របរលក់ស្រាពាងធ្លាក់ជាង៥០ភាគរយ ខណៈអាជីវករថា លក់ដូរបានច្រើនតែថ្ងៃបុណ្យទាន

អាជីវករលក់ស្រាពាង បានឱ្យដឹងថា បច្ចុប្បន្នមុខរបរលក់ស្រាពាងហាក់មានការធ្លាក់ចុះជាង៥០ភាគរយ ខណៈលក់បានច្រើនគួរសមតែថ្ងៃបុណ្យទាន ពិសេសគឺពេលមានភ្ញៀវទេសចរដើរកម្សាន្ត។

កញ្ញា លី លីតា ជាអាជីវករលក់ស្រាពាង ស្ថិតនៅក្រុងបានលុង ខេត្តរតនគិរី ប្រាប់ កម្ពុជាថ្មី ថា មុខរបរលក់ស្រាពាងនេះ ក្រុមគ្រួសារបស់កញ្ញាបានបើកដំណើរតាំងពីឆ្នាំ២០០៥មកម្ល៉េះ។ សម្រាប់ពេលបច្ចុប្បន្ន មុខរបរមួយនេះ ហាក់ពុំសូវកាក់កបខ្លាំងដូចជាង១០ឆ្នាំមុន ដែលជំនាន់នោះសម្បូរអ្នកនិយមទទួលទានវា និងខ្លះទៀតចង់សាកល្បងភ្លក្សរសជាតិស្រាពាងរបស់ជនជាតិដើមភាគតិចផងដែរ។

អាជីវកខាងលើ បាន​បញ្ជាក់ដែរថា រយៈពេលប៉ុន្មានឆ្នាំចុងក្រោយនេះ មុខរបរបុរាណតពីជំនាន់ដូនតាមួយនេះ ភាគច្រើនអាចលក់ដាច់បានច្រើនតែថ្ងៃបុណ្យទាន ដូចជា៖ បុណ្យចូលឆ្នាំប្រពៃណីចិន បុណ្យចូលឆ្នាំខ្មែរ​ និងបុណ្យកាន់បិណ្ឌ និងភ្ជុំបិណ្ឌ ពិសេសនៅពេលមានវត្តមានភ្ញៀវទេសចរដើរកម្សាន្តច្រើនតែម្ដង។

ចំពោះថ្ងៃធម្មតា របរលក់ស្រាពាងនេះ អាចលក់បានត្រឹមតែចំនួន ៨ពាង ទៅ ១០ពាង តាមរយៈការកម្មុងអនឡាញរបស់អតិថិជនតាមបណ្ដាខេត្តក្រុងមួយចំនួនតែប៉ុណ្ណោះ។

កញ្ញា លី លីតា បានឱ្យដឹងទៀតដែរថា កត្តាដែលធ្វើឱ្យស្រាពាងពុំសូវលក់បានច្រើនដូចកាលពីមុនដោយសារតែបច្ចុប្បន្ននេះ គេសង្កេតឃើញថាសម្បូរទៅដោយអាជីវករលក់ដូរស្រាពាងស្ទើរតែគ្រប់ទិសទីតាមបណ្ដារមណីយដ្ឋាន និងតំបន់ទេសចរណ៍ជាច្រើនទៀតផង។

ទោះជាយ៉ាងណា កញ្ញា លី លីតា អះអាងថា ដ្បិតតែរបរនេះលែងសូវកាក់កបដូចមុន ប៉ុន្តែគ្រួសាររបស់កញ្ញានៅតែបន្តធ្វើវាដដែល ពីព្រោះថា មុខរបរមួយនេះក៏អាចចូលរួមចំណែកលើកស្ទួយសេដ្ឋកិច្ចគ្រួសារ និងបាន​បង្កប់នូវទំនៀមទម្លាប់ប្រពៃណីវប្បធម៌របស់ជនជាតិដើមភាគច្រើនបានរហូតមកដល់សព្វថ្ងៃនេះ។

គួរឱ្យដឹងថា បច្ចុប្បន្នមុខរបរលក់ស្រាពាង ត្រូវបានដាក់លក់ជាហូរហែលនៅតាមតំបន់រមណីយដ្ឋានផ្សេងៗក្នុងខេត្តរតនគិរី ក្នុងនោះមានដូចជា៖ បឹងយក្សឡោម បឹងកន្សែង និងតំបន់ទេសចរណ៍មួយចំនួនទៀតដែលស្ថិតនៅក្នុងភូមិសាស្រ្ដខេត្តរតនគិរី ផងដែរ៕

អត្ថបទ ៖​ សួស សិត