ព័ត៌មានជាតិ

ប្រតិភូក្រុមហ៊ុនមហាសេដ្ឋីឥណ្ឌា ជួបមន្រ្តីកម្ពុជាសិក្សាវិនិយោគអភិវឌ្ឍកំពង់ផែ និងភស្ដុភារកម្ម

បានផុស

២ years មុន

នៅ

ថ្ងៃពុធ ១៤ សីហា ២០២៤

ដោយ

ប្រតិភូរបស់ក្រុមហ៊ុន Adani Ports and Special Economic Zone Ltd. ជាប្រតិបត្តិករកំពង់ផែពហុជាតិឥណ្ឌា និងជាក្រុមហ៊ុនដឹកជញ្ជូនដែលជាផ្នែកមួយនៃក្រុមហ៊ុន Adani Group របស់អ្នកជំនួញនិងមហាសេដ្ឋីឥណ្ឌា លោក Gautam Shantilal Adani បានចូលជួបពិភាក្សាការងារជាមួយមន្រ្តីក្រុមប្រឹក្សាអភិវឌ្ឍន៍កម្ពុជា ដើម្បីសិក្សាស្វែងរកឱកាសវិនិយោគលើវិស័យកំពង់ផែនិងភស្តុភារកម្មនៅកម្ពុជា។

កាលពីរសៀលម្សិលមិញនេះ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអនុញ្ញាតឱ្យលោក Capt Sandeep Mehta នាយកប្រតិបត្តិកំពង់ផែអន្តរជាតិនៃក្រុមហ៊ុន Adani Ports and Special Economic Zone Ltd. និងសហការី ចូលជួបសម្ដែងការគួរសម និងពិភាក្សាការងារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីបង្ហាញការស្វាគមន៍ចំពោះគណៈប្រតិភូក្រុមហ៊ុន ដែលអញ្ជើញធ្វើទស្សនកិច្ចធុរកិច្ចនៅកម្ពុជា ដើម្បីសិក្សាស្វែងយល់អំពីសក្តានុពលជាវិជ្ជមាននានា ជាធាតុចូលសម្រាប់ការសម្រេចចិត្តរបស់ខ្លួន លោក ស៊ុន ចាន់ថុល បានយកឱកាសនេះ ជម្រាបជូនដល់គណៈប្រតិភូអំពីផែនការអភិវឌ្ឍន៍របស់កម្ពុជា ពិសេសលើការរៀបចំហេដ្ឋារចនាសម្ព័ន្ធកំពង់ផែ និងភស្ដុភារកម្ម ដែលសុទ្ធសឹងតែពាក់ព័ន្ធនឹងមុខសញ្ញាវិនិយោគរបស់ក្រុមហ៊ុនស្រាប់។

លោក ស៊ុន ចាន់ថុល ក៏បានជម្រាបជូនអំពីបរិយាកាសវិនិយោគនៅកម្ពុជាដែលផ្ដល់ភាពបើកចំហរជូនចំពោះវិនិយោគិន មានការគាំទ្រពីរាជរដ្ឋាភិបាល និងមានក្រុមប្រឹក្សាអភិវឌ្ឍន៍កម្ពុជាជាសេនាធិការជួយសម្របសម្រួលកិច្ចការងារវិនិយោគ ពិសេសកម្ពុជាជាប្រទេសមានសុខសន្តិភាព ស្ថិរភាពនយោបាយ និងលំនឹងម៉ាក្រូសេដ្ឋកិច្ចល្អប្រសើរ ផ្ដល់លទ្ធភាពខ្ពស់ដល់ជោគជ័យភាពរបស់ធុរកិច្ចឯកជន។

លោក Capt Sandeep Mehta បានលើកអំពីផែនការអភិវឌ្ឍន៍វិនិយោគនៅកម្ពុជា ដោយក្នុងនោះលោកក៏ស្នើសុំកិច្ចសម្របសម្រួលបន្ថែមទៀតពីក្រុមប្រឹក្សាអភិវឌ្ឍន៍កម្ពុជា ដើម្បីអាចក្រុមហ៊ុនបានសិក្សាលម្អិត និងធ្វើការវាយតម្លៃលើកាលានុវត្តភាព និងសក្ដានុពលដែលកម្ពុជាអាចផ្ដល់ជូនបានសម្រាប់ការវិនិយោគ ពិសេសលើហេដ្ឋារចនាសម្ព័ន្ធពាក់ព័ន្ធ កំពង់ផែ និងភស្ដុភារកម្ម៕