៨ខែកម្ពុជានាំចេញកសិផលបានជាង៥លាន៥សែនតោន កើនឡើងជាង ៨៩%

នៅក្នុងរយៈពេល៨ខែឆ្នាំ២០២១នេះ កម្ពុជាបាននាំចេញកសិផលទៅក្រៅប្រទេសសរុប ៥ ៥៤៤ ៨៩៤,៨៧ តោន ទៅកាន់ទិសដៅ ៦៦ ប្រទេសមានតម្លៃជាង៣ពាន់លានដុល្លារ កើនឡើងចំនួន ២ ៦២១ ៥៦៦,០៣ តោន ស្មើនឹង ៨៩,៦៨% បើធៀបនឹងរយៈពេលដូចគ្នាក្នុងឆ្នាំ២០២០ដែលមានត្រឹមតែ ២ ៩២៣ ៣២៨,៨៤តោនប៉ុណ្ណោះ។

លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបង្ហោះនៅលើហ្វេប៊ុកថា កសិផលសំខាន់ៗដែលបាននាំចេញមានដូចជាអង្ករនាំចេញមានចំនួន ៣៤៣ ៤៤៧តោន មានការថយចុះចំនួន ១០៤ ៧៥៦តោន ស្មើនឹង -២៣,៣៧% ការនាំចេញស្រូវមានចំនួន ២ ៣៨៣ ១៥០តោន កើនឡើងចំនួន ១ ១០១ ៤៣១តោន ស្មើនឹង៨៥,៩៣%។

ការនាំចេញកសិផលក្រៅពីស្រូវ-អង្ករមានចំនួន ៣ ៦៣៦ ៤៩៥,៣៥តោន កើនឡើងចំនួន ១ ១៦១ ៣៦៩,៥១តោន ស្មើនឹង ៤៦,៩២% ក្នុងនោះរួមមាន ចំណិតដំឡូងមីក្រៀមមានចំនួន ១ ២៨៣ ៩០៣,១២តោន កើនឡើងចំនួន ១២,១៧%។

ដំឡូងមីស្រស់មានចំនួន ៤៦៩ ៣០០តោន ថយចុះចំនួន -៤,៦៦% ម៉្សៅដំឡូងមីមានចំនួន ១៨ ៧០១,០៤តោន កើនឡើងចំនួន ៦,៣៦% កាកសំណល់ដំឡូងមីមានចំនួន ៥ ៦៦៣,៥០តោន ថយចុះចំនួន -៣៤,២៥% គ្រាប់ស្វាយចន្ទីមានចំនួន ៨៧៦ ៥២១,១៩តោន កើនឡើងចំនួន ៣៤០,៦១% គ្រាប់ពោតមានចំនួន ១៥២ ២០៤,១៩តោន ថយចុះចំនួន -២១,៣៨% គ្រាប់សណ្តែកបាយមានចំនួន ២៣ ២៣០តោន កើនឡើងចំនួន ៤៩៨,៧៧% គ្រាប់សណ្តែកសៀងមានចំនួន ១៩ ៨៨០,០៤តោន កើនឡើងចំនួន ១០០%  ផ្លែចេកស្រស់មានចំនួន ៣១០ ១៨៣,២៨តោន កើនឡើងចំនួន ៥៦,៧៩%។

ផ្លែស្វាយស្រស់មានចំនួន ១៦៣ ៨២៨,៥៥តោន កើនឡើងចំនួន ២៥១,០៣% ដំណាប់ស្វាយមានចំនួន ១៤ ០៨៧,២៨តោន កើនឡើងចំនួន ១៩៥,៩៥% ទឹកស៊ីរ៉ូស្វាយមានចំនួន ៤ ០៦៩,៦២តោន កើនឡើងចំនួន ៧៩,០៤% ដូងប្រេងមានចំនួន ៣៧ ៨៣៦,៦៩តោន កើនឡើងចំនួន ៤,៣២% ម្រេចមានចំនួន ២៤ ៨៤៧,៤៥តោន កើនឡើងចំនួន ៥៥១,៧៣% ថ្នាំជក់មានចំនួន ១ ៨៩៩,៧៥តោន ថយចុះចំនួន -៦២,១៨%។

ម្ទេសស្រស់មានចំនួន ៧១ ២៩៧,១២តោន កើនឡើងចំនួន ៤៣,៣៨% ម្ទេសក្រៀមមានចំនួន ១ ៣២០,២៣តោន ថយចុះចំនួន -១១,៩៨% និង ផលិតផលចំនួន ៧១មុខ ផ្សេងទៀតមានចំនួន ១២២ ៧៣៧,៣៣តោន។

លោក វេង សាខុន បានឱ្យដឹងទៀតថា ការប៉ាន់ស្មានតម្លៃក្នុងរយៈពេល៨ខែឆ្នាំ២០២១ ដែលទទួលបានពីការនាំចេញកសិផល មានចំនួន ៣ ២៣២ ៤៤៥ ៧៦៧ដុល្លារអាមេរិក ដែលក្នុងនោះការនាំចេញអង្ករមានចំនួន ២៩១ ៩២៩ ៩៥០ដុល្លារអាមេរិក ការនាំចេញស្រូវមានចំនួន ៣៩៣ ២១៩ ៧៥០ដុល្លារអាមេរិក និង ការនាំចេញកសិផលក្រៅពីស្រូវ-អង្ករមានចំនួន ២ ៥៤៧ ២៩៦ ០៦៧ដុល្លារអាមេរិក។

លោក​រដ្ឋមន្ត្រីបានបញ្ជាក់ថា ការនាំចេញកសិផលសរុបក្នុងរយៈពេល៨ខែឆ្នាំ២០២១ មានកំណើនចំនួន ៨៩,៦៨% ក្នុងនោះកសិផល ក្រៅពីអង្ករមានការកើនឡើងចំនួន ១១០,១៥% រីឯការនាំចេញអង្ករមានការថយចុះចំនួន -២៣,៣៧%៕

អត្ថបទ៖ សំអឿន