សេដ្ឋកិច្ច

កម្ពុជា-កូរ៉េ ចុះ MoU រួមគ្នាអភិវឌ្ឍន៍វិស័យទេសចរណ៍កម្ពុជាឱ្យកាន់តែរីកចម្រើន

បានផុស

៦ ខែ មុន

នៅ

ថ្ងៃព្រហស្បតិ៍ ២២ មករា ២០២៦

ដោយ

ក្រសួងទេសចរណ៍កម្ពុជា និងអង្គការ Go & Do Social Welfare Corporation របស់កូរ៉េ បានចុះអនុស្សរណៈនៃការយោគយល់គ្នា (MoU) កាលពីថ្ងៃទី២០ ខែមករា ដើម្បីរួមគ្នាអភិវឌ្ឍន៍វិស័យទេសចរណ៍កម្ពុជាឱ្យកាន់តែរីកចម្រើនបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីចុះអនុស្សរណៈនេះ ត្រូវបានធ្វើឡើងក្នុងឱកាស លោក ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតលោក Park Woo Hee ប្រធានអង្គការ Go & Do Social Welfare Corporation នៃសាធារណរដ្ឋកូរ៉េ និងសហការី ចូលជួបសម្តែងការគួរសម និងពិភាក្សាការងារលើកិច្ចសហប្រតិបត្តិការទេសចរណ៍កម្ពុជា-កូរ៉េ។

ក្នុងឱកាសនៃជំនួបប្រកបដោយផ្លែផ្កានេះ លោករដ្ឋមន្ត្រី ហួត ហាក់ បានឯកភាពលើសំណូមពររបស់លោកប្រធានអង្គការ ដែលបានផ្តួចផ្តើមគំនិតក្នុងការសហការជាមួយសាលាវិជ្ជាជីវៈទេសចរណ៍នៃក្រសួងទេសចរណ៍ ក្នុងការបង្កើតថ្នាក់បណ្តុះបណ្តាលមគ្គុទ្ទេសក៍និយាយភាសាកូរ៉េ ដើម្បីពង្រឹងសមត្ថភាពដល់អ្នកជំនាញមគ្គុទេ្ទសក៍ប្រើប្រាស់ភាសាកូរ៉េឱ្យបានស្ទាត់ជំនាញ និងទទួលបានជំនាញបដិសណ្ឋារកិច្ចក្នុងការទទួលស្វាគមន៍ជនជាតិកូរ៉េឱ្យកាន់តែល្អប្រសើរ។

លោករដ្ឋមន្ត្រី ក៏បានគាំទ្រ និងជំរុញបន្ថែមទៅប្រធានអង្គការក្នុងការផ្តល់ជំនួយបច្ចេកទេសដល់ប្រទេសកម្ពុជា សម្រាប់ជំនួយឧបត្ថម្ភរថយន្តសង្រ្គោះបន្ទាន់ និងរថយន្តពន្លត់អគ្គីភ័យ ក្នុងឆ្នាំ២០២៦ នេះ។

ជាមួយគ្នានេះ លោករដ្ឋមន្ត្រី ក៏បានស្នើដល់លោកប្រធានអង្គការ ជួយគាំទ្រ និងផ្តល់កិច្ចសហការ ពង្រឹងសមត្ថភាពមគ្គុទេ្ទសក៍និយាយភាសាកូរ៉េ និងបន្តទិសដៅអនុវត្តកិច្ចសហប្រតិបត្តិការនាពេលអនាគតឱ្យកាន់តែរឹងមាំ ដើម្បីទទួលបានលទ្ធផលជាវិជ្ជមានក្នុងការជំរុញកំណើនទេសចរណ៍ និងបង្កើនបទពិសោធល្អដល់ទេសចរជនជាតិកូរ៉េដែលបានអញ្ជើញមកទស្សនាប្រទេសកម្ពុជា៕