Andres Neito ជាកីឡាករជម្រើសជាតិកម្ពុជាទី១ ទៅលេងនៅលីគកំពូល ឥណ្ឌូណេស៊ី

នៅព្រឹកថ្ងៃ ព្រហស្បតិ៍ ទី ២៦ ខែ មិថុនា ឆ្នាំ ២០២៥ នេះ ខ្សែបម្រើប្រយុទ្ធ Andres Nieto ត្រូវបានប្រកាសជាផ្លូវការហើយ ក្នុងការចូលរួមជាមួយក្រុមនៃលីគកំពូល ឥណ្ឌូណេស៊ី Bhayangkara FC។

ការផ្លាស់ទៅកាន់ក្លិបនៅ ឥណ្ឌូណេស៊ី​ នេះ បានធ្វើឱ្យ Andres Nieto ​ក្លាយជាកីឡាករជម្រើសជាតិ កម្ពុជា ដំបូងគេ ដែលបានទៅលេងនៅក្លិបក្នុងប្រទេស ឥណ្ឌូណេស៊ី។

ពីមុនមក ក៏ធ្លាប់មានកីឡាករ អតីតកីឡាករជម្រើសជាតិកម្ពុជាជាច្រើនរូបទៅលេងនៅក្រៅប្រទេស​ដែរ ដូចជា ចាន់ វឌ្ឍនាកា ទៅលេងនៅក្លិប Fujieda MYFC លីគទី ៣ ជប៉ុន, ក្លិប Pahang លីគកំពូល ម៉ាឡេស៊ី និងក្លិប PKNS FC លីគកំពូល ម៉ាឡេស៊ីដូចគ្នា។ ចំណែក កែវ សុខផែង ធ្លាប់លេងនៅក្លិប PKNP FC ក្នុងប្រទេស ម៉ាឡេស៊ី និង ប្រាក់ មុន្នីឧត្តម ធ្លាប់លេងនៅក្លិប N.Sembilan FC ក្នុងប្រទេស ម៉ាឡេស៊ី។ ធារី ចន្ថាប៊ីន ទៅ​លេង​នៅ​ Terrangganu ក្នុង​ប្រទេស​ម៉ាឡេស៊ី។

ប៉ុន្តែក្នុងចំណោមកីឡាករទាំងអស់ គឺពុំដែលមានកីឡាកររូបណា ធ្លាប់ទៅលេងនៅ ឥណ្ឌូណេស៊ី​ ឡើយ។ លើកលែងតែអតីតខ្សែប្រយុទ្ធព្រះខ័នរាជស្វាយរៀង កីឡាករ Privat Mbarga ដែលធ្លាប់ទៅលេងនៅលីគកំពូល ឥណ្ឌូនេស៊ី ជាមួយ Bali United ក្នុងនាមជាកីឡាករសញ្ជាតិ ខ្មែរ ប៉ុន្តែរូបគេពុំត្រូវបានអនុញ្ញាតឱ្យចូលរួមជាមួយជម្រើសជាតិ កម្ពុជា ឡើយ ដោយសារមានលក្ខខណ្ឌមួយចំនួន រូបគេមិនបានបំពេញឱ្យត្រឹមត្រូវតាមច្បាប់របស់ FIFA។

គួរឱ្យដឹងថា Nieto គឺជាកីឡាករជនជាតិ កូឡុំប៊ី ដែលទទួលបានសញ្ជាតិ ខ្មែរ បន្ទាប់ពីគាត់បានបំពេញលក្ខខណ្ឌគ្រប់គ្រាន់ ក្នុងការលេងជាមួយ ភ្នំពេញក្រោន នៃលីគកំពូលកម្ពុជា គ្រប់រយៈពេល ៥ ឆ្នាំ។ ខ្សែបម្រើប្រយុទ្ធវ័យ ២៩ ឆ្នាំរូបនេះ ពិតជាជោគជ័យមែនទែនក្នុងការលេងជាមួយក្រុមសិង្ហក្រហម ដោយរូបគេបានឈ្នះពានជាច្រើនដូចជា លីគកំពូលកម្ពុជា Cambodian Premier League ២ លើក, ពានសម្តេចតេជោ ហ៊ុន សែន ១ លើក និងពាន Cambodian League Cup ២លើក ព្រម​ទាំង​ពាន​ឯកត្តជន​ជា​ច្រើន​ទៀត៕

ក្លិប​បាល់ទាត់ Bhayangkara FC ត្រូវ​បាន​បង្កើត​ឡើង​កាល​ពី​ឆ្នាំ​២០១០ ដែល​រហូត​ដល់​ពេល​នេះ​មាន​រយៈ​១៥​ឆ្នាំ​ហើយ។ ក្លិប​នេះ​​ប្រកួត​នៅ​លីគ​កំពូល​ឥណ្ឌូណេស៊ី ពី​ឆ្នាំ​ ២០១៧ ដល់ រដូវ​កាល ២០២៣-២៤ ប៉ុន្តែ​បាន​ធ្លាក់​ទៅ​លីគ​ទី​២ នៅ​រដូវ​កាល ២០២៤-២៥ ហើយ​ឥឡូវ​នេះ ពួក​គេ​បាន​ឡើង​មក​លីគ​កំពូល​វិញ​សម្រាប់​រដូវ​កាល​ថ្មី។ ពួក​គេ​ធ្លាប់​ឈ្នះជើង​ឯក​លីគ​កំពូល​ឥណ្ឌូណេស៊ី​១​លើក​គឺ​នៅ​ឆ្នាំ​២០១៧ ៕

អត្ថបទ៖ សេម កុសល