ថៃបិទការនាំចេញប្រេងដើម្បីការពារស្ដុកបម្រុង ក្នុងបរិបទ​ជម្លោះមជ្ឈិមបូព៌ា ​

រដ្ឋាភិបាលថៃកាលពីថ្ងៃអាទិត្យ (១ មីនា) បានប្រកាសបិទការនាំចេញប្រេង ដើម្បីការពារប្រេងបម្រុងទុកដែលអាចប្រើប្រាស់បាន​រយៈពេល ៦១ ថ្ងៃ ដោយសារតែក្ដីបារម្ភផ្នែកផ្គត់ផ្គង់ដែលបណ្ដាលមកពីជម្លោះរវាងសម្ព័ន្ធមិត្តអ៊ីស្រាអែល-សហរដ្ឋអាមេរិក និងអ៊ីរ៉ង់។ នេះបើតាមការចុះផ្សាយរបស់កាសែត The Nation កាលពីថ្ងៃអាទិត្យ។

ការបិទការនាំចេញប្រេងនេះ​ គឺជាផ្នែកមួយ​​នៃ «ផែនការថាមពលគ្រាអាសន្ន» របស់រដ្ឋាភិបាល​ថៃ ​ខណៈ​​ជម្លោះមជ្ឈិមបូព៌ា បាន​បង្កការបិទច្រកសមុទ្រ Hormuz ដែល​រួមចំណែកប្រមាណ ២០% នៃការផ្គត់ផ្គង់ប្រេងសកល។ បណ្ដាប្រទេសចេញពីតំបន់ឈូងសមុទ្រពែរ្សដូចជា​អារ៉ាប់រួម កាតា សាអ៊ូឌីអារ៉ាប៊ី និងគុយវ៉ែត ដែលនាំចេញប្រេងកាត់ច្រកនោះ គឺជាប្រភព​ផ្គត់ផ្គង់ប្រេងឆៅ និងឧស្ម័នធម្មជាតិពង្រាវ ដ៏សំខាន់សម្រាប់ប្រទេស​ថៃ​។ ​

អនុរដ្ឋលេខាធិការអចិន្ត្រៃយ៍នៃក្រសួងថាមពលថៃ លោក Veerapat Kiatfuengfoo បាន​និយាយថា ក្រសួងកំពុងតាមដានយ៉ាងដិតដល់នូវស្ថានភាពអ៊ីស្រាអែល-អ៊ីរ៉ង់ និងកំពុងត្រៀមខ្លួន​ចំពោះករណីបិទច្រក Hormuz ​ដោយ​រៀបចំងាកទៅរក​ប្រភព​ផ្គត់ផ្គង់ប្រេងឥន្ធនៈជំនួស។

លោក​គូសបញ្ជាក់ថា នៅពេលនេះ ជម្លោះមជ្ឈិមបូព៌ា​មិនទាន់​ប៉ះពាល់លើទុនបម្រុងប្រេង ឬតម្លៃនៅឡើយទេ ប៉ុន្តែរដ្ឋាភិបាល​ថៃត្រូវ​តែត្រៀម​ផែនការបន្ទាន់​។

ក្រសួងពាណិជ្ជកម្មថាមពល និងការិយាល័យគោលនយោបាយ និងផែនការថាមពលថៃ​ កំពុងពិនិត្យឡើងវិញនូវសន្តិសុខថាមពល ត្រួតពិនិត្យកម្រិតស្តុកប្រេង និងតាមដាននាវាដឹកប្រេងនាំចូលថៃ ដែលឆ្លងកាត់ច្រកសមុទ្រ Hormuz និងសមុទ្រក្រហម។

បើតាមលោក​ Veerapat ប្រទេសថៃមានប្រេងឆៅ និងប្រេងចម្រាញ់ចំនួន ៤,៩២ ​ប៊ីលានលីត្រនៅក្នុងស្ដុក​បម្រុងក្នុងស្រុក ដែលគ្រប់គ្រាន់ដើម្បីបំពេញតម្រូវការរយៈពេល ៣៨ ថ្ងៃ។ លើសពីនេះ ប្រេងឆៅចំនួន ១,៧៥ ​ប៊ីលានលីត្រ កំពុងតែដឹកចូលស្រុក (​ទាំង​​ក្នុង និងក្រៅច្រកសមុទ្រ Hormuz) បូករួមទាំងប្រេងឆៅចំនួន ១,១២ ​ប៊ីលានលីត្រទៀត ដែល​បាន​មក​ពីប្រភព​ក្រៅមជ្ឈិមបូព៌ាផ្សេងៗ​​។ ​ប្រេងទាំងនេះ អាច​​បំពេញតម្រូវការរយៈពេល ២៣ ថ្ងៃទៀត។

ជារួម​ ថៃមានការផ្គត់ផ្គង់ប្រេងប្រហែល ៦១ ថ្ងៃ​ ប្រសិនបើការផ្គត់ផ្គង់ពីខាងក្រៅ​ត្រូវបាន​កាត់ផ្ដាច់។

លោក Veerapat បាន​ថ្លែងយ៉ាងដូច្នេះថា៖ «លក្ខខណ្ឌសំខាន់បំផុតគឺថា ​ភាពតានតឹងមិនកើនឡើង ឬអូសប្រទេសដទៃចូលជម្លោះ​ ព្រោះវានឹងបង្កើនហានិភ័យដល់ស្ថិរភាពថាមពល និងសេដ្ឋកិច្ចពិភពលោកនាពេលអនាគត»៕