ផលិតកម្មរថយន្ត ថៃ ធ្លាក់ចុះ ៨.៥ ភាគរយក្នុងខែកញ្ញា ដោយសារការ​លក់ក្នុងស្រុកធ្លាក់ចុះ

សហព័ន្ធឧស្សាហកម្មថៃបានបញ្ជាក់ថា ផលិតកម្មរថយន្តនៅក្នុងប្រទេសថៃបានធ្លាក់ចុះ ៨.៤៥ ភាគរយនៅក្នុងខែកញ្ញា ហើយបើប្រៀបធៀបនឹងឆ្នាំមុនធ្លាក់មកត្រឹម ១៦៤,០៩៣ គ្រឿង ដោយសារតែការលក់ក្នុងស្រុកបានធ្លាក់ចុះ ។

បើតាមលោក Surapong Paisitpattanapong អ្នកនាំពាក្យនៃផ្នែកឧស្សាហកម្មរថយន្តរបស់សហព័ន្ធឧស្សាហកម្មថៃបញ្ជាក់ថា ការលក់រថយន្តក្នុងប្រទេសថៃនៅខែកញ្ញា បានធ្លាក់ចុះ ១៦.២៧ ភាគរយ បើប្រៀបធៀបនឹងឆ្នាំមុន បន្ទាប់ពីការធ្លាក់ចុះ ១១.៧ ភាគរយនៅក្នុងខែសីហា ដោយសារធនាគាររឹតបន្តឹងការផ្តល់ប្រាក់កម្ចីរថយន្ត ។

លោកបាននិយាយថា តម្លៃនៃការនាំចេញរថយន្តក្នុងខែកញ្ញាបានធ្លាក់ចុះ ៦២.៤៥ ពាន់លានបាត (១.៧៣ ពាន់លានដុល្លារអាមេរិក) បើប្រៀបធៀបនឹងឆ្នាំមុន ទោះបីជាមានការនាំចេញកើនឡើងទៅកាន់ទីផ្សារមជ្ឈិមបូព៌ា អឺរ៉ុប និងអាមេរិកក៏ដោយ ។

គួរឲ្យដឹងថា ប្រទេសថៃគឺជាមូលដ្ឋានផលិតកម្ម និងនាំចេញរថយន្តក្នុងតំបន់សម្រាប់ក្រុមហ៊ុនផលិតរថយន្តកំពូលៗមួយចំនួនរបស់ពិភពលោក រួមទាំង Toyota និង Honda ផងដែរ ៕

ប្រែសម្រួល៖ នាង រតនៈ

ប្រភព៖ Bangkok Post

ចុចអាន៖​ តម្រូវការប្រេង ធ្យូងថ្ម ឧស្ម័ន នឹងឡើងដល់កំពូលនៅឆ្នាំ ២០៣០