ទំហំពាណិជ្ជកម្មរបស់ ចិន និងរុស្ស៊ី កើនឡើង ខណៈជាមួយ អាមេរិក មានការធ្លាក់ចុះ

រដ្ឋបាលគយចិនបាននិយាយថា ពាណិជ្ជកម្ម រុស្ស៊ី-ចិន ចាប់ពីខែមករាដល់ខែកក្កដា ឆ្នាំ ២០២៣ បានកើនឡើង ៣៦.៥ ភាគរយដល់តម្លៃ ១៣៤.១០៤ ពាន់លានដុល្លារ ។

តាមរយៈរបាយការណ៍នេះ ចិនបាននាំចេញទំនិញទៅកាន់រុស្ស៊ីមានតម្លៃ ៦២.៥ ពាន់លានដុល្លារ កើនឡើង ៧៣.៤ ភាគរយ បើប្រៀបធៀបនឹងរយៈពេលដូចគ្នាក្នុងឆ្នាំ ២០២២ ខណៈការដឹកជញ្ជូនពីរុស្ស៊ីទៅប្រទេសចិនវិញ បានកើនឡើង ១៥.១ ភាគរយដល់ ៧១.៥ ពាន់លានដុល្លារ ។

ដោយឡែកនៅក្នុងខែកក្កដា ពាណិជ្ជកម្មរវាងប្រទេសទាំងពីរមានតម្លៃជាង ១៩ ពាន់លានដុល្លារ ខណៈការផ្គត់ផ្គង់ទំនិញរបស់រុស្ស៊ីដល់ប្រទេសចិនមានតម្លៃជាង ៩ ពាន់លានដុល្លារ ស្របពេលដែលការផ្គត់ផ្គង់ទំនិញរបស់ចិនទៅកាន់រុស្ស៊ីវិញ មានតម្លៃជាង ១០ពាន់លានដុល្លារ ។

ផ្ទុយពីរុស្ស៊ី ពាណិជ្ជកម្មរវាងសហរដ្ឋអាមេរិក និងចិន ក្នុងខែមករាដល់ខែកក្កដា ឆ្នាំ ២០២៣ វិញ បានថយចុះ ១៥.៤ ភាគរយ មកនៅត្រឹម ៣៨១.៥១៤ ពាន់លានដុល្លារអាមេរិក ខណៈការនាំចេញពីចិនទៅអាមេរិកវិញ​ បានធ្លាក់ចុះ ១៨.៦ ភាគរយ មកត្រឹម ២៨១.៦៥៥ ពាន់លានដុល្លារ បើប្រៀបធៀបនឹងឆ្នាំមុន ស្របពេលការដឹកជញ្ជូនពីសហរដ្ឋអាមេរិកទៅប្រទេសចិនបានធ្លាក់ចុះ ៤.៧ ភាគរយ មកនៅជិត ១០០ ពាន់លានដុល្លារ ។

ដោយឡែកនៅក្នុងខែកក្កដា ពាណិជ្ជកម្មរវាងប្រទេសទាំងពីរមានចំនួន ៥៤.៣២២ ពាន់លានដុល្លារ ដែលអាមេរិក បានផ្គត់ផ្គង់ទំនិញដល់ចិនក្នុងតម្លៃ ១២ ពាន់លានដុល្លារ​​ ចំណែកចិនវិញបានផ្គត់ផ្គង់ទំនិញដល់អាមេរិកដែលមានតម្លៃ ៤២.៣១ ពាន់លានដុល្លារ ៕

ប្រែសម្រួល៖ នាង​​​​ រតនៈ

ប្រភព៖ Sputnik

ចុចអាន៖ ចិន ឲ្យ ហ្វីលីពីន អូសនាវាចម្បាំងដែលច្រែះចាប់ជំនាន់សង្គ្រាមលោកលើក ទី ២ ចេញពីដែនទឹកមានជម្លោះជាបន្ទាន់