ព័ត៌មានអន្ដរជាតិ

ប្រាក់ចំណេញក្រុមហ៊ុនភេសជ្ជៈថៃនានាធ្លាក់ចុះខ្លាំង ដោយសារជម្លោះជាមួយកម្ពុជា និងបញ្ហាផ្សេងៗ

បានផុស

៨ ខែ មុន

នៅ

ថ្ងៃអង្គារ ១៨ វិច្ឆិកា ២០២៥

ដោយ

បណ្ដាក្រុមហ៊ុនភេសជ្ជៈថៃធំៗដូចជា ខារ៉ាប៉ាវ អ៊ីឈីតាន់ និង Malee ជាដើមនោះ បានរាយការណ៍ពីការធ្លាក់ចុះប្រាក់ចំណេញសុទ្ធយ៉ាងគំហុក ដោយសារតែភាពតានតឹងព្រំដែនជាមួយកម្ពុជា បញ្ហាធាតុអាកាស និងកម្សោយតម្រូវការពីប្រទេសជិតខាងរួមមានកម្ពុជា ឡាវ មីយ៉ាន់ម៉ា និងវៀតណាម (CLMV)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់កាសែត The Nation កាលពីថ្ងៃចន្ទ ទីផ្សារភេសជ្ជៈគ្មានជាតិអាល់កុលថៃ ដែលមានតម្លៃ ១០០ ប៊ីលានបាត ឬជាង ៣ ប៊ីលានដុល្លារ កំពុងប្រឈមមុខនឹងបញ្ហាធំៗធ្ងន់ធ្ងរនៅឆ្នាំនេះ។ ធាតុអាកាសត្រជាក់ជាងធម្មតាក្នុងរដូវប្រាំង បានកាត់បន្ថយសន្ទុះលក់ ខណៈចូលដល់ត្រីមាសទី៣ ជម្លោះព្រំដែនថៃ-កម្ពុជាបានផ្ទុះឡើង ដែលបង្កការរំខានដល់ពាណិជ្ជកម្មឆ្លងដែនថៃ។ ផលិតផលដែលពឹងផ្អែកលើទីផ្សារ CLMV ជាពិសេសកម្ពុជា និងមីយ៉ាន់ម៉ា បានបន្តចុះខ្សោយ ខណៈការនាំចេញទៅអន្តរជាតិផ្សេងៗ ត្រូវរងផលប៉ះពាល់ពីភាពមិននឹងននៃសេដ្ឋកិច្ចសកល និងបម្រែបម្រួលអត្រាប្តូរប្រាក់។

ក្រុមហ៊ុនផលិត និងចែកចាយទឹកផ្លែឈើ Malee Group បានកត់ត្រានូវកំណើនប្រាក់ចំណេញសុទ្ធ ២,១% ដល់ ៦១,៩ លានបាត។ យ៉ាងណាមិញ ប្រាក់ចំណេញសុទ្ធរបស់ក្រុមហ៊ុនក្នុងរយៈពេល ៩ ខែដើមឆ្នាំ ២០២៥ បានធ្លាក់ចុះរហូតដល់ទៅ ១៥,៨% មកត្រឹមប្រមាណ ២៣៩,៣ លានបាត ខណៈប្រាក់ចំណូលសរុបក្នុងរយៈពេលដូចគ្នា មានប្រមាណ ៥,៨៥ ប៊ីលានបាត ដោយធ្លាក់ចុះ ៩,៣%។ ការធ្លាក់ចុះទាំងនេះ រួមចំណែកដោយភាពតានតឹងកម្ពុជា-ថៃ ដែលបង្កការរំខានដល់ពាណិជ្ជកម្មរវាងប្រទេសទាំង២ ក្រោយការបិទព្រំដែនជាឯកតោភាគីរបស់ថៃ។

ក្រុមហ៊ុន Carabao Group ដែលជាក្រុមហ៊ុនថៃល្បីនៅកម្ពុជាមួយទៀត បានកត់ត្រាប្រាក់ចំណូលប្រមាណ ៥,៤៩ ប៊ីលានបាត ដោយកើនឡើង ៨% នៅត្រីមាសទី៣។ ប៉ុន្តែក្នុងនោះ ប្រាក់ចំណេញសុទ្ធ បានធ្លាក់ចុះរហូតដល់ទៅ ២០% មកត្រឹមប្រមាណ ៦១៦ លានបាត។

ការណ៍គួរឱ្យកត់សម្គាល់នោះ គឺថា ការលក់លើទីផ្សារនៅត្រីមាសទី៣ របស់ក្រុមហ៊ុន Carabao បានធ្លាក់ចុះខ្លាំងប្រមាណ ៤២% ធៀបនឹងរយៈពេលដូចគ្នាឆ្នាំមុន មកត្រឹម ៧២៧ លានបាត។ ការលក់នៅទីផ្សារ CLMV ទាំងអស់សុទ្ធតែធ្លាក់ចុះ ដោយសារតែការរំខានពាណិជ្ជកម្មឆ្លងដែន ជាពិសេសជម្លោះប្រដាប់អាវុធព្រំដែនជាមួយកម្ពុជា។

ក្រុមហ៊ុនភេសជ្ជៈ Ichitan Group ឯណោះវិញ បានកត់ត្រាចំណូលពីការលក់ប្រមាណ ២,១ ប៊ីលានបាត នៅត្រីមាសទី៣ ដោយធ្លាក់ចុះ ០,៣% ប៉ុន្តែប្រាក់ចំណេញសុទ្ធបានកើនឡើងបន្តិច ០,៣% ដល់ជាង ៣៥០ លានបាត។ យ៉ាងណាមិញ ក្នុងរយៈពេល ៩ ខែដើមឆ្នាំ ក្រុមហ៊ុនដែលមានទីផ្សារសំខាន់នៅកម្ពុជាដដែល បានកត់ត្រាពីការធ្លាក់ចុះ ៨,១% នៃប្រាក់ចំណេញសុទ្ធ ដល់ប្រហែល ១ ប៊ីលានបាត ខណៈប្រាក់ចំណូលរបស់ក្រុមហ៊ុនក៏ធ្លាក់ចុះ ៦,៧% ដល់ប្រមាណ ៦,១៤ ប៊ីលានបាត។

ក្រុមហ៊ុនភេសជ្ជៈថៃធំៗផ្សេងៗទៀត ក៏បានរាយការណ៍ពីប្រាក់ចំណូល និងចំណេញសុទ្ធធ្លាក់ចុះយ៉ាងគំហុកផងដែរ ដូចជាក្រុមហ៊ុន Sappe, Thai Coconut, និង Osotspa ជាដើម។ ក្នុងត្រីមាសទី ៣ ប្រាក់ចំណេញសុទ្ធរបស់ Sappe បានធ្លាក់ចុះជិត ៤០% ខណៈប្រាក់ចំណេញរបស់ក្រុមហ៊ុន Thai Coconut ធ្លាក់ចុះជិត ៦០% ស្របពេលដែល Osotspa រាយការណ៍ពីកម្សោយនៃតម្រូវការនៅកម្ពុជា ឥណ្ឌូណេស៊ី និងមីយ៉ាន់ម៉ាជាដើម។

គួរគូសបញ្ជាក់ថា បញ្ហាព្រំដែនកម្ពុជា-ថៃ មិនត្រឹមតែបង្កការបិទព្រំដែន ដែលបង្កការរាំងស្ទះដល់ដំណឹកជញ្ជូនទំនិញច្រកដីគោកប៉ុណ្ណោះទេ ប៉ុន្តែវាក៏បង្ករលកពហិការលើទំនិញថៃពីក្នុងចំណោមអ្នកប្រើប្រាស់នៅកម្ពុជាផងដែរ។

កន្លងមក អាជីវកម្មថៃបានជំរុញឱ្យរដ្ឋាភិបាលរបស់ខ្លួនដោះស្រាយបញ្ហាជម្លោះជាមួយកម្ពុជាជាបន្ទាន់ ខណៈតួលេខពីរដ្ឋាភិបាលថៃបានបង្ហាញថា ថៃអាចខាតបង់សេដ្ឋកិច្ច ១០០ ប៊ីលានបាត ប្រសិនបើការបិទព្រំដែនបន្តអូសបន្លាយដល់ចុងឆ្នាំ ២០២៥៕