អ្នកឧកញ៉ា គិត ម៉េង៖ ការសាងសង់ព្រលានយន្តហោះនៅកោះរ៉ុងមានការលំបាក និងចំណាយខ្ពស់ជាងលើគោកពី ២ ទៅ៣ដង

អ្នកឧកញ៉ា គិត ម៉េង ប្រធានក្រុមហ៊ុន រ៉ូយ៉ាល់ គ្រុប អភិវឌ្ឍន៍ កោះរ៉ុង មានប្រសាសន៍ថា ការសាងសង់អាកាសយានដ្ឋានអន្តរជាតិកោះរ៉ុង ខេត្តព្រះសីហនុនៅលើកោះមានការលំបាក និងចំណាយខ្ពស់ជាងការសាងសង់នៅលើគោកធម្មតា ពី ២ ទៅ៣ដង ដោយសារបញ្ហាដឹកជញ្ជូន។

អ្នកឧកញ៉ាលើកឡើងបែបនេះ នៅក្នុងពិធីចុះហត្ថលេខាទទួលស្គាល់តាមផែនការមេសម្រាប់ការសាងសង់ប្រលានអន្តរជាតិលំដាប់ 4C កោះរ៉ុង នៅថ្ងៃទី ១៨ ខែមករា ឆ្នាំ ២០២៣នេះ។

គម្រោងសាងសង់អាកាសយានដ្ឋានអន្តរជាតិកោះរ៉ុង ចំណាយ ៣០០ លានដុល្លារ ទទួលបានការជំរុញ និងគាំទ្រពីសំណាក់សម្តេចតេជោ ហ៊ុន សែន នាយករដ្ឋមន្ត្រីកម្ពុជាស្របទៅនឹងគោលនយោបាយសន្តិភាព និងការអភិវឌ្ឍរបស់សម្តេច។

ព្រលានយន្តហោះអេកូទេសចរណ៍អន្តរជាតិកោះរ៉ុងនេះ គ្រោងនឹងសាងសង់នៅពេលឆាប់ៗខាងមុខ ដោយត្រូវចំណាយពេលវេលា៥ឆ្នាំ។ អ្នកឧកញ៉ា គិត ម៉េង ប្ដេជ្ញាថានឹងសាងសង់ព្រលាននេះឱ្យសម្រេចបានរួចរាល់តាមផែនការមេ។

លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល បានថ្លែងថា អាកាសយានដ្ឋានដែលបំរុងនឹងធ្វើការសាងសង់លើកោះរ៉ុងនេះ ជាអាកាសយានដ្ឋានអន្តរជាតិថ្មីទី៤ ដែលបានធ្វើការវិនិយោគ ដោយមានការចូលរួមពីវិស័យឯកជន បន្ទាប់ពីអាកាសយានដ្ឋានអន្តរជាតិតារាសាគរ អាកាសយានដ្ឋានអន្តរជាតិសៀមរាប-អង្គរ និងអាកាសយានដ្ឋានអន្តរជាតិតេជោ។

បើតាមលោក ម៉ៅ ហាវណ្ណាល់ គម្រោងអភិវឌ្ឍនេះស្ថិតនៅក្នុងក្របខ័ណ្ឌនៃការវិនិយោគពហុបំណងរួម សម្រាប់ក្រុងកោះរ៉ុងទាំងមូល ដែលជាការវិនិយោគរបស់វិស័យឯកជន ស្រដៀងគ្នា នឹងការវិនិយោគរបស់ក្រុមហ៊ុនយ៉ូញៀន (UDG) នៅតំបន់តារាសាគរដែរ (ការវិនិយោគឯកជន ១០០% សម្រាប់ការអភិវឌ្ឍគម្រោងពហុបំណង)។

ម្យ៉ាងវិញទៀត គម្រោងនេះក៏មានសង្គតិភាពជាមួយនឹងចក្ខុវិស័យ ផែនការគោលនយោបាយ និងទិសដៅយុទ្ធសាស្ត្រអភិវឌ្ឍន៍របស់រាជរដ្ឋាភិបាលកម្ពុជា។

សូមរំឭកថា ក្រុមហ៊ុន រ៉ូយ៉ាល់ គ្រុប ខូអិលធីឌី បានបោះទុនធ្វើការ​វិនិយោគនូវទឹកប្រាក់រាប់សិបលានដុល្លារនៅលើតំបន់អភិវឌ្ឍន៍កោះរ៉ុង ក្រុងកោះរ៉ុង ខេត្តព្រះសីហនុ រួមមាន ផ្លូវក្រួសក្រហម ផ្លូវបេតុង សណ្ឋាគារលំដាប់ផ្កាយ ខ្សែកាប្លីអគ្គិសនីក្រោមបាតសមុទ្រ៕

អត្ថបទ៖ ឡេង ដេត