ព័ត៌មានអន្ដរជាតិ

តម្លៃទុរេនវៀតណាមហក់ឡើង មុនចូលឆ្នាំចិន-វៀតណាម

បានផុស

៥ ខែ មុន

នៅ

ថ្ងៃព្រហស្បតិ៍ ១២ កុម្ភៈ ២០២៦

ដោយ

តម្លៃផ្លែទុរេនវៀតណាមបានហក់ឡើង មុនចូលឆ្នាំចិន-វៀតណាម ដែលនឹងចាប់ផ្តើមនៅសប្តាហ៍ក្រោយ ដោយសារតែការផ្គត់ផ្គង់ពីតំបន់ដីសណ្តមេគង្គធ្លាក់ចុះ។ នេះបើតាមការចុះផ្សាយរបស់កាសែត VnExpress កាលពីពេលថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមពេលផ្សាយកាលពីថ្ងៃអាទិត្យ ពាណិជ្ជករទិញទុរេនគុណភាព A ប្រភេទ Monthong ក្នុងតម្លៃ ១៤០ ០០០ ដុន (៥,៤ ដុល្លារ)/គីឡូក្រាម ដែលជាតម្លៃខ្ពស់បំផុតក្នុងរយៈពេល ២ ឆ្នាំ។

ដោយឡែកទុរេនគុណភាពល្អ Ri6 វិញ ត្រូវបានលក់នៅតម្លៃ ៨០ ០០០ ដុង/គីឡូក្រាម ដោយកើនឡើង ៣០-៥០% ធៀបនឹងតម្លៃខែវិច្ឆិកា នៅពេលដែលរដូវប្រមូលផលធំត្រូវបិទបញ្ចប់។

ពាណិជ្ជករម្នាក់ក្នុងខេត្ត Dong Thap នៃតំបន់សណ្តមេគង្គ លោក ង្វៀន ថាញ់ (Nguyen Thanh) បាននិយាយថា លោកមិនអាចទិញផ្លែទុរេនបានច្រើនទេ ទោះបីជាលោកដំឡើងថ្លៃទិញក៏ដោយ។

គួរបញ្ជាក់ថា ចន្លោះពីខែវិច្ឆិកា ដល់ខែមីនា គឺជារដូវប្រមូលផលទុរេនខុសរដូវសម្រាប់តំបន់សណ្តទន្លេមេគង្គ ប៉ុន្តែការប្រមូលផលឆ្នាំនេះមានកម្រិតទាប។

កសិករម្នាក់ ឈ្មោះ Cuong ដែលមានចម្ការទុរេននៅខេត្ត Can Tho បាននិយាយថា លោកបានត្រៀមទុរេនរបស់លោកសម្រាប់រដូវចូលឆ្នាំកាលពីឆ្នាំមុន តែចុងក្រោយតម្លៃទុរេនធ្លាក់ចុះជាគំហុក ដែលនេះជាមូលហេតុដែលលោកបិទការប្រមូលផលឆ្នាំនេះដោយថែរដើមសម្រាប់ការប្រមូលផលនៅរដូវធំឆ្នាំក្រោយ។ ផ្ទុយទៅវិញ តម្លៃទុរេនបែរជាហក់ឡើងថ្លៃខ្ពស់ ហើយលោកគ្មានសល់ទុរេនក្នុងចម្ការសម្រាប់លក់។

ដោយឡែកកសិករម្នាក់ទៀត ឈ្មោះ Dien នៅខេត្ត Dong Thap បាននិយាយថា អ្នកដាំដុះជាច្រើនបានបោះបង់ចោលដើមទុរេនក្រៅរដូវនៅឆ្នាំនេះ ដោយសារអាកាសធាតុមិនទៀងទាត់ ដែលជាហេតុធ្វើឱ្យតម្លៃទុរេនហក់ឡើង ហើយទិន្នផលមានតិច។ ទិន្នផលរបស់លោកបានធ្លាក់ចុះ ៣០% ធៀបនឹងឆ្នាំមុន ប៉ុន្តែលោកអាចលក់ទុរេនដល់ទៅ ១៣០ ០០០ ដុង/គីឡូក្រាម។

បើតាមសមាគមផ្លែឈើ និងបន្លែវៀតណាម ចម្ការជាច្រើននៅតំបន់ដីសណ្តទន្លេត្រូវបានបំផ្លាញដោយទឹកជំនន់កាលពីប៉ុន្មានខែមុន ហើយកំពុងតែងើបឡើងវិញ។ តម្រូវការនាំចេញខ្ពស់ ក៏បានបន្ថែមទៅលើភាពតានតឹងនៃការផ្គត់ផ្គង់ផងដែរ។ យោងតាមទិន្នន័យគយ ការនាំចេញទុរេនវៀតណាម មានតម្លៃ ៣,៨៦ ប៊ីលានដុល្លារកាលពីឆ្នាំមុន ដោយកើនឡើង ២០% ធៀបនឹងឆ្នាំ ២០២៤៕