​Royal Railway ​នាំចូលក្បាលរថភ្លើង ​៣ គ្រឿង​ពីប្រទេសម៉ាឡេស៊ី​ បង្កើនសមត្ថភាពដឹកជញ្ជូន

ក្រុមហ៊ុន រ៉ូយ៉ាល់ រេលវេ ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនរ៉ូយ៉ាល់គ្រុប របស់អ្នកឧកញ៉ា គិត ម៉េង បាននាំចូលក្បាលម៉ាស៊ីនរថភ្លើង ៣គ្រឿងបន្ថែមទៀត ពីប្រទេសម៉ាឡេស៊ី​ដើម្បី​បង្កើន​សមត្ថភាពសេវាកម្មឱ្យកាន់តែល្អប្រសើរឡើង។ ក្បាលម៉ាស៊ីនទាំងនេះបានមកដល់ និងដាក់ចុះពីកា​ប៉ាល់នៅយប់ ថ្ងៃទី៣០ ខែធ្នូ ឆ្នាំ២០២៥នេះ។​

​ការនាំចូលបន្ថែមនូវក្បាលម៉ាស៊ីនទូរថភ្លើងទាំង ៣គ្រឿងនេះ​ នឹងជួយជាផ្នែកមួយយ៉ាងធំក្នុង​ការ​ជំរុញ​បន្ថែមនូវសមត្ថភាព​​សេវាកម្មរបស់ក្រុមហ៊ុម រ៉ូយ៉ាល់ រេលវេ ក្នុងការបំពេញតម្រូវ​ការសេវាកម្មផ្នែកដឹកជញ្ជូន និងសេវាកម្មអ្នកដំណើរ ដែលកំពុងកើនឡើង ក៏ដូចជាសម្រួលដល់ការដឹកជញ្ជូនទំនិញឱ្យកាន់តែរលូន និងមានប្រសិទ្ធភាពខ្ពស់​សម្រាប់អាជីវកម្មទូទាំងប្រទេស។

មុននឹងដាក់ឱ្យដំណើរការសេវាកម្ម ក្បាលម៉ាស៊ីន​ទាំងនេះចាំបាច់ត្រូវឆ្លងកាត់ការត្រួតពិនិត្យ យ៉ាងជាក់លាក់ និងល្អិតល្អន់ ទៅលើប្រព័ន្ធហ្រ្វាំង និងប្រព័ន្ធសុវត្ថិភាពផ្សេងៗ ដើម្បីធានាជូននូវសុវត្ថិភាព និងប្រសិទ្ធភាពមុននឹងបម្រើ​សេវាកម្មជូនដល់អតិថិជននៅថ្ងៃដដែល។

​ក្រុមហ៊ុន រ៉ូយ៉ាល់ រ៉េលវេ បានប្តេជ្ញាចិត្តក្នុងការបន្តផ្តល់នូវសេវាកម្មអោយកាន់តែល្អជូន​ដល់អតិថិជនទាំងអស់ និងចូលរួមចំណែកក្នុងការអភិវឌ្ឍន៍ហេដ្ឋារចនាសម្ព័ន្ធ និងសេដ្ឋកិច្ចរបស់ប្រទេសកម្ពុជា៕​