អង្គការសង្គមស៊ីវិលអះអាងថា កម្លាំងពលកម្មផលិត​កម្មកៅស៊ូ និងចេក មួយចំនួន មិនទាន់​ទទួលបានប្រព័ន្ធគាំពារសង្គម

អង្គការសង្គមស៊ីវិលមួយចំនួន បានលើកឡើងថា កម្លាំងពលកម្ម នៅក្នុងវិស័យកសិ-ឧស្សា​ហកម្ម ដំណាំចេក និងកៅស៊ូ មួយចំនួន មិនទាន់ទទួលបានការគ្របដណ្ដប់​គោលនយោបាយ​ប្រព័ន្ធគាំពារសង្គមរបស់រាជរដ្ឋាភិបាល។

អង្គការអុកស្វាម និងអង្គការដៃគូរអនុវត្តគម្រោង សមភាពសម្រាប់ទាំងអស់គ្នា នៅថ្ងៃទី ៣១ ខែតុលា ឆ្នាំ ២០២៤ ​បានរៀបចំកិច្ចសន្ទនាថ្នាក់ជាតិ​ក្រោមប្រធានបទ​ “ប្រព័ន្ធគាំពារសង្គមដែល​ល្អប្រសើរសម្រាប់កម្មករ និងកសិករក្នុងខ្សែច្រវាក់ចេក និងកៅស៊ូ”។ 

កិច្ចសន្ទនានេះរៀបចំឡើងនៅរាជធានីភ្នំពេញក្នុងគោលបំណងចែករំលែកការអនុវត្តល្អៗរបស់អ្នកពាក់ព័ន្ធសំខាន់ៗ​ពីស្ថាប័ន​រាជរដ្ឋាភិបាល និងវិស័យឯកជនក្នុងការផ្តល់ការគាំពារដល់កសិករ និងកម្មករ និងពិភាក្សារកដំណោះស្រាយរួមគ្នាលើបញ្ហាប្រឈមមួយចំនួនដែលនៅសេសសល់ ប្រកបដោយប្រសិទ្ធភាព។

កិច្ចសន្ទនាមានអ្នកចូលរួមប្រមាណ ១៣០ នាក់ មកពីស្ថាប័នក្រសួងពាក់ព័ន្ធថ្នាក់ជាតិ និងរដ្ឋបាលថ្នាក់ក្រោមជាតិ តំណាងក្រុមហ៊ុនវិនិយោគ កម្មករ និងកសិករ ពាណិជ្ជករ អង្គការមិនមែនរដ្ឋាភិបាល និងដៃគូអភិវឌ្ឍន៍ពាក់ព័ន្ធ។

លោកស្រី ភាណ សោភ័ណ នាយិកានៃអង្គការអង្គការអុកស្វាមមានប្រសាសន៍ថា កម្មករនៅក្នុងវិស័យកសិ-ឧស្សា​ហកម្ម ដំណាំចេក និងកៅស៊ូ ជួបការលំបាកជាច្រើនទាំងការស្នាក់នៅ និងការ​បំពេញ​ការងារ​ដោយសារចម្ការភាគច្រើនស្ថិតនៅតំបន់ដាច់ស្រយាល​ពេលខ្លះមិនមាន​សេវាទូរស័ព្ទ​​ទៅដល់ ផ្លូវធ្វើដំណើរឆ្ងាយ និងលំបាក។​

លោកស្រីបានឱ្យដឹងថា កម្មករប្រឈមដោយផ្ទាល់ពីការ​ប្រើប្រាស់ថ្នាំគីមីកសិកម្ម ដែលអាចបង្កផលលំបាកដល់សុខភាពទាំងពេលកំពុងបំពេញការងារ និងឥទ្ធិពលរយៈពេលវែង ប្រសិនបើមិនមានការប្រើប្រាស់សម្លៀកបំពាក់ សំភារៈ និងឧបករណ៍​ការពារឱ្យបានត្រឹមត្រូវ។

លោកស្រី ភាណ សោភ័ណបន្ថែមថា៖ «កម្មករទទួលបានការគាំពារមួយចំនួន តាមរយៈរបបសន្តិសុខសង្គម ដែលបានផ្តល់អត្ថប្រយោជន៍យ៉ាងច្រើន ប៉ុន្តែវិសាលភាពនៅមានកម្រិតនៅឡើយ»។

លោកស្រី ស៊ិន ពុទ្ធារី នាយិកាប្រតិបត្តិនៃអង្គការគណៈកម្មាធិការសហប្រតិបត្តិការដើម្បីកម្ពុជា មានប្រសាសន៍​ថាការចូលចំណែកដល់ការអភិវឌ្ឍគោលនយោបាយកិច្ចគាំពារសង្គម និងការងារសមរម្យសម្រាប់កម្មករ-និយោជិត ជាមួយរាជរដ្ឋាភិបាល គឺជាការដោះស្រាយ​បញ្ហាប្រឈម​ក្នុងការអភិវឌ្ឍទាំងនៅថ្នាក់ជាតិ និងថ្នាក់ក្រោមជាតិ។

លោកស្រី សេង រាសី នាយិកានៃអង្គការសីលការមានប្រសាសន៍ថា ស្រ្តី ជាកម្មករ ​និង​កសិករ ដើរតួនាទីយ៉ាងសំខាន់ក្នុងខ្សែច្រវាក់ផលិតកម្មកសិកម្ម ដូច្នេះកិច្ចសន្ទនា​ពហុភាគី​លើប្រព័ន្ធគាំពារសង្គម មានសារ:សំខាន់ណាស់ក្នុងការរកដំណោះ​ស្រាយ​រួម ដែលធានាការ​រស់នៅរបស់ពួកគាត់ប្រកបដោយសេចក្ដីថ្លៃថ្នូរ។

លោក ខៀវ សាវុធ អគ្គនាយករង នៃអគ្គនាយកដ្ឋានការងារ នៃក្រសួងការងារ មានប្រសាសន៍ថា បញ្ហាប្រឈមពិតជាមាន ប៉ុន្តែសំខាន់គឺយើងរួមគ្នាដោះស្រាយ។

លោកថា កាលពីពេលថ្មីៗនេះ ក្រសួងក៏បានចាត់ក្រុមអធិការកិច្ចចុះទៅខេត្តរតនគិរី ខេត្តមណ្ឌល​គិរី  ខេត្តក្រចេះ និងខេត្តស្ទឹង​ត្រែង និងបានណែនាំឱ្យបណ្ដាក្រុមហ៊ុន កែសម្រួលលក្ខខណ្ឌការ​ងារ​​ឱ្យបានល្អប្រសើរ។

លោកបញ្ជាក់ថា ប្រាក់ឈ្មួល អប្បរមា រដ្ឋាភិបាលកំណត់បានតែក្នុង​វិស័យកាត់ដេរ និងស្បែកជើង ដោយឡែកវិស័យកសិកម្ម និងវិស័យផ្សេងទៀត មិនទាន់បាន​កំណត់នៅឡើយ។

នៅក្នុងរយៈពេល ៦ ខែដើមឆ្នាំ ២០២៤ នេះ ការនាំចេញកៅស៊ូសម្រេចបានទឹកប្រាក់ចំនួន ២២៩ លានដុល្លារ កើនឡើង ១៩,៨៣% បើធៀបនឹងរយៈពេល​ដូចគ្នា​ក្នុង​ឆ្នាំ ២០២៣ ដែលមានចំនួន ១៩១ លានដុល្លារ ទៅកាន់ទីផ្សារប្រទេសម៉ាឡេស៊ី វៀតណាម សិង្ហបុរី និងចិន។ យោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ​ បានឱ្យដឹងថា កម្ពុជា​មានផ្ទៃដីដាំកៅស៊ូចំនួនជាង ៤០ ម៉ឺនហិកតា (៤០៧,១៧២) គិតត្រឹមឆ្នាំ ២០២៣។

ដោយឡែក សម្រាប់ដំណាំចេកអំបូងលឿង បើតាមទិន្នន័យរបស់ក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ការនាំចេញចេកអំបូងលឿងរបស់កម្ពុជាទៅកាន់ទីផ្សារអន្តរជាតិ នៅក្នុងរយៈពេល ៧ ខែឆ្នាំ ២០២៤ មានចំនួនជាង ១៤ ម៉ឺន ៣ ពាន់តោន ដោយទទួលបានទឹកប្រាក់ជាង ៩៦ លានដុល្លារ មានការធ្លាក់ចុះជាង ២០% បើធៀបនឹងរយៈពេលដូចគ្នាកាលពីឆ្នាំមុន។

កត្តាដែលនាំអោយមានការធ្លាក់ចុះនេះ គឺការប្រែប្រួលអាកាសធាតុ។ ផ្លែចេករបស់កម្ពុជាភាគច្រើននាំចេញទៅលក់នៅទីផ្សារវៀតណាម ថៃ ចិន កូរ៉េខាងត្បូង និងសហភាពអឺរ៉ុបជាដើម ហើយក៏មានលក់លើទីផ្សារក្នុងស្រុកផងដែរ។ បើតាម​ក្រសួងកសិកម្ម ប្រទេសកម្ពុ​ជាមាន​ផ្ទៃដី​ដាំ​ដុះ​ចេក ប្រមាណ​ជាង​ ១៦ ​ពាន់​ហិកតា និង​ផ្ទៃដី​កំពុង​ប្រមូល​ផល​ជាង ​១១ ​ពាន់​ហិកតា នៅក្នុង​ឆ្នាំ ​២០២២ និង​អាចមាន​ការកើនឡើង​តិចតួច ក្នុង​ឆ្នាំ ​២០២៣ ដោយ​ក្នុងនោះ​ខេត្ត​ដែលមាន​ដាំ​ដុះ​ចេក​ច្រើនជាងគេ រួមមាន​ខេត្តរតនគិរី ក្រចេះ ស្ទឹងត្រែង កំពត កំពង់ចាម និងកំពង់ស្ពឺ​​៕

អត្ថបទ៖ ឡេង ដេត