Connect with us

សេដ្ឋកិច្ច

ប្រកាសថ្មី តម្លៃប្រេងសាំងធម្មតា ៥២៥០រៀល ក្នុងមួយលីត្រ និងម៉ាស៊ូត ៥៦០០រៀល

បានផុស

នៅ

ក្រសួងពាណិជ្ជកម្ម បានប្រកាសថា តម្លៃប្រេងសាំងធម្មតា លក់ក្នុងមួយលីត្រ ៥២៥០រៀល និងប្រេងម៉ាស៊ូតតម្លៃ ៥៦០០រៀល ដោយអនុវ​ត្តចាប់ពីថ្ងៃទី ១១ ខែកក្កដា ឆ្នាំ ២០២២ ដល់ថ្ងៃទី ២០ ខែកក្កដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

 តម្លៃប្រេងឥន្ធនៈថ្មីនេះ បើធៀបនឹងតម្លៃកាលពីសប្តាហ៍មុន ប្រេងសាំងចុះថ្លៃចំនួន ៥៥០រៀល និងប្រេងម៉ាស៊ូត ចុះថ្លៃចំនួន ៦០០រៀល ពីតម្លៃដើម។

បច្ចុប្បន្ននេះប្រេងឥន្ធនៈដែលកម្ពុជាប្រើប្រាស់ នាំចូលពីប្រទេសសិង្ហបុរី ថៃ និងវៀតណាម។ អ្នកនាំពាក្យក្រសួង​ពាណិជ្ជកម្ម ធ្លាប់បានលើកឡើងថា តម្លៃប្រេងសាំងនៅកម្ពុជា ប្រែប្រួលទៅតាមទីផ្សារអន្តរជាតិ នៅពេលដែលទីផ្សារប្រេងអន្តរជាតិចុះថ្លៃ នោះប្រេងលក់នៅកម្ពុជា ក៏ចុះ​ថ្លៃដូចគ្នា ព្រោះប្រេងដែលកម្ពុជា ប្រើប្រាស់គឺនាំចូលពីបរទេស។

ក្រុមហ៊ុនលក់រាយនៅកម្ពុជា ដែលនាំចូលប្រេងសាំង មានដូចជា ក្រុមហ៊ុនតេលា សូគីម៉ិច ប៉ាប៉ា សាវីម៉ិច លឹមឡុង និងក្រុមហ៊ុនមួយចំនួនទៀត។ ចំណែកក្រុមហ៊ុនបរទេស ដែលនាំចូលប្រេងឥន្ធនៈមកស្រុកខ្មែរ រួមមាន ក្រុមហ៊ុនតូតាល់ កាល់តិច និងក្រុមហ៊ុនភីធីធី។ នេះបើតាមការបញ្ជាក់របស់លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម។

មន្រ្តីជាន់ខ្ពស់ក្រសួងពាណិជ្ជកម្ម បានលើកឡើងទៀតថា តម្លៃនៃការនាំចូលប្រេងឥន្ធនៈរយៈពេល៥ខែ ឆ្នាំនេះ បានកើនឡើងរហូតដល់ជាង៥០ភាគរយ គឺបណ្តាល​មកពីការហក់ឡើង​នៃតម្លៃប្រេង នៅលើទីផ្សារអន្តរជាតិជាលំដាប់ បន្ទាប់ពីផ្ទុះសង្រ្គាមរុស្ស៊ី និងអ៊ុយក្រែន។​ ក្នុងនោះ គិតជាតម្លៃថវិកាស្មើនឹង ៩៧១លានដុល្លារ កើនឡើង ៥៧.៣៦ភាគរយ។ តម្លៃនេះកើនឡើងចំនួន ៣៥៤លានដុល្លារ បើធៀបនឹងរយៈពេលដូចគ្នា កាលពីឆ្នាំ ២០២១។

សូមបញ្ជាក់ថា ក្រសួងពាណិជ្ជកម្ម ចេញតម្លៃលក់រាយរៀងរាល់ ១០ថ្ងៃម្តង ដើម្បីឆ្លើយតបឱ្យទាន់និន្នាការនៃការប្រែ​ប្រួលថ្លៃប្រេងឥន្ធនៈសកលលោក៕ ទួន សុផល

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម