សិប្បកម្ម លីម សេង ហ្វូត បង្កើនការផលិតសាច់ក្រក និងអាហារក្រៀម ផ្គត់ផ្គង់តម្រូវការស្បៀងជួយជនភៀសសឹក

សិប្បកម្ម លីម សេង ហ្វូត ដែលស្ថិតនៅខេត្តសៀមរាប បានដាក់ផែនការផលិតសាច់ក្រក និងអាហាក្រៀម ១០តោន ក្នុងមួយថ្ងៃ ខណៈតម្រូវការស្បៀងជួយជនភៀសសឹកកាន់តែច្រើនជាងមុន។

លោកស្រី ឡេង ដាលី ជាម្ចាស់សិប្បកម្ម លឹម សេង ហ្វូត ប្រាប់ កម្ពុជាថ្មី ថា ក្នុងរយៈពេលដែលប្រទេសកម្ពុជាជួបប្រទះ​នឹងការឈ្លានពានពីសំណាក់ប្រទេសថៃដែលនាំឱ្យមានការកើនឡើងនូវចំនួនជនភៀសសឹកផងនោះ សិប្បកម្មរបស់អ្នកស្រី ក៏បានដាក់ផែនការពង្រីកការផលិតសាច់ក្រក និងអាហារក្រៀមឱ្យបាន១០តោន ក្នុង១ថ្ងៃ ដើម្បីផ្គត់ផ្គង់ទៅកាន់អតិថិជនដែលមានតម្រូវការស្បៀងសម្រាប់ជួយទៅដល់ជនភៀសសឹក។

ម្ចាស់សិប្បកម្មរូបនេះ បានឱ្យដឹងទៀតថា បច្ចុប្បន្នសិប្បកម្មលោកស្រី ក៏បានទទួលជនភៀសសឹកប្រមាណជាង៣០នាក់ ដើម្បីឱ្យចូលធ្វើការក្នុងសិប្បកម្ម និងក៏បានផ្ដល់អាហារ៣ពេល រួមជាមួយថវិកាមួយចំនួនសម្រាប់ពួកគាត់គ្រាន់ដោះស្រាយជីវភាពប្រចាំថ្ងៃ ផងដែរ។

បើក្រឡេកទៅមើលពីដំណើរការផលិតសាច់ក្រក និងអាហារក្រៀម ក្នុងសិប្បកម្ម លីម សេង ហ្វូតវិញ បច្ចុប្បន្នសិប្បកម្ម អាចមានសមត្ថភាពផលិតសាច់ក្រកឆ្អិន និងប្រភេទសាច់ងៀតឆ្ងាញ់ប្រមាណជាង១០មុខ ដែលវត្ថុធាតុដើមសុទ្ធសឹងតែបានទិញមកពីកសិដ្ឋានក្នុងស្រុក និងបានជួយឱ្យកសិករចិញ្ចឹមត្រី កាន់តែមានទីផ្សារតាមរយៈការផ្គត់ផ្គង់ទិន្នផលមកកាន់សិប្បកម្មផ្ទាល់ ផងដែរ។

យ៉ាងណាមិញ ស្របពេលប្រទេសជាតិកំពុងជួបនឹងទុក្ខលំបាកដោយសារសង្រ្គាមឈ្លានពានពីសំណាក់ភាគីថៃ ក្នុងនាមលោកស្រី ជាម្ចាស់សិប្បកម្ម សូមស្នើចិត្តម្ចាស់សហគ្រាស សិប្បកម្ម និងអាជីវករទាំងអស់ សូមមេត្តាកុំលក់ដំឡើងថ្លៃរាល់មុខទំនិញ ដើម្បីចូលរួមជាមួយរាជរដ្ឋាភិបាលក្នុងគ្រាដ៏លំបាកមួយនេះ។

គួរឱ្យដឹងថា សិប្បកម្ម លីម សេង ហ្វូត របស់ លោកស្រី ឡេង ដាលី បានចូលរួមចំណែកតាមរយៈការជួយឱ្យពលរដ្ឋខ្មែរមានការងារធ្វើប្រមាណជាង ១៨០នាក់។ បច្ចុប្បន្ន សិប្បកម្មមានទីតាំងស្ថិតភូមិតាវៀន ឃុំសាលាកំរើក ស្រុកសៀមរាប ខេត្តសៀមរាប៕

អត្ថបទ ៖ សួស សិត