អ្នកសេដ្ឋកិច្ច៖ ផែនការចំណាយកើនឡើង​ឆ្នាំ ២០២៣ ឆ្លុះបញ្ចាំងពីការអភិវឌ្ឍឆ្លើយតប​តម្រូវការសង្គម

សេចក្តីព្រាងច្បាប់ឆ្នាំ២០២៣ រាជរដ្ឋាភិបាល មានគម្រោងចំណាយថវិកាចំនួនចំនួន ៣៩ ២០៦ ២០៥ លានរៀល គិតជាប្រាក់ដុល្លារប្រហែល ៩.៦ពាន់លានដុល្លារ ស្មើនឹង ២៩.៨៧% នៃផលិតផលក្នុងស្រុកសរុប (ផសស) មានកំណើន១៣% ធៀបនឹងច្បាប់ឆ្នាំ២០២២។

សេចក្តីព្រាងច្បាប់នេះ ត្រូវបានកិច្ចប្រជុំពេញអង្គគណៈរដ្ឋមន្រ្តី ក្រោមអធិបតីភាព សម្តេចតេជោ ហ៊ុន សែន សម្រេចអនុម័តទាំងស្រុង កាលពីថ្ងៃទី២៨ ខែតុលា ឆ្នាំ២០២២។

ដោយឡែក សម្រាប់ផែនការប្រមូលចំណូល ក្នុងប្រទេសថវិការដ្ឋ ឬថវិកាជាតិ ត្រូវបានគ្រោងចំនួន ២៩ ៣១១ ៧៤៧លានរៀល គិតជាប្រាក់ដុល្លារប្រហែល ៧.២ពាន់លា​នដុល្លារ (មិនគិតបញ្ចូលចំណូលមូលធនថវិការដ្ឋ ដែលជាប្រាក់កម្ចី) ស្មើនឹង២២.៣៣% នៃ ផសស, មានកំណើន ១៤.៥% ធៀបនឹងច្បាប់ឆ្នាំ ២០២២។

គម្រោងចំណូល និងចំណាយក្នុងច្បាប់ថវិកាជាតិឆ្នាំ២០២៣ បង្ហាញថា កម្ពុជាមានឱនភាពថវិកាសរុប -៧,៥៤​ភាគរយ(ក្នុងរង្វង់ទឹកប្រាក់២ ៤០០លានដុល្លារ) នៃ ផសស។ បើតាមក្រសួងសេដ្ឋកិច្ច និងហិរញ្ញវត្ថុ តុល្យភាព​នៃចំណាយប្រចាំឆ្នាំនេះ នឹងបំពេញដោយ ហិរញ្ញប្បទានក្រៅប្រទេសក្នុងទំហំ ៤,៧ភាគរយ នៃផសស( ប្រមាណ ១ ៥០០លានដុល្លារ), មូលនិធិទ្រទ្រង់ថវិកាក្នុងទំហំ ០,៩៨ភាគរយ​ នៃផសស (ប្រមាណ៣០០លានដុល្លារ), ប្រាក់បញ្ញើរាជរដ្ឋាភិបាលមាន១,៨៦ភាគរយ នៃផសស (ប្រមាណ ៦០០លានដុល្លារ) និងការបោះផ្សាយមូលបត្ររដ្ឋ ក្នុងទំហំ​ទឹកប្រាក់ ២០០លានដុល្លារ ដើម្បីបំពេញតម្រូវការចំណាយ ទាំងចំណាយចរន្ត និងចំណាយ​វិនិយោគ​សាធារណៈ។​

ពាក់ព័ន្ធនឹងការចំណាយកើនឡើងសម្រាប់ឆ្នាំ ២០២៣ អ្នកសេដ្ឋកិច្ច្ បានលើកឡើងថា កម្ពុជា គឺជាប្រទេស​កំពុងអភិវឌ្ឍ ដែលមានតម្រូវការអភិវឌ្ឍកាន់តែធំ និងធ្វើឱ្យប្រសើរឡើងពីមួយឆ្នាំទៅមួយឆ្នាំ។

លោកបណ្ឌិត ហុង វណ្ណៈ អ្នក​ជំនាញ​សេដ្ឋកិច្ច​នៃ​វិទ្យាស្ថាន​ទំនាក់ទំនង​អន្តរជាតិ​នៃ​រាជ​បណ្ឌិត​សភា​កម្ពុជា បានលើកឡើងថា ការអភិវឌ្ឍ គឺចាំបាច់ត្រូវការទុនបន្ថែម ដើម្បីធ្វើការវិនិយោគឱ្យទាន់ពេលវេលា ឆ្លើយតប​នឹងតម្រូវការវិនិយោគិនបរទេស នៅក្នុងក្របខណ្ឌអន្តរជាតិ ក្រោមឆ័ត្រនៃកិច្ចព្រមព្រៀងពាណិជ្ជកម្មសេរី ឬច្បាប់វិនិយោគថ្មី ដែលកម្ពុជាមាន និងដើម្បីឆ្លើយតបការប្រកួតប្រជែងកម្រិតខ្ពស់ ជាមួយបណ្តាប្រទេសនៅក្នុងតំបន់ ប្រទេសជិតខាង និងពិភពលោកផងដែរ។

លោកបណ្ឌិត បានបន្តថា «កាលណាយើងមិនអភិវឌ្ឍ យើងមិនអាចទាក់ទាញវិនិយោគិន ទេសចរ ទាំងក្នុង និងក្រៅប្រទេស បានឡើយ។ យើងមិនអាចធ្វើឱ្យប្រសើរឡើងនូវតម្រូវការ របស់ប្រជាពលរដ្ឋក្នុងការប្រើប្រាស់ សេវាទាំងអស់ ដូចជា ផ្លូវថ្នល់ ភស្តភារកម្ម កំពង់ផែ អគារ សេវាកម្មផ្សេងៗ រួមទាំងច្បាប់ទម្លាប់​ក៏ត្រូវរៀប​ចំ​ឱ្យសុក្រឹត្យល្អប្រសើរ ឆ្លើយតបនឹងការវិវឌ្ឍប្រទេសជឿនលឿន ដើម្បីទាក់ទាញអ្នកវិនិយោគិនទាំងក្នុងប្រទេស និងក្រៅប្រទេស»។

លើសពីនេះទៀតលោកបណ្ឌិត ហុង វណ្ណៈ បានសង្កត់ធ្ងន់ថា ការកើនឡើងប្រចាំឆ្នាំនៃការចំណាយថវិកាជាតិនេះ គឺច្បាស់ណាស់ថា កម្ពុជា នឹងត្រូវប្រើកម្ចីពីបរទេសបន្ថែម។ ប៉ុន្តែទោះយ៉ាងណា ការកម្ចីថវិកាពីបរទេសប្រើប្រាស់​ឱ្យចំគោលដៅ នឹងជួយការងារកៀរគចំណូលរបស់កម្ពុជា ឱ្យកាន់តែប្រសើរឡើង មិនមែនខ្ចីគេយកមកប្រើហើយ ធ្វើឱ្យចំណូលកម្ពុជា កាន់តែថយចុះនោះទេ ពោលគឺដើម្បីវឌ្ឍនភាពនៃការអភិវឌ្ឍកាន់តែប្រសើរឡើង គឺកម្ពុជា ចាំបាច់ត្រូវតែខ្ចីថវិកាពីដៃគូអភិវឌ្ឍផ្សេងៗ យកមកអភិវឌ្ឍកម្ពុជា ដើម្បីឱ្យបានទាន់សភាពការណ៍។ នេះជាការបន្ថែមរបស់លោកបណ្ឌិត ហុង វណ្ណៈ។

ក្រសួងសេដ្ឋកិច្ច បានបញ្ជាក់ក្នុងសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣ថា ប្រភពចំណូល​ដើម្បីបំពេញតម្រូវការចំណាយទាំងនេះ គឺមានទាំងការចំណាយចរន្ត និងចំណាយវិនិយោគសាធារណៈ ជាពិសេស​សម្រាប់ការបន្តអនុវត្តកម្មវិធីស្តារ និងជំរុញកំណើនសេដ្ឋកិច្ចឡើងវិញក្នុងការបរិការណ៍ នៃការរស់នៅជាមួយ​នឹងជំងឺកូវីដ​-១៩ តាមគន្លងប្រក្រតីភាពថ្មី និងការត្រៀមដោះស្រាយថវិកាសម្រាប់អគ្គិសនីកម្ពុជា ដើម្បីធានាស្ថិរភាព​ថ្លៃអគ្គិសនីកុំ​ឱ្យកើនលើសកម្រិតថ្លៃកំពុងអនុវត្តបច្ចុប្បន្ន ជូនប្រជាពលរដ្ឋប្រើប្រាស់។

ថវិកាឆ្នាំ ២០២៣ ត្រូវបានគិតគូរផងដែរ ដល់ការធានាជោគជ័យនៃកិច្ចដំណើរការបោះឆ្នោតជ្រើស​តាំងតំណាង​រាស្ត្រនីតិកាលទី៧ និងការធ្វើជាម្ចាស់ផ្ទះរៀបចំការប្រកួតកីឡាអាស៊ីអាគ្នេយ៍ និងអាស៊ានប៉ារ៉ាហ្គេមឆ្នាំ២០២៣។ នេះបើតាមក្រសួងសេដ្ឋកិច្ច៕