រថភ្លើងទិញពីជប៉ុន ៥ គ្រឿងទៀត ត្រៀមបើកសាកល្បងពីខេត្តព្រះសីហនុ-ភ្នំពេញ

រថភ្លើងមួយទឹកដែលទិញពីជប៉ុនចំនួន ៥ គ្រឿងបន្ថែមទៀត របស់ក្រុមហ៊ុន រ៉ូយ៉ាល់ រេលវេ (RRC) កំពុងធ្វើតេស្តសាកល្បងនៅថ្ងៃទី ១៩ ខែមិថុនានេះ នៅបរិវេណកំពង់ផែក្រុងព្រះសីហនុ នឹងត្រៀមចេញដំណើរមករាជធានីភ្នំពេញនៅថ្ងៃទី ២០ ខែមិថុនា មុននឹងដាក់ឱ្យដំណើរការជាផ្លូវការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី ០៦ ខែមិថុនា ក្រុមការងារបច្ចេកទេសនាយកដ្ឋានផ្លូវដែក នៃក្រសួងសាធារណការ និងដឹកជញ្ជូន បានចុះពិនិត្យ តាមដានការធ្វើតេស្តសាកល្បងរថភ្លើងប្រភេទ Kiha-183 ដែលត្រូវបានកែសម្រួលប្រព័ន្ធហ្វ្រាំង និងទទឹងកង់ពី ១០៦៧ មីលីម៉ែត្រ មក១០០០ មីលីម៉ែត្រ។

ក្រុមហ៊ុន Royal Railway Cambodia បានដាក់ឱ្យបើកសាកល្បងនៅថ្ងៃទី៨ ខែមិថុនា ឆ្នាំ២០២៤ លើផ្លូវដែកភាគខាងត្បូង ខេត្តព្រះសីហនុ-ភ្នំពេញ ចំនួន ៤ គ្រឿងរួចមកហើយ ក្នុងចំណោម ១១ គ្រឿងដែលទិញពីជប៉ុន ដោយត្រូវពិនិត្យដំណើរការកង់ ប្រព័ន្ធហ្វ្រាំង និងការងារផ្សេងៗទៀតបណ្តើរៗតាមដំណាក់កាល នៃការរត់លើផ្លូវដែក ដើម្បីប្រាកដថាមានសុវត្ថិភាពសម្រាប់ដឹកជញ្ជូនអ្នកដំណើរ មុននឹងដាក់ឱ្យដំណើរការជាផ្លូវការ។

ចំពោះការដាក់ឱ្យដំណើរការជាផ្លូវការ ក្រុមហ៊ុន RRC នឹងជម្រាបជូននាពេលបន្ទាប់ ដោយត្រូវបែងចែកការបើកបរសម្រាប់អ្នកដំណើរជាពីរ ក្នុងនោះផ្លូវរថភ្លើងភាគខាងត្បូង ភ្នំពេញ-ព្រះសីហនុ តម្រូវឱ្យរត់ ៨០km/h និងសម្រាប់ផ្លូវរថភ្លើងភាគខាងជើង ភ្នំពេញ-ប៉ោយប៉ែត តម្រូវឱ្យរត់ចន្លោះពី ៣០-៥០ km/h៕

អត្ថបទ៖ ឡេង ដេត