អ្នកឧកញ៉ា គិត ម៉េង ជំរុញឱ្យសភាពាណិជ្ជកម្មកម្ពុជា-ស្រីលង្កា ចាប់យកកាលានុវត្តភាពធុរកិច្ច និងពិនិត្យលទ្ធភាពសហប្រតិបត្តិការរួមគ្នា

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់​ធុរកិច្ចអាស៊ាន​សម្រាប់កម្ពុជា ក្នុង​ជំនួបពិភាក្សារវាងសភាពាណិជ្ជកម្មកម្ពុជា និងគណៈប្រតិភូធុរកិច្ចស្រីលង្កា អ្នក​ឧកញ៉ាបាន​បាន​ជំរុញ​ឱ្យ​ធុរជន​នៃ​ប្រទេស​ទាំង​ពីរ ចាប់យកកាលានុវត្តភាពធុរកិច្ច និងពិនិត្យ​លទ្ធភាព​សហប្រតិបត្តិការ​រួមគ្នា។

អ្នកឧកញ៉ា គិត ម៉េង នៅថ្ងៃទី ១៤ ខែវិច្ឆិកា បាន​ទទួលជួប​ពិភាក្សាការងារ​ជា​មួយ​គណៈប្រតិភូធុរកិច្ច​ស្រីលង្កា ដោយ​ផ្តោតសំខាន់ទៅលើការជំរុញពាណិជ្ជកម្ម និងវិនិយោគរវាងប្រទេសទាំងពីរ ពិសេសគឺ លើវិស័យសក្តានុពលរួម កម្មន្ត សាល ភស្តុភារ សំណង់និងអចលនទ្រព្យ ថាមពល និងទេសចរណ៍ និងសេវាកម្ម។

អ្នកឧកញ៉ា គិត ម៉េង បានគូសបញ្ជាក់ពី តួនាទីដ៏សំខាន់របស់វិស័យឯកជន ដែលជាកម្លាំងចលករសេដ្ឋកិច្ចក្នុងការជំរុញកិច្ចសហប្រតិបត្តិការពាណិជ្ជកម្មទ្វេភាគី និង​ជំរុញឲ្យធុរជន​ទាំងពីរ​ប្រទេស ចាប់​យកកាលានុវត្តភាពធុរកិច្ច និងពិនិត្យលទ្ធភាពសហប្រតិបត្តិការរួមគ្នា។

អ្នក​ឧកញ៉ា បាន​គូស​បញ្ជាក់​ថា «ក្នុងនោះ ធុរជនស្រីលង្កា អាចទាញយកប្រយោជន៍ពីស្ថិរភាពសេដ្ឋកិច្ចកម្ពុជា និងទីផ្សារកម្ពុជា ដែលជា ច្រកទ្វារទៅកាន់អាស៊ាន។ ចំណែកឯ ធុរជនកម្ពុជា អាចទាញយកប្រយោជន៍ពីចំណុចខ្លាំងរបស់ស្រី លង្កាខាង ផ្នែកសេវាកម្ម និងជា ច្រកទ្វារទៅកាន់បណ្តាញពាណិជ្ជកម្មមហាសមុទ្រឥណ្ឌា»។

ជាមួយគ្នានេះ អ្នកឧកញ៉ាប្រធានបានសង្កត់ធ្ងន់ពីកំណើនសេដ្ឋកិច្ច និងសក្តានុពលកម្ពុជាលើគ្រប់វិស័យ រួមទាំងកម្មន្ត សាល សេវាកម្ម និងហេដ្ឋារចនាសម្ព័ន្ធ ព្រម​ទាំង​បានស្នើដល់ក្រុមប្រឹក្សាធុរកិច្ចស្រីលង្កា-មេគង្គ ជំរុញក្រុមហ៊ុនអាកាស ចរណ៍ស្រីលង្កា ពិនិត្យលទ្ធភាពបើកការហោះហើរត្រង់ ពីទីក្រុងកូឡុំបូ មកកាន់រាជធានីភ្នំពេញ ដែលនឹងជួយជំរុញវិស័យទេសចរណ៍ ពាណិជ្ជកម្ម និងវិនិយោគរវាងប្រទេសទាំងពីរ។

ជា​ការ​ឆ្លើយ​តប លោក ទីឡាក ហ្គូណាវ៉ាដាណា បានបញ្ជាក់ថា គណៈប្រតិភូស្រីលង្កាមាន​បំណងសិក្សាស្វែង​យល់​ពី​សេដ្ឋកិច្ច វិស័យសក្តានុពល និងកាលានុវត្តភាពធុរកិច្ចនៅកម្ពុជា និង​បាន​កោតសរសើរ​ចំពោះ​ការរីក​ចម្រើន​របស់​កម្ពុជា និង​សំឡឹង​ឃើញ​លទ្ធភាព​សហប្រតិបត្តិការលើច្រើនវិស័យ។

លោកបានគូសបញ្ជាក់ថា សភាពាណិជ្ជកម្មស៊ីលុន ជា​សភាពាណិជ្ជកម្ម​ដែលមាន​វ័យចំណាស់​ជាង​គេមួយ​នៅ​ស្រីលង្កា ដែល​មានតួនាទីជំរុញ និងសម្របសម្រួលពាណិជ្ជកម្មនិងវិនិយោគទូទាំងពិភពលោក។ ក្នុងន័យនេះ លោកបានអញ្ជើញ អ្នកឧកញ៉ា គិត ម៉េង ដឹកនាំគណៈប្រតិភូទៅទស្សនកិច្ចនៅស្រីលង្កា នាពេលអនាគតដ៏សមស្រប។

សភាពាណិជ្ជកម្មកម្ពុជា គឺជាស្ថាប័នមិនស្វែងរកប្រាក់ចំណេញ ដែលត្រូវបានបង្កើតឡើងក្នុងឆ្នាំ ១៩៩៥ ដើម្បីតំណាងឲ្យផលប្រយោជន៍របស់វិស័យឯកជន នៅក្នុងវិស័យពាណិជ្ជកម្ម ឧស្សាហកម្ម សេវាកម្ម និងកសិកម្មទូទាំងប្រទេស​កម្ពុជា។

ដោយ​ឡែក​ ក្រុមប្រឹក្សាធុរកិច្ច ស្រីលង្កា-មេគង្គនៃសភាពាណិជ្ជកម្មស៊ីលុន (Ceylon Chamber of Commerce) ត្រូវបានបង្កើតឡើងដើម្បីលើកកម្ពស់ និងពង្រឹងចំណងទាក់ទងផ្នែកពាណិជ្ជកម្ម ការវិនិយោគ និងទេសចរណ៍ រវាងប្រទេសស្រីលង្កា និងតំបន់មេគង្គ (កម្ពុជា ឡាវ មីយ៉ាន់ម៉ា ថៃ និងវៀតណាម)៕