សេដ្ឋកិច្ច

តម្លៃគ្រាប់ស្វាយចន្ទីកម្ពុជា រំពឹងកើនឡើងជាង ១៧០០ ដុល្លារ មួយតោន

បានផុស

៧ ខែ មុន

នៅ

ថ្ងៃព្រហស្បតិ៍ ៤ ធ្នូ ២០២៥

ដោយ

ទីផ្សារតម្លៃគ្រាប់ស្វាយចន្ទីកម្ពុជារំពឹងកើនឡើងខ្ពស់ដល់ជាង ១ ៧០០ ដុល្លារ ក្នុងមួយតោនដោយសារចន្ទីសកលប្រឈមនឹងការផ្គត់ផ្គង់ បម្រែបម្រួលនយោបាយ អាកាសធាតុ និងពាណិជ្ជកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អួន ស៊ីឡុត ប្រធានសមាគមស្វាយចន្ទីកម្ពុជា ប្រាប់កម្ពុជាថ្មីថា តម្រូវការស្វាយចន្ទីរបស់ពិភពលោកមានការកើនឡើង ប៉ុន្តែអាកាសធាតុធ្វើឱ្យចន្ទីនៅតំបន់ដាំដុះ នៅអាហ្វ្រិកខាងលិច និងអាហ្វ្រិកខាងកើតធ្លាក់ទិន្នផល ដែលនឹងជំរុញឱ្យតម្លៃគ្រាប់ស្វាយចន្ទីកើនឡើង។

លោក អួន ស៊ីឡុត យល់ឃើញថា៖ «ធម្មតាតែកាលណា ទិន្នផលធ្លាក់ តម្រូវការច្រើន វាជាសញ្ញាវិជ្ជមានដល់តម្លៃស្វាយចន្ទី»។

តម្រូវការនៅចិនក៏ច្រើន នៅអឺរ៉ុបក៏ច្រើន ហើយនៅវៀតណាម អស់គ្រាប់ឆៅហើយ គាត់ចាប់ផ្ដើមសម្រុកទិញពីបណ្ដាប្រទេសអាហ្វ្រិកខាងលិច ប៉ុន្តែមិនទាន់ដល់រដូវប្រមូលផល ពោលគឺដល់តែប្រទេស តង់ហ្សានី ដែលធ្វើឱ្យតម្លៃហក់ឡើងដល់ ១៧៦០ ដុល្លារ ក្នុងមួយតោន។

លោក អួន ស៊ីឡុត បន្ថែមថា នេះជាសញ្ញាល្អសម្រាប់ចន្ទីកម្ពុជា ប៉ុន្តែយើងនៅបារម្ភអំពីអាកាសធាតុ ដែលអាចជះឥទ្ធិពលអវិជ្ជមានដល់ទិន្នផលនារដូវកាលឆ្នាំ ២០២៦ ខាងមុខ។

លោក អួន ស៊ីឡុត បញ្ជាក់ថា ការប្រែប្រួលអាកាសធាតុបង្កជាបញ្ហាប្រឈមដ៏ធំ ប៉ុន្តែកសិករបានត្រៀមខ្លះហើយសម្រាប់សម្របខ្លួន។

សមាគមបានធ្វើការស្រាវជ្រាវ លើការងារជាក់ស្តែង និងបានណែនាំនូវដំណោះស្រាយ ជីបាញ់តាមស្លឹកដែលមានតម្លៃសមរម្យ និងផលិតដោយខ្លួនឯង ដូចជា មីក្រូសរីរាង្គដែលមានប្រសិទ្ធភាពខ្ពស់(HEM) និងបាក់តេរីមីក្រូសរីរាង្គមូលដ្ឋាន Bacillus subtilis (IMOBs)។

វិធីសាស្រ្តទាំងនេះបាន ជំរុញទិន្នផលស្វាយចន្ទីបានជាង ១០ ភាគរយ ក្នុងរយៈពេល ៤ ឆ្នាំចុងក្រោយ ខណៈថ្លៃដើមផលិតក៏ត្រូវកាត់បន្ថយ។

យោងតាមក្រសួងពាណិជ្ជកម្ម កម្ពុជារកចំណូលបានជាង ៨០៧ លានដុល្លារ ពីការនាំចេញគ្រាប់ស្វាយចន្ទី នៅក្នុងរយៈពេល ១០ ខែ ឆ្នាំ ២០២៥ កើនឡើង ៦០,៩៣ ភាគរយ ធៀបនឹងរយៈពេលដូចគ្នានៅឆ្នាំ ២០២៤៕