ថៃបដិសេធមិនបន្ត​«ការស្នាក់នៅលើសកំណត់» សម្រាប់ពលករខ្មែរ​​ឆ្នាំក្រោយ

ក្រសួងមហាផ្ទៃនៃរដ្ឋាភិបាល​របស់លោកនាយករដ្ឋមន្រ្តី អានុទីន ឆានវីរៈគុន បានបដិសេធសេចក្តីសម្រេចមួយ​របស់គណៈរដ្ឋមន្ត្រីរដ្ឋាភិបាលចាស់ ​ដែលអនុញ្ញាតឱ្យកម្មករខ្មែរ​អាចស្នាក់នៅហួសកាលកំណត់ជាបណ្ដោះអាសន្ន​ក្នុងប្រទេសថៃ ដើម្បី​ដោះស្រាយបញ្ហាកង្វះខាតកម្លាំងពលកម្ម។ នេះបើតាមការចុះផ្សាយរបស់កាសែតបាងកកប៉ុស្តិ៍។

អ្នកនាំពាក្យក្រសួងមហាផ្ទៃថៃ លោកស្រី Trisulee Trisoranakul បាន​ឱ្យដឹងកាលពីថ្ងៃចន្ទ​ថា ​លោក អានុទីន ក្នុងឋានៈជារដ្ឋមន្ត្រីក្រសួងមហាផ្ទៃ បានសម្រេចចិត្តមិនចុះហត្ថលេខាលើសេចក្តីប្រកាសរបស់ក្រសួង ដែល​អនុញ្ញាតឱ្យកម្មករកម្ពុជា ​ដែលផុតកំណត់ស្នាក់នៅថៃត្រឹមខែកុម្ភៈ ​អា​ចបន្តធ្វើការនៅក្នុងប្រទេស។

ការប្រកាសនេះ ធ្វើឡើងចំពេលដែល​ភាពតានតឹងព្រំដែនរវាងកម្ពុជា-ថៃ កើនឡើងជាថ្មី ក្រោយ​ភាគីថៃប្រកាសផ្អាកកិច្ចព្រមព្រៀងសន្តិភាព ដែលមេដឹកនាំប្រទេសទាំង២សម្រេចឡើងនៅម៉ាឡេស៊ីកាលពីខែមុន។

រដ្ឋាភិបាលមុន ដែលដឹកនាំដោយគណបក្សភឿថៃ បានយល់ព្រមនៅថ្ងៃទី ១៩ ខែសីហា អនុញ្ញាតឱ្យពលករកម្ពុជាស្នាក់នៅក្នុងប្រទេសថៃជាបណ្ដោះអាសន្ន។ ហេតុផលគឺដើម្បីផ្តល់ពេលវេលាបន្ថែមទៀតដល់មន្ត្រីថៃ ដើម្បីពិនិត្យមើលអត្តសញ្ញាណ​ និងកន្លែងដែលពួកគេរស់នៅ។

​យ៉៉ាងណាមិញ​ ការសម្រេចចិត្តនេះត្រូវការការប្រកាសជាផ្លូវការពីក្រសួងមហាផ្ទៃ មុនពេលវាអាចចូលជាធរមាន ​ដោយសារក្រសួងនេះ ទទួលបន្ទុកសន្តិសុខផ្ទៃក្នុង។ ​ផែនការដដែល ដើមឡើងមាន​​បំណងដោះស្រាយកង្វះខាតកម្លាំងពលកម្ម បន្ទាប់ពីពលករកម្ពុជាជាច្រើនបាន​ធ្វើមាតុភូមិនិវត្តន៍ពីប្រទេសថៃ ជុំវិញភាពតានតឹងព្រំដែន រួមទាំងជម្លោះ ៥ ថ្ងៃនៅចុងខែកក្កដា។ ​ក្រោយនោះ ថៃព្យាយាមនាំយកពលករមកពីប្រទេសផ្សេងៗ រួមទាំងមីយ៉ាន់ម៉ា ឡាវ និងវៀតណាមផងដែរ ប៉ុន្តែកង្វះពលករកម្ពុជា​នៅតែ​ជា​កង្វល់ចម្បង។

លោកស្រី Trisulee បាននិយាយថា យោងតាមទិន្នន័យផ្លូវការ ពលករកម្ពុជាជាង ៥២០​ ០០០ នាក់កំពុងធ្វើការនៅក្នុងប្រទេសថៃ មុន​ជម្លោះប្រដាប់អាវុធ ប៉ុន្តែឥឡូវនេះនៅសល់តែប្រហែល ១០០​ ០០០ នាក់ប៉ុណ្ណោះ។ យ៉ាងណាមិញ ក្រសួងការងារកម្ពុជាបាន​ឱ្យដឹងនៅដើមខែសីហាថា ពលករចំណាកស្រុកខ្មែរប្រមាណជិត ៩០ ម៉ឺននាក់ បាន​វិលចូលស្រុកវិញ៕