ព័ត៌មានអន្ដរជាតិ

មី MAMA ថៃ ធ្លាក់ចុះទាំងការលក់ ប្រាក់ចំណូល និងប្រាក់ចំណេញ ឆ្នាំមុន

បានផុស

៣ ខែ មុន

នៅ

ថ្ងៃព្រហស្បតិ៍ ២៦ កុម្ភៈ ២០២៦

ដោយ

ក្រុមហ៊ុនផលិតមី MAMA របស់ប្រទេសថៃ Thai President Foods Public Company Limited (TFMAMA) បានកត់ត្រាពីការធ្លាក់ចុះទាំងការលក់ ប្រាក់ចំណូល និងប្រាក់ចំណេញ កាលពីឆ្នាំមុន។ នេះបើតាមការចុះផ្សាយរបស់កាសែត The Nation នៅថ្ងៃព្រហស្បតិ៍ (២៦ កុម្ភៈ)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ស្ដីពីប្រាក់ចំណូលរបស់ក្រុមហ៊ុនប្រចាំឆ្នាំ ២០២៥ បានបង្ហាញថា ប្រាក់ចំណូលពីការលក់សរុបមានចំនួន ២៧,៦៤ ប៊ីលានបាត ដោយធ្លាក់ចុះ ១,៩៥ ប៊ីលានបាត ឬ ៦,៦១% បើធៀបនឹងឆ្នាំ ២០២៤។

ការលក់ទាំងអស់ពីអាជីវកម្មរបស់ TFMAMA ដែលរួមបញ្ជូលទាំងការលក់មីកញ្ចប់ MAMA បានធ្លាក់ចុះ ៥,៥៦% ដោយសារតែសម្ពាធពីបរិយាកាសប្រកួតប្រជែង និងលក្ខខណ្ឌទីផ្សារទាំងក្នុងស្រុក និងអន្តរជាតិ។

ជាមួយគ្នានោះ ប្រាក់ចំណេញសុទ្ធរបស់ក្រុមហ៊ុនបានធ្លាក់ចុះ ៧៧៤,១៩ លានបាត ឬ ១៧,២៧% មកត្រឹមប្រមាណ ៣,៧ ប៊ីលានបាត។

បញ្ហាអាជីវកម្មរបស់ TFMAMA បង្ហាញពីសម្ពាធនៃការចុះខ្សោយនៃការលក់នៅក្រៅប្រទេស ថ្លៃដើមវត្ថុធាតុដើមខ្ពស់ និងការប្រកួតប្រជែងក្នុងក្រុមផលិតផលមួយចំនួន។

ក្រុមហ៊ុនមិនបានបញ្ជាក់ថា តើផលប៉ះពាល់នៃការធ្វើពហិការនៅកម្ពុជា ដែលជាទីផ្សារលក់មី MAMA អន្តរជាតិដ៏សំខាន់មួយនោះ រួមចំណែកកម្រិតណាទេ ដល់ការធ្លាក់ចុះការលក់ ប្រាក់ចំណូល និងប្រាក់ចំណេញរបស់ក្រុមហ៊ុន។

យ៉ាងណាមិញ ចំណូលពីក្រៅប្រទេស ដែលរួមចំណែក ២០,៥១% នៃចំណូលសរុប បានធ្លាក់ចុះ ១៧,៤៩% ធៀបនឹងឆ្នាំ ២០២៤។ ការណ៍នេះ បណ្ដាលមកពីការចុះខ្សោយនៃការបញ្ជាទិញក្នុងតំបន់ជាច្រើន ដែលរួមចំណែកដោយកត្តាភូមិសាស្ត្រនយោបាយ ភាពប្រែប្រួលនៃបរិយាកាសសេដ្ឋកិច្ចពិភពលោក និងលក្ខខណ្ឌពាណិជ្ជកម្មអន្តរជាតិ៕