សេដ្ឋកិច្ច

ទំហំពាណិជ្ជកម្ម កម្ពុជា-អង់គ្លេស សម្រេចបានជិត $៩០ លាន នៅខែមករា

បានផុស

៥ ខែ មុន

នៅ

ថ្ងៃពុធ ១៨ កុម្ភៈ ២០២៦

ដោយ

ការដោះដូរពាណិជ្ជកម្មកម្ពុជា-អង់គ្លេស សម្រេចបាននូវទំហំទឹកប្រាក់ជាង ៨៩ លានដុល្លារ នៅក្នុងខែមករា ឆ្នាំ ២០២៦ ធ្លាក់ចុះ ៦,២% ធៀបនឹងរយៈពេលដូចគ្នា កាលពីឆ្នាំមុន។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា (GDCE)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមរបាយការណ៍ដដែល កម្ពុជាបាននាំចេញទៅអង់គ្លេសមានតម្លៃ ៨៤ លានដុល្លារ ធ្លាក់ចុះ ៧,៨% ខណៈអង់គ្លេសនាំចូលមកវិញមានតម្លៃ ៥,៥ លានដុល្លារ កើនឡើង ២៨,២%។

លោកស្រី ចម និម្មល រដ្ឋមន្ត្រីក្រសួងពាណិជ្ជមានប្រសាសន៍ថា កម្ពុជា និងអង់គ្លេស ប្តេជ្ញាពង្រឹងកិច្ចសហប្រតិបត្តិការ សេដ្ឋកិច្ច ការបង្កើតកាលានុវត្តភាពថ្មីៗសម្រាប់ធុរកិច្ច ជាពិសេសការធ្វើពាណិជ្ជកម្មដែលអាចព្យាករណ៍បាន និងផ្អែកលើច្បាប់ជាមូលដ្ឋានសម្រាប់កំណើន និងទំនុកចិត្តរបស់វិនិយោគិន។

កម្ពុជាបានជំរុញអនុវត្តអនុស្សរណៈនៃការយោគយល់គ្នាស្ដីពីវេទិកាពាណិជ្ជម្ម និងវិនិយោគ ដែលជាកាលនុវត្តភាព ដើម្បីលើកកម្ពស់សេដ្ឋកិច្ច សហប្រតិបត្តិការរវាងភាគីទាំងពីរ។

ការសម្រួលវិធានការដើមកំណើតទំនិញ ដែលធ្វើឱ្យកម្ពុជានាំចេញទំនិញបានច្រើនមុខទៅអង់គ្លេស បន្តការផ្ដល់អត្រាពន្ធសូន្យ សម្រាប់ទំនិញសម្លៀកបំពាក់ គ្រឿងអេឡិកត្រូនិក និងការលើកទឹកចិត្តអ្នកវិនិយោគអង់គ្លេសមកដាក់ទុននៅកម្ពុជា។

លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម-សេដ្ឋកិច្ច យល់ឃើញថា៖ «ពាណិជ្ជកម្មទ្វេភាគីកម្ពុជា-អង់គ្លេស មានលក្ខណៈល្អប្រសើរនៅឆ្នាំនេះ ដែលយើទទួលបានការអនុគ្រោះពន្ធពីអង់គ្លេស ពិសេសគឺការនាំចេញវិស័យវាយនភណ្ឌ កាត់ដេរ និងគ្រឿងបង្គុំអគ្គិសនី នាំចេញទៅអង់គ្លេសក្នុងអត្រាសូន្យភាគរយ»។

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ ទំហំពាណិជ្ជកម្មកម្ពុជា-អង់គ្លេស សម្រេចបានជាង ១,០៦ ពាន់លានដុល្លារ កើន ៥,៦៨% ក្នុងនោះ កម្ពុជានាំចេញទៅអង់គ្លេសប្រមាណ ១ ពាន់លានដុល្លារ កើនឡើង ៥,៨% ចំណែកអង់គ្លេសនាំចូលមកវិញមានទំហំទឹកប្រាក់ ៥៤ លានដុល្លារ កើនឡើង ២,១៧%៕

អត្ថបទ៖ ឡេង ដេត