ព័ត៌មានអន្ដរជាតិ

តម្លៃប្រេងអន្តរជាតិធ្លាក់ចុះពេលបិទការជួញដូរ ដល់កម្រិតទាបបំផុតក្នុងរយៈពេល១ខែ

បានផុស

៥ ខែ មុន

នៅ

ថ្ងៃសៅរ៍ ២២ វិច្ឆិកា ២០២៥

ដោយ

តម្លៃប្រេងបានធ្លាក់ចុះប្រហែល ១% ពេលបិទការជួញដូរនៅថ្ងៃសុក្រ ដល់កម្រិតទាបបំផុតក្នុងរយៈពេល១ខែ ចំពេលដែលសហរដ្ឋអាមេរិកជំរុញឱ្យមានកិច្ចព្រមព្រៀងសន្តិភាពរុស្ស៊ី-អ៊ុយក្រែន ដែលអាចបង្កើនការផ្គត់ផ្គង់ប្រេងសកលបន្ថែមទៀត ចំពេលវិនិយោគិនបន្តឃ្លាំមើលពីភាពមិនប្រាកដប្រជាជុំវិញគោលនយោបាយអត្រការប្រាក់របស់ធនាគារកណ្ដាលសហព័ន្ធអាមេរិក។

តម្លៃប្រេងឆៅនាពេលអនាគត ម៉ាក Brent បានធ្លាក់ចុះ ៨២ សេន ឬ ១,៣% មកនៅត្រឹម ៦២,៥៦ ដុល្លារ/បារ៉ែល ខណៈប្រេងអាមេរិក West Texas Intermediate (WTI) បានធ្លាក់ចុះ ៩៤ សេន ឬ ១,៦% មកនៅត្រឹម ៥៨,០៦ ដុល្លារ/បារ៉ែល។

ក្នុងអត្រាប្រចាំសប្ដាហ៍ ប្រេងឆៅទាំង២ម៉ាក បានធ្លាក់ចុះប្រហែល ៣% សម្រាប់សប្តាហ៍នេះ និងជាការធ្លាក់ចុះទាបបំផុតចាប់តាំងពីថ្ងៃទី ២១ ខែតុលា។

ការធ្លាក់ចុះនេះ កើតឡើងនៅពេលដែលអាមេរិកជំរុញដំណោះស្រាយសន្តិភាពសម្រាប់ជម្លោះអ៊ុយក្រែន-រុស្ស៊ី ដែលបង្កើនក្ដីរំពឹងពីភាពស្រកស្រាន្តផ្នែកផ្គត់ផ្គង់ ចំពេលដែលលំហូរប្រេងលើទីផ្សារសកលមានច្រើនរួចស្រាប់ទៅហើយ ជាពិសេសពាក់ព័ន្ធនឹងការបង្កើនផលិតកម្មប្រេងរបស់ OPEC+ (អង្គការនៃប្រទេសនាំចេញប្រេងកាត និងសម្ព័ន្ធមិត្ត) ក្នុងបរិបទដែលតម្រូវការសកលនៅតែខ្សោយ។

ភាពរឹងមាំនៃប្រាក់ដុល្លារ ក៏រួមចំណែកធ្វើឱ្យប្រេងធ្លាក់ចុះថ្លៃផងដែរ។ អ្នកជំនាញលើកឡើងថា ប្រាក់ដុល្លារកាន់តែរឹងមាំ ធ្វើឱ្យប្រេងកាន់តែ«ថ្លៃ»សម្រាប់អ្នកទិញដែលប្រើប្រាស់រូបិយប័ណ្ណផ្សេងទៀត ដូច្នេះតម្រូវការធ្លាក់ចុះ។ ប្រាក់ដុល្លារកំពុងកើនឡើងដោយសារតែវិនិយោគិនជឿថា ធនាគារកណ្តាលសហព័ន្ធអាមេរិកប្រហែលមិនកាត់បន្ថយអត្រាការប្រាក់នៅខែធ្នូខាងមុខទេ៕