កម្ពុជាស្នើជប៉ុនជំរុញការនាំចេញកសិផលសក្តានុពល​ដាក់លក់នៅទីផ្សារ​កាន់តែច្រើន

លោក សំហេង បូរ៉ា រដ្ឋលេខាធិការក្រសួងពាណិជ្ជកម្មបានស្នើដល់អង្គភាពជំរុញពាណិជ្ជកម្មក្រៅប្រទេសជប៉ុនប្រចាំទីក្រុងអូសាកា (​JETRO) លើការងារជំរុញកិច្ចសហប្រតិបត្តិការ និងការជំរុញការនាំចេញផលិតផលសក្តានុពលរបស់កម្ពុជា ស្របពេលដែលផលិតផលកសិផលកែច្នៃមួយចំនួនកំពុងទទួលបានការពេញនិយមពីសំណាក់ប្រជាពលរដ្ឋជប៉ុនលើគុណភាព និងសុវត្ថិភាពនៃការប្រើប្រាស់។

ការស្នើសុំរបស់លោក សំហេង បូរ៉ា ក្នុងឪកាសដែលលោកបានជួបពិភាក្សាការងារជាមួយ លោក SHO Hideki អគ្គនាយកនៃ​JETRO) នៅទីស្នាក់ការ JETRO ទីក្រុងអូសាកាកាលពីថ្ងៃទី១៨ ខែកញ្ញាកន្លងទៅនេះ។

លោកក៏បានថ្លែងអំណរគុណ ចំពោះ JETRO ទាំងនៅភ្នំពេញ និងអូសាកា សម្រាប់ការគាំទ្រ និងកិច្ចសហប្រតិបត្តិការល្អប្រសើរនាពេលកន្លងមក ព្រមទាំងបានបង្ហាញអំពីសកម្មភាពអាទិភាពមួយចំនួនរបស់ក្រសួងពាណិជ្ជកម្មក្នុងការជំរុញការនាំចេញ និងផលិតផលសក្តានុពលរបស់កម្ពុជា ជាពិសេសស្វាយចន្ទី និងស្វាយ ជាដើម។

លោក SHO Hideki បានកោតសរសើរចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ជាពិសេសក្រសួងពាណិជ្ជកម្ម ក្នុងការជំរុញការនាំចេញផលិតផលរបស់កម្ពុជា។

​ លោក Hideki ក៏បានបង្ហាញពីការគាំទ្រ និងបំណងក្នុងការពង្រឹងកិច្ចសហប្រតិបត្តិការរវាងក្រសួងពាណិជ្ជកម្ម និង JETRO ទាំងនៅភ្នំពេញ និងអូសាកា ក្នុងការជំរុញការនាំចេញផលិតផលសក្តានុពលរបស់កម្ពុជា តាមរយៈការបង្កើតបណ្តាញទំនាក់ទំនង និងឱកាសផ្គូរផ្គងធុរកិច្ចរវាងវិស័យឯកជននៃប្រទេសទាំងពីរ។

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីថ្ងៃទី៦ខែសីហា  បានជួបពិភាក្សា លោកស្រី Mio Kawada អនុប្រធាន​ JETRO នៅទីក្រុងតូក្យ៉ូ ដោយបានណែនាំដល់បណ្តាក្រសួងឬស្ថាប័នរបស់រដ្ឋនានាបង្កើតក្រុមការងារ​ ដើម្បីសម្របសម្រួលដល់ JETRO ​និងក្រុមហ៊ុន​ជប៉ុន​ក្នុងគោលបំណងដើម្បីទាក់ទាញការវិនិយោគនិង​ជំរុញការដោះដូរពាណិជ្ជកម្មរវាងប្រទេសទាំងពីរ។

​លោក ហ្វូគុហារ៉ា ខូជិ (FUKUHARA KOJI) ប្រធានសមាគមធុរកិច្ចជប៉ុនប្រចាំកម្ពុជា​បានថ្លែងប្រាប់កម្ពុជាថ្មីកន្លងមកថា គិតមកដល់បច្ចុប្បន្នក្រុមហ៊ុន​ជប៉ុនសរុបប្រមាណ ៥០០ កំពុងធ្វើការវិនិយោគនៅកម្ពុជា ក្នុងនោះក្រុម​ហ៊ុន​ដែល​​ចូល​ជាសមាជិកសមាគម (JBAC) មានចំនួន ២៥០ ក្រុមហ៊ុន និងក្រុមហ៊ុនផ្សេងទៀត ដែលបាន​​​​ធ្វើការ​វិនិយោគ​​ក្នុង​វិស័យ​​​ផលិតកម្មប្រមាណ ២៣ ភាគរយ និងផ្នែកសាងសង់ប្រមាណ ២០ ភាគរយ។

លោក ហ្វូគុហារ៉ា ខូជិ បានលើកឡើងថា៖« កម្ពុជាមាន​សក្ដា​​​​នុពលច្រើនក្នុងការវិនិយោគ ខណៈក្រុមហ៊ុននៅក្នុងសមាគមរបស់លោកកំពុងធ្វើសហប្រតិបត្តិការ​ជាមួយ​ប្រទេស​​​​ចិន វៀតណាមបូក១ និង​ថៃបូក១ ផងដែរ»។

យោងតាមអគ្គនាយកដ្ឋានគយ និងរដ្ឋាករកម្ពុជា (GDCE) នៅក្នុងឆមាសទី១ ឆ្នាំ ២០២៤ ពាណិជ្ជ​កម្ម​ទ្វេភាគី​កម្ពុជា-ជប៉ុនសម្រេចបានទឹកប្រាក់ជាង ៩៥០ លានដុល្លារ កើនឡើង ១០,៥%។​ការ​នាំ​ចេញ​របស់​កម្ពុជា សម្រេចបានទឹកប្រាក់ជាង ៦០០ លានដុល្លារកើនឡើង ១៥,៤%​។ ចំណែកឯការនាំចូលមកវិញ មានទំហំទឹកប្រាក់ជាង ៣២១ លាន​ដុល្លារ កើនឡើង ២ ភាគ​រយ។ កាលពីឆ្នាំ ២០២៣ ពាណិជ្ជកម្មទ្វេភាគីកម្ពុជា-ជប៉ុនសម្រេចបានជាង ១,៧៩ ពាន់លានដុល្លារ ធ្លាក់​ចុះ ៧,២ ភាគរយ៕