រាជរដ្ឋាភិបាល អនុម័តឱ្យដំណើរការ​រោងចក្របួន​លើទំហំទឹកប្រាក់ជាង ៨លានដុល្លារ

រាជរដ្ឋាភិបាល តាមរយៈក្រុមប្រឹក្សាអភិវឌ្ឍន៍កម្ពុជា CDC បានសម្រេចអនុម័តលើគម្រោងស្នើសុំបង្កើតរោងចក្រចំនួន៤ ក្នុងទំហំទឹកប្រាក់ប្រមាណជាង ៨លានដុល្លារ ដែលអាចបង្កើតការងារក្នុងស្រុកចំនួនជាង ៥០០នាក់។

គម្រោងបង្កើតរោងចក្រទាំងបួននេះរូមមាន៖

១- គម្រោងបង្កើតរោងចក្រផលិតខ្សែភ្លើង ខ្សែកាប និងរឡូ របស់ក្រុមហ៊ុន “Xiantong Wire and Cable Co., Ltd.” ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ, ខេត្តព្រះសីហនុ, មានទុនវិនិយោគចំនួន ៥លានដុល្លារអាមេរិក និងបង្កើតការងារបានចំនួនប្រមាណ ១៨០នាក់។

២- គម្រោងបង្កើតរោងចក្រផលិតសម្ភារៈវេចខ្ចប់ ក្រុមហ៊ុន “Neutralize (Cambodia) Industrial Co., Ltd.” ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ, ខេត្តព្រះសីហនុ, មានទុនវិនិយោគចំនួន ១លានដុល្លារអាមេរិក និងបង្កើតការងារបានចំនួនប្រមាណ ១០០នាក់។

៣- “Cambodian Longwan Light Industry Co., Ltd.” គម្រោងបង្កើតរោងចក្រផលិតកាបូប និងស្បែកជើង ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ, ខេត្តព្រះសីហនុ, មានទុនវិនិយោគចំនួន ១លានដុល្លារអាមេរិក និងបង្កើតការងារបានចំនួនប្រមាណ ១៨០នាក់។

៤- “LUUS KH CO., LTD.” គម្រោងបង្កើតរោងចក្រផលិត និងដំឡើងគ្រឿងបង្គុំ និងឧបករណ៍បរិក្ខារចម្អិនអាហារសម្រាប់ពាណិជ្ជកម្ម ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ, រាជធានីភ្នំពេញ, មានទុនវិនិយោគប្រមាណ ១,៤លានដុល្លារអាមេរិក និងបង្កើតការងារបានចំនួនប្រមាណ ៨០នាក់។

រាជរដ្ឋាភិបាល តែងតែបើកឱកាស និងផ្តល់សិទ្ធិដល់គម្រោងការបើករោងចក្រគ្រប់វិស័យ ដែលស្នើសុំបង្កើតស្របតាមច្បាប់របស់កម្ពុជា។ ការបង្កើតរោងចក្រ សហគ្រាស គឺជាផ្នែកមួយជួយជំរុញវិស័យសេដ្ឋកិច្ចជាតិ តាមរយៈបង្កើនចំណូលពន្ធ និងផ្តល់ការងារដល់ពលរដ្ឋក្នុងស្រុកផងដែរ៕