ឆមាសទី១ ឆ្នាំ២០២១៖ កម្ពុជាទទួលបានភ្ញៀវទេសចរក្នុងស្រុក​ជាង២លាននាក់ ថយជាង ៦០ ភាគរយ

គិតត្រឹមខែមិថុនា ឆ្នាំ២០២១នេះកម្ពុជាទទួលបានភ្ញៀវទេសចរក្នុងស្រុកសរុបជាង២លាននាក់ ថយចុះ៦២.៤៥ភាគរយ បើធៀបនឹងរយៈពេលដូចគ្នាក្នុងឆ្នាំ២០២០។

លោក  ថោង ខុន រដ្ឋមន្ត្រីក្រសួងទេសចរណ៍ បានឱ្យដឹងថា ក្រោយព្រឹត្តិការណ៍បិទខ្ទប់កាលពីក្នុងខែមេសាកន្លងទៅ ចលនាទេសចរក្នុងស្រុកបានងើបឡើងវិញ ទោះបីនៅទាបជាងរយៈពេលដូចគ្នាក្នុងឆ្នាំ២០២០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែងគិតត្រឹមខែមិថុនា ឆ្នាំ២០២១ កម្ពុជាទទួលបានភ្ញៀវទេសចរក្នុងស្រុកសរុបជាង ២ លាននាក់ ថយចុះ ៦២.៤៥% ធៀបនឹងរយៈពេលដូចគ្នាក្នុងឆ្នាំ២០២០កន្លងទៅ។

ថ្លែងក្នុងប្រជុំត្រួតពិនិត្យការអនុវត្តវិធានសុវត្ថិភាពទេសចរណ៍ ការបណ្តុះបណ្តាលតាមប្រព័ន្ធអនឡាញ និងការអភិវឌ្ឍផលិតផលទេសចរណ៍ថ្មីៗក្នុងបរិបទកូវីដ-១៩ តាមរយៈប្រព័ន្ធវីដេអូ កាលពីថ្ងៃទី៣០ ខែមិថុនា លោក រដ្ឋមន្ត្រី បានជំរុញឱ្យពង្រឹងការអនុវត្តវិធានសុវត្ថិភាពទេសចរណ៍ នៅតាមមូលដ្ឋានអាជីវកម្មសណ្ឋាគារ ផ្ទះសំណាក់ ភោជនីយដ្ឋាន រមណីយដ្ឋានទេសចរណ៍ សហគមន៍ទេសចរណ៍ ការីទេសចរណ៍ក្នុងស្រុក និងមធ្យោបាយដឹកជញ្ជូនទេសចរផ្លូវទឹក និងផ្លូវគោក នៅគ្រប់គោលដៅរាជធានីខេត្តទាំង២៥ សំដៅបង្កើនភាពរឹងមាំនៃទេសចរក្នុងស្រុក និងសម្រាប់ត្រៀមលក្ខណៈសម្បត្តិទទួលភ្ញៀវទេសចរអន្តរជាតិនាពេលខាងមុខ។

លោក រដ្ឋមន្ត្រីបានបញ្ជាក់ថា បច្ចុបន្ន ក្រសួងបានកត់សម្គាល់ថា មានការប្តូរនិន្នាការថ្មីៗឆ្ពោះទៅរកប្រភេទទេសចរណ៍បែបសហគមន៍ អេកូទេសចរណ៍ និងប្រភេទសេវាកម្មដែលប្រើប្រាស់បច្ចេកវិទ្យា ដែលក្នុងបរិការនេះ ការខិតខំគ្រប់គ្រងគោលដៅទេសចរណ៍ទាំងនេះ ប្រកបដោយសុវត្តិភាព និងគុណភាពស្របតាមស្តង់ដា ជាបញ្ហាសំខាន់បំផុត ជាអាទិស្តង់ដាសហគមន៍ទេសចរណ៍ ស្តង់ដាការធ្វើដំណើរផ្សងព្រេងតាមព្រៃភ្នំ ជាដើម។

ក្រសួងទេសចរណ៍ បានកំណត់លក្ខខណ្ឌបិទអាជីវកម្ម ឬព្យួរអាជ្ញាបណ្ណទេសចរណ៍ចំពោះអាជីវកម្មសេវាកម្មទេសចរណ៍ ដែលល្មើសនឹងវិធានការបង្ការមេរោគកូវីដ-១៩ ដូចជា លបលួចគ្រប់តាមមធ្យោបាយ ឬគ្រប់រូបភាពផ្សេងៗ ក្នុងការធ្វើអាជីវកម្មនៅក្នុងអំឡុងពេលរាជរដ្ឋាភិបាល ឬក្រសួងទេសចរណ៍សម្រេចឱ្យផ្អាកសកម្មភាព និងចំពោះសេវាកម្មទេសចរណ៍ទាំងឡាយណា ដែលមិនបានអនុវត្តតាមវិធានការសុវត្ថិភាពទេសចរណ៍ដូចជា៖ កត់ត្រាអត្តសញ្ញាណទេសចរដូចជាអាសយដ្ឋាន និងលេខទូរស័ព្ទទំនាក់ទំនង និងណែនាំដល់ភ្ញៀវទេសចរឱ្យចុះឈ្មោះបង្កើត និងប្រើប្រាស់ប្រព័ន្ធ QR Code«ទប់ស្កាត់កូវីដ-១៩» និងតម្រូវឱ្យភ្ញៀវទេសចរត្រូវតែស្កេនជាដាច់ខាតមុនចូលទៅក្នុងកន្លែងរបស់ខ្លួន ការត្រួតពិនិត្យកម្ដៅ ការបាញ់អាល់កុលសម្លាប់មេរោគ និងការតម្រូវឱ្យភ្ញៀវទេសចរត្រូវពាក់ម៉ាសលើកលែងនៅពេលបរិភោគអាហារនិងភេសជ្ជៈ និងរក្សាគម្លាតសុវត្ថិភាព ស្របតាមគោលការណ៍សុខាភិបាល ជាដើម៕ អត្ថបទ៖ សំអឿន