កម្ពុជា រកចំណូលពីវិស័យរ៉ែមាស តាមរយៈសួយសារអាករ និងពន្ធដារ បានប្រមាណ ១៥លានដុល្លារ នៅក្នុងឆ្នាំ ២០២២។ នេះបើតាមការបង្ហាញរបស់មន្រ្តីពាក់ព័ន្ធនៅក្នុងវេទិកាសាធារណៈស្តីពីការគ្រប់គ្រងម៉ាក្រូសេដ្ឋកិច្ច និងច្បាប់ថវិកាឆ្នាំ ២០២៣ កាលពីថ្ងៃទី ២៥ មករា។

ម​ន្រ្តីមួយរូប តំណាងអគ្គនាយកដ្ឋានរ៉ែ និងថាមពល ឆ្លើយសំណួរអ្នកសារព័ត៌មានតាមការចង្អុលបង្ហាញរបស់លោក វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុថា នៅក្នុងឆ្នាំ ២០២២ កម្ពុជា ទទួលបានការធ្វើអាជីវកម្មពីរ៉ែមាសប្រមាណ ៥,៣០០ គីឡូក្រាម(៥,៣តោន) ដោយទទួលបានថវិកា​ចូលរដ្ឋជាសួយសារអាករជាង ៨លានដុល្លារ។ ជាមួយគ្នានេះ តំណាងមន្រ្តីមកពីអគ្គនាយកដ្ឋានពន្ធដារ ក៏បានលើក​ឡើងដែរថា ពន្ធដារ ប្រមូលចំណូលពីវិស័យរ៉ែមាសនេះ បានចំនួន ៦.៥លានដុល្លារផងដែរ។

លោក វង្សី វិស្សុត បានសរុបថវិកាដែលរកបានពីវិស័យរ៉ែមាសរបស់ស្ថាប័នទាំងពីរ ចំនួន ១៥លានដុល្លារ សម្រាប់ឆ្នាំ ២០២២។

មន្រ្តីអគ្គនាយកដ្ឋានរ៉ែ និងថាមពល បានបញ្ជាក់ទៀតថា បច្ចុប្បន្ននេះ មានក្រុមហ៊ុនចំនួន៧ ដែលទទួលបាន​សិទ្ធិធ្វើ​អាជីវកម្ម នៅខេត្តចំនួន ៤ រួមមាន ខេត្តមណ្ឌលគិរី រតនគិរី បាត់ដំបង និងខេត្តព្រះវិហារ។ ប៉ុន្តែក្រុម​ហ៊ុនដែល​ធ្វើអាជីវ​កម្មដើរដោយរលូន និងទទួលបានផលិតផលច្រើនជាងគេនោះគឺក្រុមហ៊ុនរ៉ឺនេសង់ មីនើរ៉ល (ខេមបូឌា) លីមីធីត របស់អូស្ត្រាលី ដែលមានទីតាំងនៅខេត្តមណ្ឌលគិរី។ ដោយឡែកក្រុមហ៊ុនដទៃទៀត ដែលកំពុងធ្វើអាជីវកម្មដែរ តែទទួលបានសមិទ្ធផលតិចតួចប៉ុណ្ណោះ៕

​