អាមេរិកគ្រោងកាត់ពន្ធលើឥណ្ឌាមកត្រឹម ១៨% ក្រោយឥណ្ឌាព្រមឈប់ទិញប្រេងរុស្ស៊ី

ប្រធានាធិបតីសហរដ្ឋអាមេរិក លោក ដូណាល់ ត្រាំ បាន​ប្រកាសកាលពីថ្ងៃចន្ទអំពីកិច្ចព្រមព្រៀងពាណិជ្ជកម្ម​ជាមួយ​ឥណ្ឌា ដោយទម្លាក់ពន្ធលើប្រទេសនេះពី ៥០% មកត្រឹម ១៨% ដើម្បីជាថ្នូរនឹង​ការយល់ព្រម​របស់​រដ្ឋាភិបាលក្រុង​ញូវដេលី ​ក្នុងការ​ឈប់ទិញប្រេងពីរុស្ស៊ី និងទម្លាក់ចោលរបាំងពាណិជ្ជកម្ម​សម្រាប់ទំនិញអាមេរិក​។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។ ​

ការប្រកាសរបស់លោក ត្រាំ ធ្វើឡើងក្រោយពីលោក​បាន​និយាយទូរស័ព្ទជាមួយ​នាយករដ្ឋមន្រ្តីឥណ្ឌា លោក ណារិនដ្រា មូឌី។

លោក ត្រាំ និយាយថា ឥឡូវនេះឥណ្ឌានឹង​ទិញប្រេងពីអាមេរិក ឬអាចទិញពីវេណេហ្ស៊ុយអេឡា ​ហើយលើសពីនោះ លោក មូឌី បានប្ដេជ្ញាថា ​ឥណ្ឌានឹង​បង្កើនការទិញផលិតផលអាមេរិក​ រួមទាំងថាមពលដូចជាធ្យូងថ្ម ​បច្ចេកវិទ្យា ទំនិញកសិកម្ម និងរបស់របរផ្សេងៗទៀត ក្នុងតម្លៃសរុប​ជាង ៥០០ ​ប៊ីលានដុល្លារ។

លោកបន្តយ៉ាងដូច្នេះថា៖ «​ពួកគេ​ក៏នឹង​​កាត់បន្ថយ​របាំង​ពន្ធគយ និង​របាំង​មិនមែន​ពន្ធគយ​​ប្រឆាំង​អាមេរិក​មក​ត្រឹម​សូន្យ​ផងដែរ»។ ​

ដោយឡែក លោក មូឌី ឯណោះវិញ បាន​ថ្លែងនៅលើបណ្ដាញសង្គម X ថា៖ «ថ្ងៃនេះពិតជាអស្ចារ្យណាស់ ដែលខ្ញុំបាន​សន្ទនា​ជាមួយមិត្តជាទីស្រឡាញ់របស់ខ្ញុំ គឺលោកប្រធានាធិបតី ត្រាំ។ ខ្ញុំរីករាយណាស់ដែលផលិតផល «ផលិតនៅឥណ្ឌា​» ​ឥឡូវនេះ នឹង​ទទួលបាន​ការបន្ថយពន្ធមកត្រឹម ១៨%»។ ​

ចំណែកឯរដ្ឋមន្ត្រីពាណិជ្ជកម្មឥណ្ឌា លោក Piyush Goyal បាននិយាយថា កិច្ចព្រមព្រៀង​អាមេរិក និងឥណ្ឌាថ្មី​នឹង​ទាញ​សេដ្ឋកិច្ចសហរដ្ឋអាមេរិក និងឥណ្ឌាឱ្យកាន់តែជិតស្និទ្ធគ្នា ដោយ «​បើកឱកាសដែលមិនធ្លាប់មានពីមុនមកសម្រាប់កសិករ សហគ្រាសធុនតូច និងមធ្យម សហគ្រិន និងកម្មករជំនាញ​ជាដើម»។

គួរគូសបញ្ជាក់ថា សហរដ្ឋអាមេរិក​បាន​សម្រេចចិត្តជាបន្តបន្ទាប់លើការដំឡើងពន្ធដល់ ៥០% លើទំនិញនាំចូលឥណ្ឌាកាលពីឆ្នាំមុន ដែលធ្វើឱ្យ​ទំនាក់ទំនងពាណិជ្ជកម្ម​នៃប្រទេសទាំង២តានតឹង។ អាមេរិកបាន​លើកហេតុផលថា ឥណ្ឌានៅ​តែ​បន្តទិញប្រេងពីរុស្ស៊ី ដែលរកចំណូលបាន​ពីការលក់ប្រេងដើម្បី «ចិញ្ចឹម» សង្រ្គាមនៅអ៊ុយក្រែន។ ឥណ្ឌាបាន​ច្រាន​ចោលហេតុផលនេះ ដោយនិយាយថា ខ្លួនធ្វើដើម្បីសន្ដិសុខថាមពលជាតិ ដែលមាន​ប្រជាជនរស់នៅ ១,៤ ប៊ីលាន​នាក់ ខណៈការទិញប្រេងពីរុស្ស៊ី ក៏រួមចំណែកដល់លំហូរទីផ្សារប្រេងសកលផងដែរ៕