តម្លៃសាច់ជ្រូកនៅ ចិន ធ្លាក់ចុះ មួយគីឡូក្រាមប្រហែល ៣ ដុល្លារ

យោងតាមទិន្នន័យផ្លូវការរបស់ចិនបានបង្ហាញថា តម្លៃសាច់ជ្រូករបស់ប្រទេសចិនបានធ្លាក់ចុះ ក្នុងអំឡុងថ្ងៃទី៤ ដល់ថ្ងៃទី ៨ ខែកញ្ញា ដោយសារកំណើននៃការផ្គត់ផ្គង់ ។

តម្លៃសាច់ជ្រូកជាមធ្យមក្នុងខេត្តចំនួន ១៦ ដែលតាមដានដោយក្រសួងកសិកម្ម និងកិច្ចការជនបទបានធ្លាក់មកនៅតម្លៃ ២១.៥ យ័ន​ ប្រហែល ៣ ដុល្លារអាមេរិកក្នុងមួយគីឡូក្រាម ដោយធ្លាក់ចុះ ២.៩ ភាគរយ បើប្រៀបធៀបទៅនឹងសប្តាហ៍មុន ។

ទន្ទឹមនោះ តួលេខនេះក៏បានធ្លាក់ចុះ ៣០ ភាគរយផងដែរ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន ។ បន្ថែមពីនេះ ការធ្លាក់ចុះនៃតម្លៃសាច់ជ្រូកក៏កើតមានឡើង ដោយសារតែកសិដ្ឋានចិញ្ចឹមធំៗនាំគ្នាកាប់ជ្រូកកាន់តែច្រើនឡើង ខណៈដែលអ្នកចិញ្ចឹមជាលក្ខណៈគ្រួសារក៏សកម្មក្នុងការលក់សាច់ជ្រូកដូចគ្នា ។

ស្របពេលជាមួយគ្នានេះ ការ​ធ្លាក់​ចុះ​តម្លៃ​ក៏​បាន​ជំរុញឲ្យ​មានការ​បញ្ចេញ​សាច់​ជ្រូក​ក្លាស្សេ​តម្លៃ​ទាប​ចេញ​លក់​លើ​ទីផ្សារផងដែរ ៕

ប្រែសម្រួល៖ នាង រតនៈ

ប្រភព៖ Xinhua