ដំណាប់ស្វាយ និងគ្រាប់ស្វាយចន្ទី ១០ តោន ចាប់ផ្ដើមនាំចេញទៅទីផ្សារអឺរ៉ុប

ផលិតផលកសិកម្មកម្ពុជាដែលមានសក្តានុពល ២ ប្រភេទ រួម​មានដំណាប់ស្វាយ​កែវរមៀត ​និង​គ្រាប់ស្វាយចន្ទី ទម្ងន់ ១០ តោន បានចាប់ផ្ដើមនាំចេញទៅទីផ្សារអឺរ៉ុបនៅថ្ងៃទី ២១ ខែតុលា ឆ្នាំ ២០២៤។

ក្រុមហ៊ុន Tropicam Fruit and Vegetable Co., Ltd. និង ក្រុមហ៊ុន Overenden/Smarteden នៅថ្ងៃទី ១៧ ខែតុលា ឆ្នាំ ២០២៤ ចុះអនុស្សរណៈនៃការយោគយល់គ្នា​ក្នុងការនាំចេញ​លើផលិត​​​​ផល​កសិកម្មចំនួន ៣មុខ រួមមាន អង្ករ គ្រាប់ស្វាយចន្ទី និងដំណាប់ស្វាយកែវរមៀត។

អ្នកឧកញ៉ា ហ៊ុន ឡាក់ ប្រធានក្រុមហ៊ុន Tropicam Fruit and Vegetable Co., Ltd. មានប្រសាសន៍ថា នេះជាការនាំចេញផ្លូវការលើកដំបូងចំពោះផលិតផលកែច្នៃវេចខ្ចប់ស្អាត មានគុណភាពខ្ពស់ ទៅកាន់ទីផ្សារអឺរ៉ុប បន្ទាប់ពីជោគជ័យក្នុងការសាកល្បង​នៅទីផ្សារប្រទេសបារាំង។

អ្នកឧកញ៉ា ហ៊ុន ឡាក់ បញ្ជាក់ថា៖ «កន្លងមកកម្ពុជាផលិតផ្ដល់ទៅទីផ្សារបារាំង ឱ្យគេភ្លក់ សាកល្បង និងផ្សព្វផ្សាយ ក្រោយពីទទួលបានលទ្ធផលជាវិជ្ជមាននូវការគាំទ្រ ការពេញចិត្ត​នូវគុណភាព និងរសជាតិគឺដៃគូបារាំងចាប់ផ្ដើមសម្រេចថា ចុះកិច្ចព្រមព្រៀង MOU រយៈពេល ៥ ឆ្នាំ សម្រាប់ការនាំចេញផលិតផលកសិកម្ម និងមានផលិតផលកែច្នៃដ៏ទៃទៀត រាប់ទាំងម្រេច និងស្ករត្នោត និងត្រីងៀត»។

លោក អួន ស៊ីឡុត ប្រធានសមាគមស្វាយចន្ទីកម្ពុជា ប្រាប់កម្ពុជាថ្មី នៅថ្ងៃទី ២១ ខែតុលា ឆ្នាំ ២០២៤ នេះថា  ការនាំចេញស្វាយចន្ទីទៅទីផ្សារអឺរ៉ុប មិនមែនជាលើកទី១ នោះទេ សមាគមស្វាយចន្ទីកម្ពុជា បាននាំចេញទៅបណ្ដាប្រទេសមួយចំនួនរួចហើយ ដូចជាប្រទេសបារាំង អង់គ្លេស អាល្លឺម៉ង់ និងហូឡង់ ខណៈការនាំចេញគ្រាប់កែច្នៃស្វាយចន្ទីមានចំនួនតិចតួចនៅឡើយ​សម្រាប់ទីផ្សារអឺរ៉ុប​។

លោក អួន ស៊ីឡុត បញ្ជាក់ថា នៅអឺរ៉ុបស្ដង់ដាខ្ពស់ ដូច្នេះបើទំនិញកម្ពុជាអាចនាំចូល​ទៅទីផ្សារ​អឺរ៉ុបបាន មានន័យថា យើងមានស្ដង់ដា សុវត្ថិភាពចំណីអាហារស្ដង់ដាខ្ពស់ហើយ ទទួលស្គាល់​ដោយ​អន្តរជាតិ។

លោក អួន ស៊ីឡុត សង្កេតឃើញថា ស្ថាប័នក្រៅរដ្ឋាភិបាលមួយចំនួន​ខិតខំប្រឹងប្រែងរកទីផ្សារ​នៅបរទេស ប៉ុន្តែសំខាន់កម្ពុជាមិនមានផលិផលតបតាមការបញ្ជាទិញ ដោយសារផលិតកម្មក្នុង​ស្រុក​មានតិចតួច និងគ្មានទុនបង្វិលសម្រាប់ទិញគ្រាប់ឆៅ​ក្នុងការកែច្នៃទៅជាគ្រាប់សម្រេច។

លោក អួន ស៊ីឡុត បន្ថែមថា៖ «អ្វីដែលសំខាន់ គឺត្រូវពង្រឹងសមត្ថភាពសហគ្រាសក្នុងស្រុក និងផ្ដល់ទុនបង្វិលឱ្យបានគ្រប់គ្រាន់ និងបន្ថយថ្លៃដើមផលិតជូនពួកគាត់ ដើម្បីឱ្យទំនិញ​របស់យើង​អាច​ប្រកួតប្រជែង​​នៅលើទីផ្សារអន្តរជាតិ មក​ដល់​ពេលនេះ ទំនិញគ្រាប់ស្វាយចន្ទី​កែច្នៃហើយ គឺមានតម្លៃថ្លៃបើប្រៀបធៀបជាមួយបណ្ដាប្រទេសជិតខាង យើងពិបាកក្នុងការ​ប្រជែង​​នៅលើទីផ្សារអន្តរជាតិ»៕

អត្ថបទ៖ ឡេង ដេត