​ផ្នែកត្រួតពិនិត្យ​ថ្នាំគីមី​។ នេះបើតាមការចុះផ្សាយរបស់កាសែត VnExpress។

យោងតាម​មន្រ្តីជំនាញវៀតណាម​ ឥឡូវនេះមាន​រថយន្តដឹកទុរេនប្រហែល​ ២០០-២៥០ ​គ្រឿង ឆ្លងកាត់​​តាមច្រកព្រំដែន Lang Son, ១០០-១៥០ គ្រឿង​តាមច្រកព្រំដែន​ Lao Cai និង​ប្រហែល ៥០ គ្រឿង​តាម​ច្រក​ព្រំដែន​ Mong Cai។

គួររំឭកថា កាលពីខែតុលា មាន​សេចក្ដីរាយការណ៍ថា មន្ទីរពិសោធន៍វៀតណាម​បានផ្អាកការត្រួតពិនិត្យគុណភាពផ្លែទុរេន ដែល​ធ្វើឱ្យ​ការនាំចេញរបស់វៀតណាមត្រូវរាំងស្ទះ រហូតដល់ធ្វើឱ្យ​កសិករវៀតណាមទុកផ្លែទុរេនឱ្យស្អុយចោលនៅចម្ការ ដោយ​គ្មានឈ្មួលទិញ ហើយតម្លៃធ្លាក់ចុះទាប មិនអាចរកផលចំណេញ។

ជាការឆ្លើយតប ក្រសួងកសិកម្ម និងបរិស្ថានវៀតណាម បាន​​បញ្ជា​ឱ្យ​អង្គភាពជំនាញ​សម្របសម្រួលជាមួយភាគីចិន ដើម្បីដោះស្រាយការលំបាកផ្នែកបច្ចេកទេសនីមួយៗ ដោយមានគោលដៅ «ធានាថាគ្មានការដឹកជញ្ជូនណាមួយត្រូវបានរំខានដោយសារតែនីតិវិធីបច្ចេកទេសនោះទេ»។

ប្រធានសមាគមទុរេនខេត្តដាក់ឡាក់ លោក Le Anh Trung បាន​ឱ្យដឹងថា ដោយអនុវត្តតាមការណែនាំរបស់ក្រសួង មន្ទីរពិសោធន៍វៀតណាម​បាន​ធ្វើត្រួតពិនិត្យឡើងវិញ​ដើម្បី​ដោះស្រាយបញ្ហា ​ដែលឈានទៅដល់ការបើកការនាំចេញឡើង​វិញ​។