អ្នកឧកញ៉ា គិត ម៉េង ប្រាប់វិនិយោគិនកូរ៉េ កុំឱ្យបារម្ភពីសុវត្ថិភាព និងបរិយាកាសវិនិយោគនៅកម្ពុជា

នៅក្នុងវេទិកាធុរកិច្ចកម្ពុជា-សាធារណរដ្ឋកូរ៉េ នៅទីក្រុងសេអ៊ូល នៅថ្ងៃទី ១៦ ខែឧសភា ឆ្នាំ២០២៤ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានប្រកាសស្វាគមន៍វិនិយោគិនកូរ៉េដ៏មានសក្តានុពលមកកាន់ប្រទេសកម្ពុជា។
នាឱកាសនោះ អ្នកឧកញ៉ា ​បាន​បញ្ជាក់​ពី​ឱកាស​វិនិយោគជាច្រើន ​ដែល​កំពុង​រង់ចាំវិនិយោគិន​នៅ​ក្នុង​ប្រទេស​កម្ពុជា ដែល​ជា​ទីតាំង​ដ៏​ស្វាហាប់ និង​ជាទីតាំងយុទ្ធសាស្ត្រ​នៅ​ចំ​កណ្តាល​អាស៊ានសម្រាប់ការនាំចេញ-នាំចូល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកឧកញ៉ា គិត ម៉េង ក៏បានថ្លែងប្រាប់ដល់អ្នកវិនិយោគមួយចំនួនកុំឱ្យមានការព្រួយបារម្ភអំពីសុវត្ថិភាពនៅកម្ពុជា។ ក្នុងន័យនេះ អ្នកឧកញ៉ា បានពន្យល់ថា អ្នកវិនិយោគមួយចំនួនបានយល់ខុសពីសុវត្ថិភាពនៅកម្ពុជា ដោយសារបណ្តាញសារព័ត៌មានខ្លះ បាន​លើក​ឡើង​មិន​ពិត​ពីតថភាពជាក់ស្តែងនៅកម្ពុជា។
ត្រង់ន័យនេះ អ្នកឧកញ៉ា ថ្លែងយ៉ាងដូច្នេះថា៖‍«សូមអញ្ជើញអ្នកវិនិយោគកូរ៉េ មកទទួលយកបទពិសោធន៍នៅក្នុងប្រទេសកម្ពុជា ហើយស្តាប់រឿងរ៉ាវជោគជ័យរបស់ក្រុមហ៊ុនកូរ៉េ ដែលដំណើរការនៅក្នុងប្រទេស ដែលកំពុងទទួលបានបរិយាកាសដ៏កក់ក្តៅ និងមានសុវត្ថិភាព»។

អ្នកឧកញ៉ា បានគូសបញ្ជាក់ពីទេសភាពនៅទីក្រុង និងការរីកចម្រើនរបស់ប្រទេស ជាមួយនឹងអគារខ្ពស់ៗ ផ្សារទំនើប ព្រមទាំងមានបដិសណ្ឋារកិច្ចដ៏កក់ក្តៅ។ អ្នកឧកញ៉ា បានសង្កត់ធ្ងន់ថា កម្ពុជាជាប្រទេសដែលមានសក្តានុពលខ្លាំង ត្រៀមខ្លួនរួចជាស្រេចសម្រាប់ការវិនិយោគ និងកិច្ចសហប្រតិបត្តិការ ដើម្បីជំរុញភាពរីកចម្រើន។

អ្នកឧកញ៉ា គិត ម៉េង ក៏បានសង្កត់ធ្ងន់លើសមត្ថភាពផលិតកម្មនាំចេញជាយុទ្ធសាស្ត្ររបស់កម្ពុជា ដែលធ្វើឱ្យក្លាយជាជម្រើសដ៏ទាក់ទាញសម្រាប់អ្នកវិនិយោគកូរ៉េ។ អ្នកឧកញ៉ា បានថ្លែងថា៖‍«ក្រោមការដឹកនាំរបស់អតីតនាយករដ្ឋមន្រ្តី
សម្តេចតេជោ ហ៊ុ​ន សែន និងនាយករដ្ឋមន្ត្រី សម្តេចធិបតី ហ៊ុន ម៉ាណែត កម្ពុជាបានបង្កើតបរិយាកាសស្វាគមន៍វិនិយោគិន និងការច្នៃប្រឌិតជាច្រើន»៕