ព័ត៌មានអន្ដរជាតិ

ចិនផ្ដល់ការលើកលែងពន្ធដល់ទំនិញបង់ក្លាដែសគ្រប់មុខ

បានផុស

១០ ខែ មុន

នៅ

ថ្ងៃសុក្រ ១៣ កញ្ញា ២០២៤

ដោយ

ប្រទេសចិនបានសម្រេចចិត្តផ្តល់ការលើកលែងពន្ធ ១០០ ភាគរយ លើគ្រប់មុខទំនិញរបស់បង់ក្លាដែស ក៏ដូចជាប្រទេសអភិវឌ្ឍន៍តិចតួច (LDCs) ផ្សេងទៀត។ នេះបើតាមការចុះផ្សាយរបស់កាសែត Daily Star នៅថ្ងៃសុក្រនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកអគ្គរដ្ឋទូតចិនប្រចាំប្រទេសបង់ក្លាដែស លោក Yao Wen បានប្រកាសពីការសម្រេចចិត្តនេះ នៅពេលលោកបានទូរស័ព្ទទៅកាន់រដ្ឋមន្ត្រីការបរទេសបង់ក្លាដែស លោក Jashim Uddin កាលពីម្សិលមិញ។ លោក Jashim បានប្រាប់អ្នកយកព័ត៌មាន យ៉ាងដូច្នេះថា៖ «ឯកអគ្គរដ្ឋទូតចិនបាននិយាយក្នុងកិច្ចប្រជុំកំពូលចិន-អាហ្វ្រិក នៅដើមខែកញ្ញានេះថា ចិនបានសម្រេចចិត្តផ្តល់ការលើកលែងពន្ធ ១០០ ភាគរយ ដល់ប្រទេស LDCs រួមទាំងបង់ក្លាដែសផងដែរ»។

នៅឆ្នាំ ២០២២ ទំនិញបង់ក្លាដែសប្រមាណ ៩៨ ភាគរយ បានទទួលការលើកលែងពន្ធពីចិន ក្នុងនោះរួមមានទាំងផលិតផលថ្មីចំនួន ៣៨៣ មុខ ជាពិសេសទំនិញស្បែក និងស្បែកសត្វ។

គួរគូសបញ្ជាក់ថា ចិនគឺជាដៃគូពាណិជ្ជកម្មដ៏ធំបំផុតរបស់បង់ក្លាដែស។ ប្រទេសនេះបាននាំចេញផលិតផលទៅបង់ក្លាដែស ក្នុងតម្លៃជាង ១៨,៦ ប៊ីលានដុល្លារ ក្នុងឆ្នាំសារពើពន្ធ ២០២២-២០២៣ ខណៈការនាំចេញរបស់បង់ក្លាដែសទៅចិន មានតម្លៃប្រហែល ៦៧៦ លានដុល្លារ។

លោក Jashim បានបន្ថែមថា ចិនក៏ជាប្រភពនៃការវិនិយោគផ្ទាល់ពីបរទេសភាគច្រើនបន្ទាប់ពីរដ្ឋាភិបាលបណ្តោះអាសន្នត្រូវបានបង្កើតឡើងផងដែរ ដោយវាមានទំហំវិនិយោគប្រមាណ ៨ លានដុល្លារ។

អ្នកជំនាញមើលឃើញថា បង់ក្លាដែសអាចរកប្រាក់ចំណូល ២៥ ប៊ីលានដុល្លារ ប្រសិនបើប្រទេសនេះអាចដណ្ដើមយកចំណែកទីផ្សារនាំចូលរបស់ចិន បានត្រឹមតែ១ភាគរយ។ ក្នុងឆ្នាំសារពើពន្ធ ២០២០ ចិនបាននាំចូលទំនិញសរុបជាទឹកប្រាក់ប្រមាណ ២,៤ ទ្រីលានដុល្លារ ហើយការនាំចេញរបស់បង់ក្លាដែសរួមចំណែក ០,០៥ ភាគរយ នៅឆ្នាំនោះ។

ទោះជាយ៉ាងណាក៏ដោយ អ្នកសេដ្ឋកិច្ចយល់ឃើញថា បង់ក្លាដែសនឹងត្រូវធ្វើពិពិធកម្មការនាំចេញរបស់ខ្លួន ដែលពឹងផ្អែកខ្លាំងលើឧស្សាហកម្មកាត់ដេរ ដើម្បីបង្កើនការនាំចេញទៅកាន់ប្រទេសចិន៕