កម្ពុជា នាំចេញទំនិញទៅអាមេរិក​ច្រើនជាងគេ បន្ទាប់មកវៀតណាម និងចិន

កម្ពុជានាំទំនិញទៅសហរដ្ឋអាមេរិកច្រើនជាងគេ បន្ទាប់មកគឺប្រទេសវៀតណាម និងចិន។

គិតត្រឹម៦ខែ ឆ្នាំ ២០២២ កម្ពុជា បាននាំចេញទំនិញទៅកាន់អាមេរិកទំហំទឹកប្រាក់ប្រមាណ ៤,៦ពាន់លានដុល្លារ ដោយក្នុងនោះទំហំពាណិជ្ជកម្មរវាងប្រទេសទាំងពីរមានប្រមាណ ៤,៨ពាន់លានដុល្លារ។

បន្ទាប់ពីអាមេរិក គឺប្រទេសវៀតណាម ដែលកម្ពុជានាំទំនិញទៅច្រើនក្នុងលំដាប់ទី២។ វៀតណាម បាននាំចូលទំនិញពីកម្ពុជា មានជាង ១,១ពាន់លានដុល្លារ ដោយក្នុងនោះទំហំពាណិជ្ជកម្មរវាង​ប្រទេសទាំងពីរមានប្រមាណ ៣,២ពាន់លានដុល្លារ។

ចំណែកចិន ឈរនៅប្រទេសលេខរៀងទី៣ ដែលកម្ពុជានាំទំនិញទៅច្រើន មានតម្លៃជាង ៦១១លានដុល្លារ ដោយក្នុងនោះទំហំ​ពាណិជ្ជកម្ម​រវាង​ប្រទេសទាំងពីរមានជិត ៦ពាន់លានដុល្លារ។
សូមបញ្ជាក់ថា រយៈពេល ៦ខែ ឆ្នាំ ២០២២ កម្ពុជាបាននាំចេញទំនិញក្នុងទំហំទឹកប្រាក់ជាង ១១ពាន់លានដុល្លារ កើនឡើងក្នុងអត្រា ៣៣,៩ភាគរយ បើធៀបនឹងរយៈពេលដូចគ្នាកាលពីឆ្នាំ​ ២០២១​ ដែលមានទឹកប្រាក់ប្រមាណ ៨ពាន់លានដុល្លារ។ នេះបើយោងតាមស្ថិតិជញ្ជីងពាណិជ្ជកម្មទំនិញរបស់អគ្គនាយកដ្ឋានគយ និងរដ្ឋាករកម្ពុ​ជា៕