ពន្ធថ្មីរបស់ ត្រាំ ចូលជាធរមាន ប៉ុន្តែត្រឹម ១០%

ពន្ធគយថ្មីរបស់ប្រធានាធិបតី ដូណាល់ ត្រាំ បាន​ចូលជាធរមានកាលពីថ្ងៃអង្គារ (២៥ កុម្ភៈ) ប៉ុន្តែមាន​អត្រាត្រឹមតែ ១០% ប៉ុណ្ណោះ ដោយ​តិចជាង ១៥% ដែលលោកបាន​គំរាមដាក់កាលពីថ្ងៃសៅរ៍។ នេះបើតាមការចុះផ្សាយរបស់បណ្ដាញព័ត៌មាន​ BBC។

ពន្ធថ្មីនេះ ត្រូវបាន​ដាក់ចេញ ក្រោយតុលាការកំពូលអាមេរិក​កាលពីសប្ដាហ៍មុន បាន​សម្រេចថា ពន្ធបដិការរបស់លោក ត្រាំ ក្រោមច្បាប់អំណាចសេដ្ឋកិច្ចបន្ទាន់អន្តរជាតិ (IEEPA) ឆ្នាំ ១៩៧៧ គឺខុសច្បាប់ និងត្រូវដកចេញភ្លាមៗ។

​ក្រោមមក​ លោក ត្រាំ ដែលប្រឆាំង​ខ្លាំងៗនឹង​ការសម្រេចចិត្តរបស់តុលាការនោះ បានប្រកាសពន្ធថ្មីក្នុងអត្រា ១០% ​និងចុងក្រោយ​ដំឡើងដល់ ១៥% ដោយ​ប្រើប្រាស់ច្បាប់​ពាណិជ្ជកម្មឆ្នាំ ១៩៧៤ ដែលអនុញ្ញាតឱ្យប្រធានាធិបតីដាក់ពន្ធរយៈពេល ១៥០ ថ្ងៃ បើផុតពីនោះ ត្រូវសុំការអនុម័តពីសភា។

យ៉ាងណាមិញ ពន្ធថ្មីដែលចូលជាធរមាន​នៅថ្ងៃអង្គារ មាន​ត្រឹមតែ ១០% ប៉ុណ្ណេះ ដោយមកទល់ពេលនេះ មិនទាន់មាន​បទបញ្ជាឱ្យចេញលើសនេះនៅឡើយទេ។

ដោយឡែក​មន្ត្រីសេតវិមានម្នាក់ បាន​ប្រាប់ទីភ្នាក់ងារសារព័ត៌រ៉យទ័រថា សេតវិមានកំពុងធ្វើការដើម្បីធ្វើបច្ចុប្បន្នភាពអត្រាពន្ធដល់ ១៥% ដើម្បីឆ្លុះបញ្ចាំងពីការប្រកាសរបស់លោក ត្រាំ ​ប៉ុន្តែមិនបាន​បញ្ជាក់ថា អត្រានោះនឹង​ចូលជាធរមាន​នៅពេលណាទេ។

បញ្ហាពន្ធអាមេរិកចុងក្រោយ រួមទាំងការផ្លាស់ប្ដូរអត្រាពន្ធភ្លាមៗ កំពុងបង្កើតក្ដីបារម្ភសម្រាប់អាជីវកម្មសកល​ជុំវិញភាពមិនប្រាកដប្រជា ដោយអ្នកវិភាគខ្លះនិយាយថា ស្ថានភាពពាណិជ្ជកម្មធ្លាក់ចូលទៅក្នុងភាពចលាចលដូចឆ្នាំមុន ពោលគឺនៅពេលដែលលោក​ ត្រាំ ប្រកាសពន្ធបដិការឡើង។

យោងតាមទិន្នន័យពីភ្នាក់ងារគយ​អាមេរិក​ ពន្ធក្រោមច្បាប់ IEEPA ដែលរាប់បញ្ចូលទាំងពន្ធបដិការ បាន​ប្រមូលប្រាក់ជាង​ ១៣០ ប៊ីលាន​ដុល្លារ ដែលប្រាក់ទាំងនេះ ត្រូវសងត្រឡប់ទៅក្រុមហ៊ុននាំចូលវិញ៕