សេដ្ឋកិច្ច

ស្វាយចន្ទីខេត្តកំពង់ធំ ត្រៀមចុះបញ្ជីម៉ាកទំនិញសម្គាល់ភូមិសាស្ត្រ នឹងបើកឱកាសទីផ្សារថ្មីៗ

បានផុស

៥ ខែ មុន

នៅ

ថ្ងៃព្រហស្បតិ៍ ១៩ កុម្ភៈ ២០២៦

ដោយ

រាជរដ្ឋាភិបាលកម្ពុជា កំពុងជំរុញការចុះបញ្ជីម៉ាកទំនិញសម្គាល់ភូមិសាស្ត្រ (GI) លើដំណាំស្វាយចន្ទី នៅខេត្តកំពង់ធំ ដែលនឹងបើកឱកាសទីផ្សារថ្មីៗ ពង្រឹងសមត្ថភាពប្រកួតប្រជែង និងបង្កើនប្រាក់ចំណូល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កសិករស្វាយចន្ទីក្នុងខេត្តកំពង់ធំនៅថ្ងៃទី ១៨ ខែកុម្ភៈ ឆ្នាំ ២០២៦ បានរៀបចំមហាសន្និបាតបង្កើតសមាគមម៉ាកសម្គាល់ភូមិសាស្ត្រទំនិញ (GI) «សមាគមអ្នកដាំស្វាយចន្ទីកំពង់ធំ» ដោយជោគជ័យ ដែលនេះជាសញ្ញានៃការបើកទំព័រថ្មីសម្រាប់ផលិតផលកសិកម្មតំណាងខេត្តមួយនេះ។

សមិទ្ធផលនេះអាចសម្រេចទៅបាន ក្រោមការគាំទ្រពីមូលនិធិអាកាសធាតុបៃតង (GCF) តាមរយៈគម្រោង PEARLដែលអនុវត្តដោយក្រសួងកសិកម្ម រុក្ខាប្រមាញ់ និងនេសាទ សហការជាមួយក្រសួងពាណិជ្ជកម្ម និងជំនួយបច្ចេកទេសពីអង្គការស្បៀងអាហារ និងកសិកម្មនៃសហប្រជាជាតិ (FAO)។

កសិករបានអនុម័តជាផ្លូវការលើលក្ខន្តិកៈ និងស្តង់ដារគុណភាពរបស់សមាគម បោះឆ្នោតជ្រើសរើសក្រុមថ្នាក់ដឹកនាំ និងបានបំពេញនីតិវិធីស្នើសុំចុះបញ្ជីទាំងសមាគមអ្នកផលិត និងចុះបញ្ជី «ស្វាយចន្ទីកំពង់ធំ» ជាផលិតផលម៉ាកសម្គាល់ភូមិសាស្ត្រទំនិញ។

លោក អួន ស៊ីឡុត ប្រធានសមាគមស្វាយចន្ទីកម្ពុជា មានប្រសាសន៍ថា ការចុះបញ្ជីម៉ាកទំនិញសម្គាល់ភូមិសាស្ត្រ (GI) មានគោលបំណងការពារតាមផ្លូវច្បាប់នូវអត្តសញ្ញាណ និងកេរ្តិ៍ឈ្មោះដ៏វិសេសវិសាលរបស់ស្វាយចន្ទីដែលដាំដុះនៅក្នុងខេត្តនេះ។

គំនិតផ្ដួចផ្ដើមនេះបានប្រមូលផ្ដុំកសិករ សហគមន៍ អ្នកកែច្នៃ និងស្ថាប័នរដ្ឋាភិបាល ក្នុងកិច្ចខិតខំប្រឹងប្រែងសម្របសម្រួលគ្នា ដើម្បីលើកកម្ពស់គុណភាពផលិតផល និងការទទួលស្គាល់នៅលើទីផ្សារ។

តាមរយៈការធ្វើពិពិធកម្មផលិតផលស្វាយចន្ទី និងការលើកកម្ពស់ការកសាងម៉ាកយីហោតាមរយៈការទទួលស្គាល់ GI ភាគីពាក់ព័ន្ធមានគោលដៅកំណត់ទីតាំងខេត្តកំពង់ធំ ជាប្រភពនៃគ្រាប់ស្វាយចន្ទីដែលមានគុណភាពខ្ពស់ លំដាប់ថ្នាក់ខ្ពស់ (Premium)។

សមិទ្ធផលនេះគឺជាសញ្ញានៃសន្ទុះកើនឡើងសម្រាប់ខ្សែច្រវាក់តម្លៃកសិកម្មរបស់កម្ពុជា និងអនាគតកាន់តែរឹងមាំសម្រាប់សហគមន៍កសិករស្វាយចន្ទីនៅទូទាំងខេត្តកំពង់ធំ។

គិតមកទល់ពេលនេះ កម្ពុជាមាន ផលិតផលចុះបញ្ជីម៉ាកសម្គាល់ភូមិសាស្រ្តទំនិញចំនួន៨មុខ រួមមាន ម្រេចកំពត ក្រូចថ្លុងកោះទ្រង់ ស្ករត្នោតកំពង់ស្ពឺ ទឹកឃ្មុំព្រៃមណ្ឌលគិរី អំបិល និងផ្កាអំបិលកំពត បង្កងតាកែវ ទឹកត្រីកំពតកែប និងប្រហុកសៀមរាប។

ម៉ាកសម្គាល់ភូមិសាស្ត្រទំនិញ ជាឧបករណ៍កម្មសិទ្ធិបញ្ញា ដើរតួនាទីសំខាន់ក្នុងការលើកកម្ពស់សហគ្រិនភាព ការអភិវឌ្ឍសហគមន៍កសិកម្ម បង្កើនចំណូលរបស់សហគមន៍ បង្កើតភាពប្រកួតប្រជែង និងតម្លៃបន្ថែមផ្នែកពាណិជ្ជកម្ម ក្នុងការអភិវឌ្ឍសេដ្ឋកិច្ច៕

អត្ថបទ៖ ឡេង ដេត