ព័ត៌មានអន្ដរជាតិ

ធនាគារ JPMorgan៖ តម្លៃប្រេងអាចហក់ឡើងដល់ ១២០ ដុល្លារ/បារ៉ែល

បានផុស

៤ ខែ មុន

នៅ

ថ្ងៃអង្គារ ៣ មីនា ២០២៦

ដោយ

ធនាគារវិនិយោគយក្សរបស់អាមេរិក JPMorgan Chase បានព្រមានថា តម្លៃប្រេងឆៅម៉ាក Brent អាចហក់ឡើងកប់ក្ដោងដល់ ១២០ ដុល្លារ/បារ៉ែល ប្រសិនបើវិសាលភាពនៃជម្លោះមជ្ឈិមបូព៌ា បង្កឱ្យមានការរំខានរយៈពេលយូរលើប្រេងដែលនាំចេញកាត់តាមច្រកសមុទ្រហ័រមូហ្ស (Hormuz)។ នេះបើតាមការចុះផ្សាយរបស់គេហទំព័រ OilPrice.Com កាលពីថ្ងៃចន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

JPMorgan បានប៉ាន់ប្រមាណថា បណ្ដាប្រទេសនៅឈូងសមុទ្រពែរ្សអាចរក្សាផលិតកម្មធម្មតាបានត្រឹមតែប្រហែល ២៥ ថ្ងៃប៉ុណ្ណោះ ប្រសិនបើច្រកហ័រមូហ្សត្រូវបិទទាំងស្រុង ដោយក្រោយពីនោះ ពួកគេនឹងអស់កន្លែងស្តុកប្រេង ដែលបង្ខំឱ្យមានការបិទផលិតកម្មទូទាំងតំបន់។

ពេលបើកការជួញដូរនៅថ្ងៃចន្ទ ពោលគឺចូលថ្ងៃទី៣នៃជម្លោះអ៊ីស្រាអែល-អ៊ីរ៉ង់ តម្លៃប្រេងឆៅនាពេលអនាគតម៉ាក Brent បានបើកការជួញដូរនៅតម្លៃ ៨៣,៣៧ ដុល្លារ/បារ៉ែល ដោយកើនឡើងប្រហែម ១៣% ដែលជាកម្រិតខ្ពស់បំផុតរាប់តាំងពីខែមករា ឆ្នាំ ២០២៥។ តម្លៃប្រេងដដែល បានបិទការជួញដូរនៅថ្ងៃចន្ទ ក្នុងតម្លៃ ៧៧,៧៤ ដុល្លារ/បារ៉ែល ដោយកើនឡើង ៤,៨៧ ដុល្លារ ធៀបនឹងតម្លៃបិទការជួញដូរកាលពីថ្ងៃសុក្រសប្ដាហ៍មុន។

គិតត្រឹមព្រឹកថ្ងៃអង្គារនេះ តម្លៃប្រេងនៅបន្តកើនឡើង ខណៈជម្លោះនៅតែបន្តតានតឹងខ្លាំង ដោយគេមិនទាន់ឃើញមានភាគីណាមួយសម្ដែងឆន្ទះក្នុងការចរចាជាផ្លែផ្កានោះទេ។

ទោះបីជាច្រកសមុទ្រហ័រមូហ្ស មិនទាន់ត្រូវបានបិទទាំងស្រុងជាផ្លូវការក៏ដោយ ប៉ុន្តែជម្លោះបានបង្កផលប៉ះពាល់ធ្ងន់ធ្ងររួចបាត់ទៅហើយ ដោយការធ្វើចរាចរណ៍របស់នាវាបានធ្លាក់ចុះប្រហែល ៧០% ដោយសារតែការព្រួយបារម្ភអំពីសុវត្ថិភាព ការលុបចោលការធានារ៉ាប់រង និងការផ្អាកប្រតិបត្តិការរបស់ក្រុមហ៊ុនដឹកជញ្ជូនធំៗ។

នាវាដឹកប្រេង និងឧស្ម័នធម្មជាតិរាវ (LNG) ប្រហែល ២០០ បានទម្លាក់យុថ្កាចុះ ឬប្តូរផ្លូវដើម្បីជៀសវាងច្រកសមុទ្រហ័រមូហ្ស។ ក្រុមហ៊ុនដឹកជញ្ជូនធំៗដូចជា Hapag-Lloyd និង CMA CGM បានផ្អាកការធ្វើដំណើរទាំងអស់ឆ្លងកាត់តំបន់នោះ ខណៈថ្លៃធានារ៉ាប់រងហានិភ័យសង្គ្រាម បានកើនឡើងរហូតដល់ ៥០% ដែលធ្វើឱ្យវាថ្លៃពេកសម្រាប់នាវាជាច្រើនឆ្លងកាត់។

គួរគូសបញ្ជាក់ថា ច្រកសមុទ្រហ័រមូហ្ស គឺជាផ្លូវប្រេងដ៏សំខាន់បំផុតមួយរបស់ពិភពលោក។ ជារៀងរាល់ថ្ងៃ ច្រកនេះរួមចំណែកដល់ការដឹកជញ្ជូនប្រេង និងផលិតផលប្រេងកាតប្រហែល ២០-២១ លានបារ៉ែល ឬ ប្រហែល ២០% នៃការប្រើប្រាស់ប្រេងប្រចាំថ្ងៃទូទាំងពិភពលោក និងជិត ៣០% នៃប្រេងទាំងអស់ដែលដឹកជញ្ជូនតាមសមុទ្រ៕