ព័ត៌មានអន្ដរជាតិ

ចិន និងឥណ្ឌាជំរុញការទិញប្រេងឆៅ ខណៈការផ្គត់ផ្គង់លើសតម្រូវការសកលកើនឡើង

បានផុស

៨ ខែ មុន

នៅ

ថ្ងៃអង្គារ ១៨ វិច្ឆិកា ២០២៥

ដោយ

សារព័ត៌មាន Bloomberg បានរាយការណ៍កាលពីថ្ងៃចន្ទ ដោយស្រង់សម្ដីប្រភពពាណិជ្ជកម្មជាអនាមិកថា ប្រទេសចិន និងឥណ្ឌាកំពុងជំរុញការទិញប្រេងឆៅបន្ថែមទៀត ចំពេលដែលការផ្គត់ផ្គង់លើសតម្រូវការរបស់សកលកើនឡើង ដែលជាហេតុធ្វើឱ្យតម្លៃប្រេងចុះខ្សោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសនាំចូលប្រេងធំៗទាំង២នេះ ភាគច្រើនបានទិញប្រេងឆៅពីមជ្ឈិមបូព៌ាដោយទទួលបានការបញ្ចុះតម្លៃ។ ចិនបានទិញច្រើនជាងគេ ខណៈឥណ្ឌាបានបង្កើនការទិញរបស់ខ្លួនបន្តិចបន្តួចប៉ុណ្ណោះចាប់តាំងពីដើមខែមក។

ក្នុងខែវិច្ឆិកា ប្រេងសំខាន់ៗដែលចិន និងឥណ្ឌា បានទិញរួមមានប្រេងពីតំបន់ Upper Zakum របស់អារ៉ាប់រួម និងប្រេងឆៅគុយវ៉ែតជាដើម ខណៈក្រុមហ៊ុនចម្រាញ់ប្រេងឥណ្ឌា ក៏បានទិញប្រេងឆៅអាហ្វ្រិកខាងលិច និងប្រេងឆៅកាតាមួយចំនួនផងដែរ។

អ្នកជំនាញទីផ្សារលោក Manoj Heda មកពីក្រុមហ៊ុន Bharat Petroleum បាននិយាយថា ការផ្គត់ផ្គង់មានច្រើននៅក្នុងទីផ្សារ ប៉ុន្តែតម្រូវការខ្លាំងភាគច្រើនមកតែពីប្រទេសចិន និងឥណ្ឌា ប៉ុណ្ណោះ។

គួរគូសបញ្ជាក់ថា ចិន និងឥណ្ឌា គឺជាអតិថិជនប្រេងឆៅរបស់រុស្ស៊ីធំជាងគេ ប៉ុន្តែបច្ចុប្បន្នប្រទេសទាំង២រងគំនាបនៃទណ្ឌកម្មប្រេងរុស្ស៊ីរបស់អាមេរិក ដែលជាហេតុធ្វើឱ្យពួកគេងាកចេញពីរុស្ស៊ី។

យ៉ាងណាមិញ កាលពីខែមុន អ្នកទិញប្រេងរបស់ឥណ្ឌាបានបង្កើនការទិញប្រេងឆៅរបស់រុស្ស៊ី មុនពេលកញ្ចប់ទណ្ឌកម្មថ្មីរបស់អាមេរិកចូលជាធរមាន។ នេះបើតាមរបាយការណ៍របស់មជ្ឈមណ្ឌលស្រាវជ្រាវថាមពល និងខ្យល់ស្អាតនៅហ្វាំងឡង់៕