អាជ្ញាធរសៀមរាបបង្ហាញផែនការធ្វើឲ្យវិស័យទេស​ចរណ៍ងើបឡើងវិញក្នុងបរិបទកូវីដ១៩

ក្នុងស្ថានភាពជំងឺកូវីដ១៩ បានកើតមានឡើងនៅលើពិភពលោក និងឆ្លងចូលមកក្នុងប្រទេសកម្ពុជា បានធ្វើឲ្យវិស័យទេសចរណ៍ធ្លាក់ចុះយ៉ាងគំហុក។ នៅឯខេត្តសៀមរាប ភ្ញៀវទេសចរបានធ្លាក់ស្ទើរដល់ចំណុចសូន្យ។

លោក ង៉ូវ សេងកាក់ ប្រធានមន្ទីរទេសចរណ៏ខេត្តសៀមរាបបានថ្លែងថា នៅក្នុងដំណាក់កាលនៃវិបត្តិកូវីដ-១៩នេះ ខេត្តសៀមរាបបានរងផលប៉ះពាល់ ហើយស្ថានភាពភ្ញៀវទេសចរបរទេសនាពេលបច្ចុប្បន្ននេះ ក្នុង១ថ្ងៃ មានពី៣០ ទៅ៥០នាក់ប៉ុណ្ណោះ។

បើតាមប្រធានមន្ទីរទេសចរណ៏ នៅក្នុងខែមករា កុម្ភៈ និងមីនា ឆ្នាំ២០២០ មានភ្ញៀវទេសចរចន្លោះពី១៥ ម៉ឺនទៅ១៧​ម៉ឺននាក់ក្នុង១ខែ ប៉ុន្តែក្រោយពីមានវិបត្តិជំងឺកូវីដ មានការធ្លាក់ចុះ នៅសល់ប្រមាណពី១៥០០នាក់ ទៅ១៧០០ នាក់ប៉ុណ្ណោះក្នុង១ខែ ហើយនៅក្នុងចន្លោះពីខែមីនាដល់ខែធ្នូ ឆ្នាំ២០២០ ស្ថានភាពភ្ញៀវទេសចរបានធ្លាក់ចុះពី៩៨ ទៅ៩៩ ភាគរយក្នុងមួយខែ។

លោកអះអាងថា ដោយសារមានការយកចិត្តទុកដាក់ពីរដ្ឋបាលខេត្ត និងការចង្អុលបង្ហាញពីរាជរដ្ឋាភិបាល និងក្រសួងទេសចរណ៍ មន្ទីរទេសចរណ៍បានផ្ដោតការយកចិត្តទុកដាក់ទៅលើការរៀបចំគោលដៅទេសចរណ៍ក្នុងដំណាក់កាលវិបត្តិកូវីដ-១៩ នៅតាមដំបន់អេកូទេសចរណ៍ និងរមណីយដ្ឋានទេសចរណ៍។ 

លោកបន្តថា នៅខេត្តសៀមរាប មានតំបន់គោលដៅទេសចរណ៍យ៉ាងច្រើន ដែលត្រូវជំរុញនៅក្នុងដំណាក់កាលនេះ។ អ្វីដែលមានបញ្ហាធ្ងន់ធ្ងរនោះ គឺធនធានមនុស្សដែលយើងបានរៀបចំបណ្ដុះបណ្ដាលនាពេលកន្លងមកទុកប្រើ ត្រូវបាត់បងអស់ ដោយសារតែភ្ញៀវទេសចរបានធ្លាក់ចុះ ហើយកន្លងមកមានបម្រាមបិទអាជីវកម្មមួយចំនួន ដែលធ្វើឲ្យមានផលប៉ះពាល់ដល់ប្រតិបត្តិការការទេសចរណ៍របស់ខេត្តផងដែរ។

លោក ង៉ូវ សេងកាក់ លើកឡើងដែរថា ក្នុងនាមមន្ទីរជំនាញ លោកនឹងខិតខំប្រឹងតែទៅលើការងាររៀបចំតំបន់រមណីយដ្ឋាន ក៏ដូចជាសហគមន៍ ដែលថ្នាក់ដឹកនាំបានដាក់ចេញ ដើម្បីអភិវឌ្ឍន៍តំបន់ទេសចរណ៍។

លោកថា ថ្មីៗនេះនៅក្នុងទីក្រុងសៀមរាប ក៏មានការរៀបចំហេដ្ឋារចនាសម្ព័ន្ធ ដែលមានផ្លូវចំនួន៣៨ខ្សែ ដែលនេះ គឺជាចំនុចខ្លាំងសម្រាប់ទីក្រុងសៀមរាប នៅពេលដែលចប់ជំងឺកូវីដ នឹងដំណើរការបានល្អ ហើយភ្ញៀវទេសចរនឹងចូលទៅលេងកំសាន្តច្រើនឡើងវិញ។

ចំណែកលោក ពៅ ពិសិដ្ឋ អភិបាលរងខេត្តសៀមរាបបានអះអាងថា ការបទបាត់បង់ភ្ញៀវនៅខេត្តសៀមរាប នៅពេលនេះមិនមែនមកពីកត្តាផ្ទៃក្នុងរបស់យើងនោះទេ តែវាជាវិបត្តិសកល គឺស្ថិតនៅក្នុងដំណាក់កាលវិបត្តិជំងឺកូវីដ-១៩ ដែលសូម្បីតែនៅប្រទេសថៃ ក៏ដូចជាពិភពលោកបានគាំងស្ដូកតែម្ដងទាក់ទងវិស័យទេសចរណ៍នេះ។ 

លោកថា ដោយសារចរាចរណ៍អន្តរជាតិត្រូវបានគាំង ដូច្នេះមិនមានបរទេសណា គេចូលមកលេងសៀមរាបទេ។ ដូច្នេះផែនការទេសចរណ៍នេះ គឺប៉ះពាល់ទាំងអស់នៅលើពិភពលោក គឺមិនមែនតែនៅកម្ពុជាទេ ហើយក៏មិនមែនតែសម្រាប់ខេត្តសៀមរាបនេះដែរ។

បើតាមលោក ពៅ ពិសិដ្ឋ ដំណាក់កាលកូវីដ អាជ្ញាធរខេត្តបានត្រៀមលក្ខណៈមួយចំនួន ដើម្បីអនុវត្តនៅក្នុងដំណាក់កាលជំងឺកូវីដនេះ ហើយចំណុចដ៏ធំមួយដែលត្រូវធ្វើ គឺការអនុវត្តនូវវិធានការសុវត្ថិភាពទេសចរណ៍ក្នុងដំណាក់កាលកូវីដ ដែលក្នុងនោះ លោកអភិបាលខេត្តបានបង្កើតគណៈកម្មការមួយ ដើម្បីពិនិត្យមើលគ្រប់ទីតាំងអាជីវកម្មដ្ឋាននៅក្នុងខេត្ត ដែលមកដល់ពេលនេះអនុវត្តបាន៧៤ ភាគរយហើយ ក្នុងការអប់រំ ដែលនាំគាត់ឲ្យមានវិធានការ ការពារជំងឺកូវីដ-១៩នេះ ដូចជាការដាក់អាកុល ការវាស់កំដៅ និងគម្លាតសុវត្ថិភាពជាដើម។

ក្រៅពីយុទ្ធការនេះ នៅតាមព្រំដែនអាជ្ញាធរខេត្ត បានរៀបចំទទួលពលករ ដែលមកពីព្រំដែន ដើម្បីធ្វើចត្តាឡីស័ក មុននឹងបញ្ជូនពួកគាត់ទៅក្នុងសហគមន៍វិញវិញ ហើយការងារទាំងអស់នេះ គឺបានអនុវត្តជាប្រចាំ។

ជាមួយគ្នានោះរាជរដ្ឋាភិបាលកម្ពុជា ក្រោមដឹកការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបង្កើតនូវផែនការមេ ដើម្បីធ្វើការអភិវឌ្ឍវិស័យទេសចរណ៍ ពីឆ្នាំ២០២១ ដល់ឆ្នាំ២០៣៥  សម្រាប់អនុវត្តផ្ទាល់នៅក្នុងខេត្តសៀមរាបតែម្ដង។ 

លោកថា បន្ទាប់ពីសម្ដេចតេជោ ហ៊ុន សែន ដែលបានផ្ដល់កញ្ចប់ថវិកាពិសេសៗសម្រាប់ធ្វើការអភិវឌ្ឍផ្លូវ៣៨ខ្សែនៅទីក្រុងសៀមរាប រួមផ្សំជាមួយការដាក់នូវផែនការមេអភិវឌ្ឍន៍វិស័យទេសចរណ៍នៅខេត្តសៀមរាប គឺជាការអភិវឌ្ឍវិស័យទេសចរណ៍មួយនៅក្នុងគោលដៅមួយដែលមានផែនការមេចង្អុលផ្លូវច្បាស់លាស់ល្អ ហើយផែនការមេដៃបានប្រជុំឆ្លងគណៈកម្មការអន្តរក្រសួងរួចហើយ។

លោកអភិបាលរងបញ្ជាក់ដែរថា តាមផែនការមេនេះ ទៅដល់រហូតដល់ឆ្នាំ២០៣៥ កម្ពុជានឹងអាចនាំទេសចររហូតដល់រង្វង់៨ លាននាក់ ក្នុងមួយឆ្នាំ ដែលកត្តាទាំងអស់នេះរួមផ្សំជាមួយ នឹងការយកចិត្តទុកដាក់របស់រាជរដ្ឋាភិបាល ថ្នាក់ដឹកនាំខេត្ត បូករួមជាមួយការសាងសង់ហេដ្ឋារចនាសម្ព័ន្ធ ព្រលានយន្តហោះថ្មីត្រូវបញ្ចប់ និងការអភិវឌ្ឍទេសចរណ៍ដោយមានផែនការមេច្បាស់លាស់ផងនោះ ប្រជាពលរដ្ឋនៅខេត្តសៀមរាប នឹងទទួលបាននូវឱកាសនៃកំណើនទេសចរយ៉ាងច្រើនតាមផែនការ៕

អត្ថបទ៖កោះកែវ