សេដ្ឋកិច្ច

កម្ពុជា ចាប់ផ្ដើមផ្ដល់ឥណទានបៃតង មានទំហំដើមទុនជាង ១០០ លានដុល្លារ

បានផុស

១៦ ម៉ោង មុន

នៅ

ថ្ងៃពុធ ១៧ មិថុនា ២០២៦

ដោយ

កម្ពុជាតាមរយៈធនាគារអភិវឌ្ឍន៍ជនបទ និងកសិកម្ម (ARDB) បានប្រកាសដាក់ឱ្យអនុវត្តនូវកម្មវិធីហិរញ្ញប្បទានអាកាសធាតុ (CCFF) ថ្នាក់ជាតិដំបូងគេនៅអាស៊ី សម្រាប់វិស័យឯកជន ជាមួយនឹងដើមទុន ១០៩ លានដុល្លារ ដើម្បីចូលរួមដោះស្រាយបញ្ហាការប្រែប្រួលអាកាសធាតុ និងកាត់បន្ថយការបំភាយឧស្ម័នផ្ទះកញ្ចក់ និងបង្កើនភាពធន់ទៅនឹងការប្រែប្រួលអាកាសធាតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសចាប់ផ្តើមហិរញ្ញប្បទានអាកាសធាតុត្រូវបានធ្វើឡើងនៅព្រឹកថ្ងៃទី ១៧ ខែមិថុនា ២០២៦ ដោយទទួលបានមូលនិធិគាំទ្រពីមូលនិធិអាកាសធាតុបៃតង (GCF) មានទំហំទឹកប្រាក់ប្រមាណ ១០៩ លានដុល្លារ ក្នុងនោះឥណទានចំនួន ៥០ លានដុល្លារ និងជំនួយបច្ចេកទេសចំនួន ៥ លានដុល្លារ ត្រូវបានផ្តល់ដោយមូលនិធិ GCF ហើយហិរញ្ញប្បទានចំនួន ៥៤ លានដុល្លារ បានផ្តល់ដោយដៃគូហិរញ្ញប្បទាននានា ដែលរួមទាំងក្រសួងសេដ្ឋកិច្ច និងហិរញ្ញវត្ថុ។

លោក កៅ ថាច អគ្គនាយកធនាគារ ARDB មានប្រសាសន៍ថា ការដាក់ឱ្យអនុវត្តកម្មវិធីហិរញ្ញប្បទានអាកាសធាតុ សំដៅលើកកម្ពស់ការអភិវឌ្ឍន៍សេដ្ឋកិច្ច និងអាជីវកម្មបៃតងនៅកម្ពុជា ដែលជាការបោះជំហានទៅតាមចក្ខុវិស័យរបស់រាជរដ្ឋាភិបាលដែលបានកំណត់នៅក្នុងយុទ្ធសាស្ត្របញ្ចកោណដំណាក់កាលទី១ និងចក្ខុវិស័យឆ្នាំ ២០៥០ របស់កម្ពុជា ដែលថាយើងនឹងធ្វើឱ្យមានអព្យាក្រឹតកាបូន។

លោក កៅ ថាច បន្ថែមថា៖ «នៅតំបន់អាស៊ីប៉ាស៊ីហ្វិចទាំងមូល មានតែកម្ពុជាទេ ដែលអាចចូលទៅយកថវិកាពីមូលនិធិគាំទ្រពីមូលនិធិអាកាសធាតុបៃតង (GCF) តាមរយៈធនាគារអភិវឌ្ឍន៍កូរ៉េ (KDB)»។

លោកយល់ឃើញថា ដំណើរការនៃការអភិវឌ្ឍន៍សេដ្ឋកិច្ច ចាប់ផ្ដើមផ្លាស់ប្ដូរទម្រង់ម្ដងបន្តិចៗ និងឈានទៅដល់ថ្ងៃណាមួយវាទៅរកសេដ្ឋកិច្ចបៃតងជាមិនខាន នៅថ្ងៃអនាគត ដោយសារតែវាមានបញ្ហាច្រើនដែលកើតឡើង ជាពិសេសពាក់ព័ន្ធនឹងការប្រែប្រួលអាកាសធាតុ។

លោក ឆេង គឹមស៊ុន រដ្ឋលេខាធិការ ក្រសួងបរិស្ថាន មានប្រសាសន៍ថា កម្មវិធីហិរញ្ញប្បទានអាកាសធាតុ (CCFF) ជាគំនិតផ្ដួចផ្ដើមជាយុទ្ធសាស្ត្រ និងជាការបោះជំហានមួយក្នុងកិច្ចខិតខំប្រឹងប្រែងរបស់រាជរដ្ឋាភិបាលក្នុងការកៀរគរប្រភពហិរញ្ញប្បទាន ដើម្បីឆ្លើយតបទៅនឹងការប្រែប្រួលអាកាសធាតុ។

កម្មវិធីហិរញ្ញប្បទានអាកាសធាតុ (CCFF) បង្កើតឡើងក្នុងគោលបំណងពង្រីកទំហំវិនិយោគលើវិស័យអាទិភាពនានា ដែលពាក់ព័ន្ធនឹងការប្រែប្រួលអាកាសធាតុ តាមរយៈការផ្ដល់ហិរញ្ញប្បទានសម្បទានរយៈពេលវែង និងទាក់ទាញការវិនិយោគបន្ថែមពីវិស័យឯកជន។

លោក រស់ សីលវ៉ា រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា ការដាក់ឱ្យដំណើរការកម្មវិធីហិរញ្ញប្បទានអាកាសធាតុ (CCFF) នៅថ្ងៃនេះ ស្ថិតក្នុងបរិបទសមស្រប និងមានសារសំខាន់ ខណៈពិភពលោកកំពុងប្រឈមនឹងការប្រែប្រួលយ៉ាងឆាប់រហ័ស នៃស្ថានភាពម៉ាក្រូសេដ្ឋកិច្ច ការប្រែប្រួលអាកាសធាតុ និងស្ថានភាពគោលនយោបាយពាណិជ្ជកម្មសកល៕