តាមការព្យាករណ៍ ឥណ្ឌា​ នឹងក្លាយជាប្រទេសមានសេដ្ឋកិច្ចធំបំផុតលំដាប់ទី ៣ លើលោក

យោងតាមការវិភាគរបស់ស្ថាប័នធំចំនួន ២ បានព្យាករណ៍ថា​ នៅឆ្នាំ ២០៣០​ ឥណ្ឌា​នឹងក្លាយទៅជាប្រទេសសេដ្ឋកិច្ច​ធំលំដាប់ទី ៣ លើសកលលោក បន្ទាប់ពីចិន ។

ស្ថាប័ន S&P Global របស់អាមេរិក​ បានព្យាករណ៍ថា កំណើនផលិតផលក្នុងស្រុករបស់សរុបឥណ្ឌា ដែលជាមធ្យម ៦.៣ ភាគរយ គឺនឹងបន្តរហូតដល់ឆ្នាំ ២០៣០ ខណៈដែលស្ថាប័ន Morgan Stanley រំពឹងថា GDP របស់ឥណ្ឌានឹងកើនឡើងច្រើនជាង ២ ដងពីកម្រិតបច្ចុប្បន្ននៅឆ្នាំ ២០៣១ ។

អ្នកវិភាគមកពីស្ថាប័ន Morgan Stanley បន្ថែមទៀតថា ប្រទេសឥណ្ឌាមានលក្ខខណ្ឌសមស្របសម្រាប់ការរីកចម្រើនសេដ្ឋកិច្ចដែលជំរុញដោយការនាំចេញ ការវិនិយោគលើការផលិត ការផ្លាស់ប្តូរថាមពល និងហេដ្ឋារចនាសម្ព័ន្ធឌីជីថលក្នុងកម្រិតខ្ពស់ ។  ដោយកត្តាទាំងនេះ នឹងជំរុញឲ្យឥណ្ឌាក្លាយជាប្រទេសមានសេដ្ឋកិច្ច និងទីផ្សារភាគហ៊ុនធំជាងគេទី ៣ របស់ពិភពលោក មុនពេលបញ្ចប់ទសវត្សនេះ ។

សេដ្ឋកិច្ចឥណ្ឌាមានកំណើនជាមធ្យម ៦.៣ ភាគរយក្នុងត្រីមាសខែកក្កដាដល់កញ្ញា ខណៈដែលខែមេសាដល់មិថុនា មានកំណើនដល់ ១៣.៥ ភាគរយក្នុងឆ្នាំ​ ២០២២ នេះ ។

ជាមួយគ្នានោះ S&P Global បន្តវិភាគថា សេដ្ឋកិច្ចឥណ្ឌានឹងបន្តកើនឡើងខ្ពស់ទៀត ដោយសារគោលនយោបាយពាណិជ្ជកម្ម និងសេរីភាវូបនីយកម្មហិរញ្ញវត្ថុ កំណែទម្រង់ទីផ្សារការងារ និងការវិនិយោគលើហេដ្ឋារចនាសម្ព័ន្ធ និងធនធានមនុស្សជាដើម ៕

ប្រែសម្រួលដោយ ៖ រតនៈ

ប្រភព ៖​ RT