សម្តេចតេជោ ៖ អាសិបមានសក្ដានុពលខ្ពស់​ក្នុងការជំរុញដោះស្រាយបញ្ហាប្រឈមធំៗ

អាសិប( RCEP) គឺជាយន្តការមួយយ៉ាងសំខាន់ និងជាយុទ្ធសាស្រ្ត ដែលបង្ហាញពីការប្តេជ្ញាចិត្តឥតងាករេ ក្នុងការ​ការពារប្រព័ន្ធពាណិជ្ជកម្មសេរីពហុភាគី ដែលផ្អែកលើគោលកការណ៍ច្បាប់ ការបន្តបើកចំហរសេដ្ឋកិច្ច និងរក្សា​បាននូវស្មារតីសហប្រតិបត្តិការរួម។ នេះជាការគូសបញ្ជាក់របស់សម្តេចតេជោ ហ៊ុន សែន នាយករដ្ឋមន្រ្តី នៅក្នុង​វេទិកាជាន់ខ្ពស់ស្តីពី គម្រប់ខួបអនុស្សាវរីយ៍១០ឆ្នាំ នៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) និង ការប្រកាសជាផ្លូវការនៃសៀវភៅទី២ របស់វិទ្យាស្ថានស្រាវជ្រាវសេដ្ឋកិច្ចអាស៊ាន និងអាស៊ីបូព៌ា(ERIA) ព្រឹកថ្ងៃទី ០២ ខែ វិច្ឆិកា ឆ្នាំ ២០២២។

សម្តេចតេជោ បានបន្ថែមថា អាសិបមានសក្ដានុពលខ្ពស់ ក្នុងការជំរុញដោះស្រាយនូវបញ្ហាប្រឈមធំៗ ដូចជា ការពង្រឹងច្រវាក់តម្លៃសកល ការពន្លឿនឌីជីថលរូបនីយកម្ម ការកាត់បន្ថយផលប៉ះពាល់ជាអវិជ្ជមាន​នៃការ​ប្រែប្រួល​អាកាសធាតុ និងការទប់ស្កាត់ការប្រឆាំងនឹងនិន្នាការសកលភាវូនីយកម្ម។ លើសពីនេះទៀត អាសិបក៏មាន​តួនាទីសំខាន់ក្នុងការចូលរួមចំណែករក្សាបាននូវវិបុលភាព និងស្ថិរភាពនយោបាយតំបន់ តាមរយៈការ​លើកកម្ពស់​តួនាទីគន្លឹះនៃការពង្រឹងសមាហរណកម្មសេដ្ឋកិច្ច និងការពង្រឹងយន្តការ​ស្ថាប័នដែលមាន​ស្រាប់ក្នុងការលើក​កម្ពស់កិច្ចសន្ទនាកម្រិតកំពូលផងដែរ។

សម្តេចមានប្រសាសន៍ទៀតថា ជិតបីឆ្នាំមកនេះ វិបត្តិកូវីដ-១៩ បានសបញ្ជាក់ថា សេដ្ឋកិច្ចអាស៊ីមានភាពធន់រឹងមាំ ដោយសារអាស៊ីជាមជ្ឈមណ្ឌលសេដ្ឋកិច្ច ពាណិជ្ជកម្ម និងនវានុវត្តន៍ដែលកំពូងតែលូតលាស់យ៉ាងរហ័ស ជាពិសេសតំបន់អាស៊ីបូព៌ាដែលមានសមាហរណកម្មស៊ីជម្រៅនៅក្នុងខ្សែច្រវាក់តម្លៃសកល និងជាចំណុច​តភ្ជាប់ដ៏សំខាន់សម្រាប់សេដ្ឋកិច្ចសកលលោក។

ការសិក្សាររបស់ស្ថាប័នអន្តរជាតិសំខាន់ៗ បានបង្ហាញថា ការអនុវត្តនូវអាសិបពេញលេញ នឹងបង្កើនទំហំពា​ណិជ្ជកម្មប្រមាណ ៤០ប៊ីលានដុល្លារ ធ្វើឱ្យប្រាក់ចំណូលពិត កើនឡើងរហូតដល់ ២,៥ភាគរយ បង្កើនសកម្មភាព​ពាណិជ្ជកម្មក្នុងចំណោមសមាជិកអាសិប ១២,៣ភាគរយ និងជួយលើកកម្ពស់ការរស់នៅរបស់ប្រជន ២៧លាននាក់​បន្ថែមទៀត ឱ្យចូលក្នុងក្រុមជនដែលមានជីវភាពរស់នៅកម្រិតមធ្យមសម្រាប់តំបន់អាសិបនៅឆ្នាំ ២០៣៥ ខណៈដែល​អាសិបត្រូវបានវាយតម្លៃថា នឹងបង្កើនប្រាក់ចំណូលសកលរហូតដល់ ២៦៣ប៊ីលានដុល្លារ។

ទន្ទឹមនឹងការសម្រេចបានសមិទ្ធផលជាច្រើននេះ សម្តេចតេជោ ហ៊ុន សែន ក៏បានវាយតម្លៃខ្ពស់ ចំពោះវិទ្យា​ស្ថានស្រាវជ្រាវសេដ្ឋកិចអាស៊ាន និងអាស៊ីបូព៌ាក្នុងការបន្តសិក្សាស្រាវជ្រាវលើកិច្ចព្រមព្រៀងអាសិប ជាពិសេសសម្រេចបាននូវការចងក្រងសៀវភៅទី២ ស្តីពីថាមវន្តនៃតំបន់អាស៊ីបូព៌ា និងកិច្ចព្រមព្រៀងអាសិប ក្របខណ្ឌសម្រាប់ធ្វើសមាហរណកម្មតំបន់។

សម្តេចសង្កត់ធ្ងន់ថា សៀវភៅនេះ នឹងក្លាយជាមូលដ្ឋានគ្រឹះដ៏សំខាន់ក្នុងការលើកកម្ពស់ការយល់ដឹង នៅក្នុងស្រទាប់​សាធារណជន និងវិស័យឯកជនឱ្យបានកាន់តែស៊ីជម្រៅ អំពីកាលានុវត្តភាពនៃកិច្ចព្រមព្រៀងអាសិប ដែលនឹងចូល​រួមចំណែកក្នុងការបង្កើនប្រសិទ្ធភាព និងលទ្ធភាពនៃការអនុវត្តកិច្ចព្រមព្រៀងនេះ៕