សេដ្ឋកិច្ច

អ្នកជំនាញថា ការតភ្ជាប់ជើងហោះហើរថ្មីសៀមរាប-សិង្ហបុរី នឹងបង្កើនទេសចរកម្ពុជា

បានផុស

៦ ខែ មុន

នៅ

ថ្ងៃចន្ទ ២៣ កញ្ញា ២០២៤

ដោយ

លោក ខៀវ ធី ប្រធានសមាគមមគ្គុទ្ទេសក៍ទេសចរណ៍អង្គរ បានឱ្យដឹងនៅថ្ងៃទី ២៣ ខែកញ្ញា ឆ្នាំ ២០២៤នេះ ថា ការតភ្ជាប់ជើងហោះហើររបស់ក្រុមហ៊ុន AirAsia Cambodia ជាមួយអាកាសយានដ្ឋាន Changi Airport ដែលមានមូលដ្ឋាននៅប្រទេសសិង្ហបុរី តភ្ជាប់មកខេត្តសៀមរាបនឹងបង្កើនភ្ញៀវទេសចរបន្ថែមទៀតចូលមកកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខៀវ ធី មានប្រសាសន៍ថា៖ «កាលណាយើងមានជើងហោះហើរច្រើន គឺមានការប្រកួតប្រជែង អញ្ចឹងតម្លៃសំបុត្រនឹងចុះថ្លៃគួរសម ដែលអាចនឹងឱ្យទេសចរធ្វើដំណើរចូលមកខេត្តសៀមរាបច្រើនជាងមុន»។

ក្រុមហ៊ុនអាកាសចរណ៍ AirAsia Cambodia បានប្រកាសថា ការហោះហើរត្រង់ពីខេត្តសៀមរាប-សិង្ហបុរី នឹងធ្វើឡើងប្រចាំថ្ងៃ ចាប់ពីថ្ងៃទី ០៩ ខែវិច្ឆិកា ឆ្នាំ ២០២៤ ក្នុងតម្លៃ ១៣៩ ដុល្លារ។

យោងតាមរបាយការណ៍របស់គ្រឹះស្ថានអង្គរនៅក្នុងរយៈពេល ៨ ខែ ឆ្នាំ ២០២៤ មានភ្ញៀវទេសចរបរទេសជាង ៦៥ ម៉ឺន បានទិញសំបុត្រចូលទស្សនារមណីយដ្ឋានអង្គរ គិតជាទឹកប្រាក់ប្រមាណជាង ៣០ លានដុល្លារ កើនឡើង ៣១,៣៦% ប្រៀបធៀបរយៈពេលដូចគ្នានៅឆ្នាំ ២០២៣។

យោងតាមក្រសួងទេសចរណ៍ គិតចាប់ពីខែមករា ដល់ខែកក្កដា ឆ្នាំ ២០២៤ កម្ពុជាទទួលបានភ្ញៀវបរទេសជាង ៣,៧៤ លាននាក់ កើនឡើង ២៣,២ ភាគរយធៀបនឹងរយៈពេលដូចគ្នាឆ្នាំ ២០២៣ដែលមានចំនួន ៣,០៣ លាននាក់។

ក្នុងចំណោមទេសចរជាង ៣,៧៤ លាននាក់ទេសចរថៃឈរនៅលំដាប់លេខរៀងទី ១ មានចំនួន ១ ១៤៧ ៥៣៤ នាក់ កើន ១១,៦% វៀតណាមចំនួន ៧៥៧ ៤៣៧ កើន ៣៧,៤% ចិន ៤៦៣ ៩៨០ នាក់ កើន ៤៥,៧% ឡាវ ២២៤ ៨៧១ កើន ២៩,៣% អាមេរិក ១១៧ ២២៣ នាក់ កើន ១៧%៕

អត្ថបទ៖ ឡេង ដេត