សេដ្ឋកិច្ច

កម្ពុជា-ហ្វីលីពីនចុះ MOU ដើម្បីជំរុញការអភិវឌ្ឍទីផ្សារមូលបត្រ

បានផុស

២ ថ្ងៃ មុន

នៅ

ថ្ងៃសុក្រ ១៤ វិច្ឆិកា ២០២៥

ដោយ

លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា នៅថ្ងៃទី ០៤ ខែវិច្ឆិកា ឆ្នាំ ២០២៥ បានចុះអនុស្សរណៈនៃការយោគយល់គ្នា (MoU) ជាមួយគណៈកម្មការមូលបត្រហ្វីលីពីន (SEC) តំណាងដោយលោក Francis Ed. Lim ប្រធាននៃ SEC នៅទីក្រុងកូឡាឡាំពួរ ប្រទេសម៉ាឡេស៊ី ដោយមានការចូលរួមធ្វើជាសាក្សីដោយលោក Eugene Wong នាយកប្រតិបត្តិ នៃវិទ្យាស្ថានហិរញ្ញវត្ថុប្រកបដោយចីរភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះអនុស្សរណៈនៃការយោគយល់គ្នានេះ មានគោលបំណងជំរុញការជួយគ្នាទៅវិញទៅមក ការផ្លាស់ប្តូរព័ត៌មាន និងពង្រឹងកិច្ច-សហប្រតិបត្តិការនៅក្នុងការលើកកម្ពស់ និងពង្រឹងការធ្វើនិយ័តកម្មសម្រាប់ប្រទេសទាំងពីរ។

លើសពីនេះ MoUនេះ ក៏នឹងលើកកម្ពស់ដល់ការកសាងសមត្ថភាព ដើម្បីជំរុញការអភិវឌ្ឍទីផ្សារមូលបត្រនៃប្រទេសទាំងពីរតាមរយៈការអភិវឌ្ឍធនធានមនុស្សផងដែរ។

លោក ស៊ូ សុជាតិ មានប្រសាសន៍ថា៖ «តាមរយៈ MoU នេះ យើងនឹងពង្រឹងកិច្ចសហប្រតិបត្តិការក្នុងការកសាងសមត្ថភាព និងការផ្លាស់ប្តូរព័ត៌មាន ដែលនឹងបង្កើតទំនុកចិត្ត សាមគ្គីភាព និងវឌ្ឍនភាពបន្ថែមទៀតសម្រាប់ភាគីទាំងពីរ»។

MoU នេះ ក៏ជានិមិត្តរូបដែលបង្ហាញពីការប្តេជ្ញាចិត្តរួមគ្នារបស់ប្រទេសទាំងពីរ ហើយក៏បានបង្ហាញពីព្រឹត្តិការណ៍ដ៏សំខាន់មួយទៀត និងដំណើរដ៏អស្ចារ្យសម្រាប់និយ័តករទាំងពីរ ក្នុងការធ្វើការរួមគ្នាដើម្បីអភិវឌ្ឍទីផ្សារមូលបត្រនៃប្រទេសទាំងពីរ ក្នុងភាពជាដៃគូ ជាពិសេសនៅក្នុងយុគសម័យសកលភាវូបនីយកម្ម និងឌីជីថលូបនីយកម្ម។

លោក ស៊ូ សុជាតិ បន្ថែមថា ភាពជាដៃគូនេះ គឺជាសក្ខីភាពមួយដែលយើងជឿជាក់ថា តាមរយៈការធ្វើការជាមួយគ្នា យើងនឹងអាចសម្រេចបានសមិទ្ធផលច្រើនជាងមុន។ យើងអាចបង្កើតបរិយាកាសដែលមានសុវត្ថិភាពជាងមុនសម្រាប់វិនិយោគិន បង្កើតទំនុកចិត្ត កាន់តែខ្លាំងឡើងនៅក្នុងទីផ្សារ និងរួមចំណែកដល់ការធ្វើសមាហរណកម្មហិរញ្ញវត្ថុ និងវិបុលភាពនៃតំបន់ អាស៊ានទាំងមូល។

លោក Francis Ed. Lim មានប្រសាសន៍ថា៖ «នៅក្រោម MoU នេះ PSEC និង ន.ម.ក. នឹងធ្វើការរួមគ្នាលើការត្រួតពិនិត្យ និងការអនុវត្តច្បាប់, ការកសាងសមត្ថភាព និងការបណ្តុះបណ្តាល និងកិច្ច-សហការបច្ចេកទេសនៅក្នុងហិរញ្ញវត្ថុប្រកបដោយចីរភាព បច្ចេកវិទ្យាហិរញ្ញវត្ថុ និងឌីជីថលូបនីយកម្មទីផ្សារ។ យើងមានគោលបំណងពង្រឹងការការពារវិនិយោគិន រក្សាសុចរិតភាពទីផ្សារ និងលើកកម្ពស់នវានុវត្តន៍ និងកំណើន ប្រកបដោយទំនួលខុសត្រូវ»។

ភាពជាដៃគូនេះ ក៏ឆ្លុះបញ្ចាំងពីចក្ខុវិស័យអាស៊ានដ៏ធំទូលំទូលាយរបស់យើងផងដែរ ដើម្បីកសាងទីផ្សារមូលធនដែលប្រកបដោយដោយភាពស្មើគ្នា ប្រសិទ្ធភាព និងភាពធន់ ដែលជំរុញទំនុកចិត្ត វិនិយោគិន និងរួមចំណែកដល់ការអភិវឌ្ឍប្រកបដោយចីរភាពនៅក្នុងតំបន់របស់យើង៕