ព័ត៌មានអន្ដរជាតិ

ចិនបង្កើនតួនាទីខ្លួនលើប្រព័ន្ធហិរញ្ញវត្ថុសកល តាមរយៈប្រតិបត្តិការធនាគារ AIIB

បានផុស

១០ ខែ មុន

នៅ

ថ្ងៃព្រហស្បតិ៍ ២៦ មិថុនា ២០២៥

ដោយ

ចិនកំពុងសម្លឹងលើការពង្រឹងតួនាទីរបស់ខ្លួនលើប្រព័ន្ធហិរញ្ញវត្ថុសកល ដោយនាយករដ្ឋមន្ត្រីចិនលោក Li Qiang នៅថ្ងៃព្រហស្បតិ៍នេះ បានជំរុញឱ្យធនាគារវិនិយោគហេដ្ឋារចនាសម្ព័ន្ធអាស៊ី (AIIB) ដែលគាំទ្រដោយចិន បង្កើនការគាំទ្ររបស់ខ្លួនសម្រាប់គំនិតផ្តួចផ្តើមខ្សែក្រវ៉ាត់ និងផ្លូវរបស់ប្រធានាធិបតី ស៊ី ជីនពីង។ នេះបើតាមការចុះផ្សាយរបស់បណ្ដាញទូរទស្សន៍ CNBC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Li បាននិយាយជាភាសាចិនកុកងឺតាមរយៈការបកប្រែជាភាសាអង់គ្លេសផ្លូវការថា៖ «ខ្ញុំសង្ឃឹមថា AIIB នឹងបន្តប្តេជ្ញាចិត្តក្នុងការបើកចំហតំបន់និយម និងបន្តលើកកម្ពស់ការតភ្ជាប់ និងការប្រាស្រ័យទាក់ទងគ្នាក្នុងចំណោមប្រទេសអាស៊ី និងបណ្តាប្រទេសនានាជុំវិញពិភពលោក»។

លោក Li ដែលថ្លែងនៅក្នុងពិធីបើកកិច្ចប្រជុំប្រចាំឆ្នាំលើកទី ១០ របស់ AIIB បានបន្តថា៖ «វាមានសារៈសំខាន់ណាស់ក្នុងការពង្រឹងភាពស៊ីសង្វាក់គ្នារវាងធនាគារ និងគំនិតផ្តួចផ្តើមខ្សែក្រវាត់ និងផ្លូវ និងគំនិតផ្តួចផ្តើមអភិវឌ្ឍន៍សកលលោក»។

គេមើលឃើញថា គំនិតផ្តួចផ្តើមខ្សែក្រវាត់ និងផ្លូវ និងគំនិតផ្តួចផ្តើមអភិវឌ្ឍន៍សកលលោក សុទ្ធសឹងតែដាក់ចេញ និងគាំទ្រដោយចិន ដែលមានគោលបំណងលើកកម្ពស់ការអភិវឌ្ឍន៍ និងកិច្ចសហប្រតិបត្តិការជាសាកលរបស់ចិន។

គួរគូសបញ្ជាក់ថា ការលើកឡើងរបស់មន្រ្តីជាន់ខ្ពស់ចិននៅពេលនេះ ធ្វើឡើងចំពេលដែលសហរដ្ឋអាមេរិក ក្រោមការដឹកនាំរបស់ប្រធានាធិបតី ដូណាល់ ត្រាំ ហាក់មិនបង្ហាញការមិនគាំទ្រលើស្ថាប័នហិរញ្ញវត្ថុដែលដឹកនាំដោយលោកខាងលិច ដូចជាធនាគារពិភពលោក និងមូលនិធិរូបិយវត្ថុអន្តរជាតិ (IMF) ជាដើម។

លោក ត្រាំ និងរដ្ឋបាលរបស់លោកបាននិយាយនាពេលកន្លងមកថា ស្ថាប័នទាំងនេះ ផ្ដល់ប្រយោជន៍ដល់ប្រទេសដទៃ ដោយមិនស្មើភាពគ្នាជាមួយអាមេរិក ដែលធ្វើឱ្យមានភាពស្រពិចស្រពិល ចំពេលដែលអាមេរិកជាម្ចាស់ជំនួយ និងម្ចាស់ភាគហ៊ុនធំជាងគេសម្រាប់ស្ថាប័នទាំង២។

អ្នកជំនាញបានកត់សម្គាល់ថា សុន្ទរកថារបស់លោកនាយករដ្ឋមន្ត្រី Li ឆ្លុះបញ្ចាំងពីការខិតខំប្រឹងប្រែងជាបន្តរបស់ ចិន ក្នុងការទាញយកប្រយោជន៍ពីការរំខានដែលបណ្តាលមកពីគោលនយោបាយពាណិជ្ជកម្ម និងសេដ្ឋកិច្ចរបស់លោក ត្រាំ។

អ្នកជំនាញក៏បានចង្អុលបង្ហាញផងដែរថា ចិនបានដឹងយ៉ាងច្បាស់អំពីការប៉ុនប៉ងរបស់សហរដ្ឋអាមេរិកក្នុងការបញ្ចុះបញ្ចូលប្រទេសផ្សេងទៀតឱ្យងាកចេញពីចិន ដូចដែលបានឃើញនៅក្នុងកិច្ចព្រមព្រៀងពាណិជ្ជកម្មជាមួយចក្រភពអង់គ្លេស ហើយចិនកំពុងធ្វើការយ៉ាងសកម្មដើម្បីប្រឆាំងនឹងកិច្ចខិតខំប្រឹងប្រែងទាំងនោះ ដែលជាផ្នែកមួយនៃការឆ្លើយតបជាយុទ្ធសាស្ត្រដ៏ទូលំទូលាយរបស់ខ្លួន។៕